>>> قضية طاهــش ومـطـهــوش <<<< عـلـى كيف ياجماعه

[عبدالقادر صالح فدعق]

.

	(طاهــــش ومطهـوش )- من الطاهش ..! ومن المطهوش ..! برعاية الله وحفضه .. تم إجتماع اللجنة العمومية لإعادة حقوق المستضعفين المطهوشين .. لإظهار الحق بين طاهش ومطهوش .. ومعرفة من منهم اللاطش ومن الملطوش .. أبتدأت الجلسة .... ليتقدم السيد طاهش ويدافع عن ماتم نسبه إليه من تهم من قبل الأستاذ مطهوش .. قالو هيا دور لك هــدره .... المندوب ماهلوش ..! وقولو اللي تقولو ... نعم مايهموش إذن يتقدم السيد ملطوش لقراءة حيثياث الإتهام المقدم من قبله بحق السيد طاهش .. قام مندوب جمعية مطهوش وقال ( بالعدني ) :- أسمعو ياجماعة الخير .. بطلو الحكوال والحنجال .. هــادا الكلام كله أنا حرام ماقلتوش .. أنا والأخ طاهش أخوان من زمان .. وبطـّلو تقرحو فتن بيننا .. هــادا الكلام كله فاشوش ... واللي قاله واحــــــــد فـشـفـوش .. كـداب أبوه اللي قال أننا زعلان منه .. أنا عمري ماأشتكيتبوش .. ولاعمره لطشنا ولا لطشتوش .. الدنيا بخير والناس بخير .. نحن سدود من أيام النوبي ومطنوش .. نتقرع خبز ولبن حامي .. ونتغدى لحم أوصال وكروش .. ونتعشى فته بالسمن ورشوش .. ونحـلـّـي بعـده بشكليت ماكنتوش .. اللي قال أننا أشتكيت في به .. هدا أكيد من المعارضه علينا مدحوش .. الكهرباء هـــلــّـه .. المي هــلــّـه ... الدقيق مليان .. والعيال جنبي ...من الحمى رقود بطلو معاد يتقنفزوش .. والحرمــه شوف على حلاوه .. شوف الشعر كيف منكوش .. وكيف الحنا على الكفوف منقوش .. مامعيش مهره ..صبح وليل تتسمع لأغاني .. عوض أحمد والعطروش ... الحمدلله الحمدلله اللي قال أننا أشتكي بشلة طاهش .؟ هذا أهبل أكيد مربوش .. نحنا في نعمـــه ..وأخته وخالته .. أعطو نحنا من فيلــــــه .. وجنبـه كمان حــــوش .. وأعطو نحنا من بقعه مليحه وجنبه د خشوش .. والدنـيــا أمــــــــــــــــــــــــــــــــــــان وسابره .. الجوع دا .......... الظمى دا .............ماهلوش .. واللطـّـام بالبواكير فوق الراس ... من صدق مش كدب ... مانعرفوش .. اللي يقول غير دا الكلام ... وربـــــــي كــــــــــــداب .. من اللي قال إن نحنا من كثر الهم منكدين .. من اللي قال أن نحنا من الحمـى محرقين .. منهو اللي قال أن وجه الحرمه .. حقـي كله أستوى صنافير .. منهو اللي قال أن الجهال من الجوع .. قد أستوو زي العصافير .. وإن وجه أم الحرمه أستوى .. زي وجه الطير لونه كأنه حقين .. ياجماعه بطلو الكدب ... أتـّـقـو الله وبـطـّـلو حشوش والله وربــي ماحلفتوناش .. وأنا من الناس اللي مايحلفوش .. نحنا نحب الرئيس .. من صدق ياجماعه ونصدّقـه ما نكدبوش .. بس آح آح من اللي تحتـــه ... آح وآحين من جماعة رابش ومربوش .. أستوو أكتر من وحوش .. لايقولو الحمدلله ولايستحوش .. كله هبر في هبر .. مايشبعوش إنشاءالله يجعل لهم لقمه رمــّـه نـيـّـه .. حق لحمة كلب منتحر له سنه هجريه ... توقف في بلاعيمهم .. علشان معـاد يعرفو يبلعوش .. حق الناس الضباحى مثلنا .. أنشاء الله يجعل لهم خمسه صنافير .. في كل يد من يداتهم .. عشان ماعاد يعرفو يستلمو القروش .. إلا عبر وسيط من أهل أبو دعبوش .. عشان يوثق كل جرايمهم اللي مايختشوش .. يارب تخليهم يتسممو .. بعسل من حــق الضباحا مغشوش .. يارب تتقبل دعاء نحنا .. ودعاء أم الجهال عبير لإنه طيبه وعلى نياته .. وتحبك وتحب الجيران ولايوم أكلت حق حد .. الساده أعظاء الجمعيه هادا كلامنا كله .. ولاتكونو للأدون تفتحوش .. للحساد والحاقدين والمتضررين .. وخليهم يستحو ويبطلو قراح فتن وحشوش .. الدنيا رمضان عيب .. والسلام عليكم ورحمة الله وبركاته .. تاك تاك تاك تاك .. تصفيق حار وروح مطهوش وهو يدعي ربه بالفرج من الشيخ طاهش .

.

[عفيه والراس مرفوع]

مناضره فررررريده من نوعها وحلوه

والحلو فيها المضمون رسمي بقالب كوميدي


تسلم يمناك ولا عدمناك اخوي عبد القادر

عشت وعاش قلمك

[moon almoon]

مطنوش والنوبي
وسير بالباكر
وذي روحو البوش

والفنان الكبير عوض احمد الله يذكره بالخير

والفنان الكبير العطروش

ونحن ضائعين بين طاهش ومطهوش

اقتباس :

بس آح آح من اللي تحتـــه ... آح وآحين من جماعة رابش ومربوش .. أستوو أكتر من وحوش .. لايقولو الحمدلله ولايستحوش .. كله هبر في هبر .. مايشبعوش إنشاءالله يجعل لهم لقمه رمــّـه نـيـّـه .. حق لحمة كلب منتحر له سنه هجريه ... توقف في بلاعيمهم .. علشان معـاد يعرفو يبلعوش .. حق الناس الضباحى مثلنا .. أنشاء الله يجعل لهم خمسه صنافير .. في كل يد من يداتهم .. عشان ماعاد يعرفو يستلمو القروش .. إلا عبر وسيط من أهل أبو دعبوش .. عشان يوثق كل جرايمهم اللي مايختشوش .. يارب تخليهم يتسممو .. بعسل من حــق الضباحا مغشوش ..

استاذ عبدالقادر
صوره بروازها احساس
كانت محطات تأملي
وتمعني بمكنونها ، عيشتني الحروف بمعانيها
تلك هي لوحتك 00 كما لوحاتك السابقه 00
مفعمه بفن خلط الالوان الجاذبه لنقل واقع طاهش ومطهوش !!!!!!!!!!!!!!!؟؟؟؟؟؟؟؟؟؟؟ 00
حرياً بقلمي الإنشطار الى جزئين يتعانقان كل ثانيه
تصفيقاً في جل متصفحاتك 00
دمت بود

[عبدالقادر صالح فدعق]

اقتباس : المشاركة الأصلية كتبت بواسطة عفيه والراس مرفوع

مناضره فررررريده من نوعها وحلوه والحلو فيها المضمون رسمي بقالب كوميدي تسلم يمناك ولا عدمناك اخوي عبد القادر عشت وعاش قلمك

أختي الجميلة عفيه .... أشكرك كل الشكر على مداخلتك ..

كنت أتوقعت أن القضية واضحة وسنجد بعض من المداخلات في القضيه ... ولكن يبدو أن قضية مطهوش ليست واضحة بعد للأخوه الحلان ...

تقبل كل الود والتقدير

[عبدالقادر صالح فدعق]

اقتباس : المشاركة الأصلية كتبت بواسطة الزبير

مطنوش والنوبي وسير بالباكر وذي روحو البوش والفنان الكبير عوض احمد الله يذكره بالخير والفنان الكبير العطروش ونحن ضائعين بين طاهش ومطهوش استاذ عبدالقادر صوره بروازها احساس كانت محطات تأملي وتمعني بمكنونها ، عيشتني الحروف بمعانيها تلك هي لوحتك 00 كما لوحاتك السابقه 00 مفعمه بفن خلط الالوان الجاذبه لنقل واقع طاهش ومطهوش !!!!!!!!!!!!!!!؟؟؟؟؟؟؟؟؟؟؟ 00 حرياً بقلمي الإنشطار الى جزئين يتعانقان كل ثانيه تصفيقاً في جل متصفحاتك 00 دمت بود

أخي الزبير ضاعت الناس بين طاهش ومطهوش ................................ وأستوو معاد بحد يحسوش

من هو ملطوم ؟ ومن هو ملطوش

مثل زفة العميان ... والطروش

شكرآ لمداخلتك .....

,,,,

[عبدالقادر صالح فدعق]

... يرفع للإطلاع ...


.

[الصقار]

	الاستاذ القدير/عبدالقادر صالح فدعق كل عام وانتم بخير وشهر المغفرة على الابواب والتسامح مطلوب وهذا حال الدنيا (طاهــــش ومطهـوش ) استاذي زجل يذكرني ببيرم التونسي صاحب المجلس البلدي وهوا صحيح الهوى غلاب ..في الحقيقة لو لم تكن اجواء السقيفة متكهربه ..... لكان لنا تعاليق على تلك الرائعة التصويرية والتي اتمنى منكم استاذي ان تكررها في صورة اخرى بعيدا عن طاهش ومطهوش او كما قال عادل امام الفنكوش اكرر شكري لك صاحب الذوق الرفيع على امل ان تتحفنا برائعة اخرى غير مكهربه .