قصيده تحكي الماضي واحاضر

[أحمد العمودي أبوفيصل]

حيا زمن عدا زماني لولي = في دار بوطالب وهي ترطن رطين
هي دار معروفه أبد ماتنتسي = دار الكرم والجود عاطول السنين
ذه دار في الشعبه على الساس القوي = من عهد أجدادي ومبناه بطين
ماتنتسي دايم على بالي تجي = الجود والناموس فيها خالصين
سلام لش يادار ربيتي هلي = دار الشرف دايم ركونها شامخين
قد جاور أجداده وكم فيهم ولي = عمربن ا حمد شيخ جد ألأولين
ماتنتسي ياشيخ يأبن الولي = يانسل بن عيسى شيخ الحاضرين
ليهو لقا مقصد دوامن ممتلي = فيه الرجال ألأوفيا والمخلصين
هذا الخزانه دايمن ماتشتكي = لاغاب واحد جو بداله أربعين
نحن خدمناهم ولاحد يستحي = بيبانها للضيف دايم مفتحين
يادارمعروفه أنتي دنيتي = كنتي معي دايم على شده ولين
كل من قبص من هام عنده يرتقي = راقي وذريته يرقوا أجمعين
الشيخ عمر معروف جدي التقي = كلن يشهد له ونحن شاهدين
عدة علي أيام وفيها أشتهي = لازاد عندي أمس أو عندي طحين
ماروح للدكان لأن كيسي خلي = مافيه شي طلقه لي تلقي رنين
ومن شافني ماشي وملقي لي حذي = قالوا معه مليون وأن قلتوا ثنين
عدة علي أيام نتضحى حتي = والليل نتعشى على كزمه جحين
وألبسط من تمره ويعطونا شوي = كان ألشبع ممنوع في ذيك السنين
الصدق باقوله ومنه ماستحي = حيا زمن والناس كانوا صادقين
كلن مع صاحبه أول يلتقي = عالجبر والناموس أول ملتقين
ماحد على الصياح منهم يختفي = كلن بغا لول وحده بايبين
ليام لي مرت علي ماتنتسي = دايم على بالي ولها عندي حنين
يتقاسمون الخبز دايم والحتي = ماكان واحد منهم يمسي حزين
حتى ضحكهم في الزمان ألأولي = ماهو مثيل اليوم مخفي مايبن
كلن على صاحبه يضحك بألخفي = وقلوبهم سوداء وكلهم حاقدين
باقي الوفاء موجود بانحا قريتي = فيها الوفاء وأهل الشروع الوافيين
الشاب في العشرين من أول بري = واليوم عيال أربع كل شي فاهمين
عالبير ننزح بألزون هي والدلي = تطلع ملا مايوم طلعوا فاضيين
والنور من لمبه وننرشنها شوي = خايف من التبذير نصبح مبذرين
والقاز منخليه منها ينتهي = في ساعة الماجوب نرشنها رشين
واليوم في نعمه وكلن مبتلي = زاد الطمع فيهم وليتهم شاكرين
تكييفهم فريون وألا مركزي = وألبعض صحراوي ولاله شي حنين
ألأكل كل واحد على مايهتوي = حد يؤكل الكبسه مع حسين
وألابغى مندي ناجح مستوي = توه من التنار يأكله ثمين
كان يكفيني وأهلي وأخوتي = وأن حضر حد ضيف يكفينا أجمعين
أما الولد يبغى أكله قمبري = والا همبرجر ماندري منين
وألافلافل بكل شي باتحتشي = وأن قلت شاورما بغوها كل حين
وأما المره بسكت ولاباقول شي = يبغالها مصروف نجيبه من فيين
يبغالها فستان لكل سهره تجي = مالك عذرلازم تقولها حاضرين
المشكله كل يوم زفافن بايجي = وفستانها لول ماينفع لثنين
واشيا كثيره ياعمر ماتحتكي = مصروفها وحده كمى الراتب ثنين
المشكله ياناس ذا الراتب شوي = باقي معي في الدار باقي صغيرين
لاشفت انا مخلوق لحقته يشتكي = كلن على همه يردف بالونين
حيا زمن عدا زماني لولي = ماشفت حد صيح بصوت الغافلين

دار بوطالب هذا اسم الوالد الله يرحمه يعتزي ببوطالب

[عبدالله الجعيدي]

معلقة جميلة تصف فيها اسره لها قيمتها ووضعها الاجتماعي المعروف اشكرك عليها اخوي . تحياتي

[أحمد العمودي أبوفيصل]

اقتباس : المشاركة الأصلية كتبت بواسطة عبدالله الجعيدي

معلقة جميلة تصف فيها اسره لها قيمتها ووضعها الاجتماعي المعروف اشكرك عليها اخوي . تحياتي

الاخ عبد الله الجعيدي
شكرا لمرورك
تقبل تحياتي
دمت بود

[طالب النعماني]

يرعا زمان دار بوطالب
ابداعت واحسنت الابداع
كلام واقعي يابوعمود

[مجمل]

قصيده جميله يابوفيصل
تحكي الحاظر والماضي
ولا فيه مقارنه بين الاثنين

[القنّاص]

هذا الكلام الزين يابو فيصل
والله انك اصيل
قصيده تستحق ان تثيت
صح لسانك ولك اصدق تحياتي

[أحمد العمودي أبوفيصل]

اقتباس : المشاركة الأصلية كتبت بواسطة طالب باتيس النعماني

يرعا زمان دار بوطالب ابداعت واحسنت الابداع كلام واقعي يابوعمود

الاخ ابوراضي
شكرا لمرورك
تقبل تحياتي

[النحوي]

تسـلم اخي الغازي
وصفت حال الواقع هكذا الأبداع والا بلا ش أنقح الصدق ياولد بوطالب
وشنف اذاننا بالأبـــــــــــــــداعات الرائعـــــــــــــــــــة
صح الله لســــــــــــــــــــــــــــــــــــــــــــــــ ـــــــــــــــــــــــــانك

[علي فدعق الهاشمي]

نعم نعم

هذا الكلام الطيب يابو شيخ

سلمت وغنمت وسلم حبرك وفكرك

قصيده طيبة تصف دار طيب وكرم ونقاء وجود

هنا ترجمت الفرق بين الماضي والحاضر والاصالة والمعاصرة هناك فرق شاسع لايصف في قصيده واحدة
فلك مني الشكر الجزيل على ماقدمت

تحية لك ولا اسلافك

[أحمد العمودي أبوفيصل]

اقتباس : المشاركة الأصلية كتبت بواسطة مجمل

قصيده جميله يابوفيصل تحكي الحاظر والماضي ولا فيه مقارنه بين الاثنين

الاخ العزيز مجمل
شكرا لمرورك
دمت بود