دعجا وغنجا وفيها سحر ضافيها

**يسلم صالح بن عكعوك** · 10-20-2008, 02:32 PM

هذي قصيده حصلتها في دفتر الوالد واعجبتني
وبعد استشارت الوالد قلت بنزلها لكم فالمنتدى
تقبلو تحياتي : محمد يسلم صالح

يالحد حددت قلبن غافلن نسيان = عتا عليه الزمن وايام ناسيها
ايام فيها نسي كاين وهو قد كان = قد مربه مقدم ايامه وماضيها
روحت للعين لي مقصود بهل العين = بازور صدقان بتسمر بناديها
انا وياهم على الحشمه كما لخوان = والجبر والعز والناموس كاسيها
صفوت عرب من عروبه خيرت العربان = رجالهم ينتخي لا بان داعيها
ماشي بهم نقص فالماضي ولا فالآُن = العم والخال والجد من دواهيها
فثنى طريقي وقع دربي على دكان = دخلت لي حاجت(ن) به قلت بقضيها
لما ترجلت بابه قلت ياسبحان = شفت القمر من امامي بدر صافيها
راجعت مخزون عقلي قلت انا غلطان = يمكن انا فالفضى مانا براضيها
ولاّ فيوزات قلبي جالها خذلان = ولاّ انقطع لرت وحترقت بمافيها
حسيت بالدم يبرم داخل الشريان = والكبد في فرن بو طافش ويشويها
من شوفها ياصحابي رقلت العظمان = بنت العرب ضيعتني وسط واديها
دقيقت العود تحسبها قمر شعبان = عملت مشاكل لبو صالح ومخفيها
خلته يمشي بلا ديره ولا سكان = والأرض ضاقت كأن الكون يطويها
غره جميله مليحه كاحلت لعيان = دعجا وغنجا وفيها سحر ضافيها
والجعد مكثوب خصلاته على لمتان = غطى ردوفه وغطى ماحواليها
والخشم قصبي رهيفه شغل هندستان = صنعت أله البشر محد صنع فيها
ومبسمه مثل بارق في ربا قنفان = والجو غايم وهو يشعل وياضيها
والريق مثل البغيه من عسل جردان = من به مرض ماتداوى بايداويها
والعنق عنق الغزاله ذي فيالخليان = ماتشرب ألا نهار السيل يرويها
والنحر بستان فيه العنب والرمان = من تحت ثوبه مخبيها ومبديها
والخصر تدرج عليه اصبعي حق ليمان = كل المحاسن وهبها الله ومعطيها
سيقان به كن سوانق بن على معيان = فيه الهلب مثل بر الحلي مكسيها
واقدام به سبط بيضا مالها عظمان = كما تريب الغذالب يوم تغليها
ربي وهبه المحاسن مابها نقصان = من هامت الراس لما حدر رجليها
ماريت حد مثلها من نجد لا عمان = ولا بمرشد دبي ذي كلن يجيها
ولا برخيه ولا يشبم ولا عمران = ولا بيافع ولا الغنّا يضاهيها
وحده تشابه لها لو ما انا غلطان = في سوق نفحون مرت هي وصاليها
ملقي عليها حراسه من بني مران = من فر عينه لها غصبن يوطيها
والبارحه فاليحر من داخل الدكان = ثارت بقلبي حريقه كيف طفيها
اقسم قسم لو انا في صفت الشبان = لو باتقطع قطع مانا مخليها
عدا زماني هبا يافايق الغزلان = ولعادني مثل سابق عهد راميها
الشيب مثر علي مانا على العدان = وحضر مجالس بها تسمر عواديها
ولعاد لش شي محل فالقلب والوجدان = طريق فيها عقارب ليش عديها
انتي عرفتي وانا عارفش بنت افلان = روحي لحالش طريقي لا تمريها
يمكن معك وصف شي مانا كما عيمان = عيمان عارف لبايعها وشاريها
الشيب صلح سلاسل لي في السيقان = قدني مقيد قيودي لا تفكيها
يابنت روحي ولش في خافقي نيشان = بكتب قصايد بالنترنت بهديها
هذا على حسب مقدوري وانا فرحان = بس المسامر فنا حرمت مابيها
هذا حقايق ولا زايد ولا نقصان = وارجو السموحه من الكاتب وقاريها
مانا مهستر انا عقلي يزن اطنان = ولا تشمت بخلق الله وآذيها
هاذا حقايق ولكتب شي وهو ماكان = حاسب ضميري بدقه قبل قافيها
من قبل مكتب بيوتي راجع الديوان = واعبر طريق الجلز عالي /////////////////////////ها
صلو على المصطفى صفوت بني عدنان = صلاه من قلب مؤمن صادقن فيها

وهذي من كلمات الوالد : يسلم صالح بن عكعوك

**سالم السقاف** · 10-20-2008, 04:13 PM

من شوفها ياصحابي رقلـت العظمـان
بنت العرب ضيعتنـي وسـط واديهـا
دقيقت العود تحسبهـا قمـر شعبـان
عملت مشاكل لبـو صالـح ومخفيهـا
خلته يمشـي بـلا ديـره ولا سكـان
والأرض ضاقت كأن الكـون يطويهـا
غره جميلـه مليحـه كاحلـت لعيـان
دعجا وغنجا وفيهـا سحـر ضافيهـا
والجعد مكثوب خصلاته علـى لمتـان
غطـى ردوفـه وغطـى ماحواليـهـا
والخشم قصبي رهيفه شغل هندستـان
صنعت أله البشر محـد صنـع فيهـا
ومبسمه مثل بارق فـي ربـا قنفـان
والجو غايم وهـو يشعـل وياضيهـا
والريق مثل البغيه من عسـل جـردان
من بـه مـرض ماتـداوى بايداويهـا
والعنق عنـق الغزالـه ذي فيالخليـان
ماتشـرب ألا نهـار السيـل يرويهـا
والنحر بستان فيـه العنـب والرمـان
من تحـت ثوبـه مخبيهـا ومبديهـا
والخصر تدرج عليه اصبعي حق ليمان
كل المحاسـن وهبهـا الله ومعطيهـا
سيقان به كن سوانق بن على معيـان
فيه الهلب مثل بـر الحلـي مكسيهـا
واقدام به سبط بيضا مالهـا عظمـان
كمـا تريـب الغذالـب يـوم تغليهـا

الشاعر ابن الشاعر

صح لسان الوالد يسلم .. وما قصرت في النقل والتنسيق

وصف رائع جدا .. ويدرس ..

دمت برعاية الرحمن وحفظه

**صقرعلاو** · 10-20-2008, 04:15 PM

بصراحه دخلت هنا وانا بكامل الوعي

وبعد اطلاعي علا تلك الرائعه لا شك انني

اهتزيت ليس لجمال من وصفة بلقصيده بل لدها الشاعر ومصداقية حرفه

اخي اطال الله عمر والدكم ومتعه بصحه طوال ما احياه

من اليوم منا يقدر يصنع ابيات بصدق ومشاعر ما حوته تلك الا بيات

من هذا النوع من الشعر الصادق صنع المؤلفون والمخرجون

افلامهم التي يكتب عليها قصه واقعيه نعم اليوم ادركت من اين يخرجو القصص الواقعيه

قصيده تشاهد كل احداثها بعينك وانت الا تقراها علا النت او الورق

قمة الا بداع

اشكرك واشكر ابوك وابو ابوك يابن عكعوك

تقبل مروري

**مجمل** · 10-20-2008, 10:24 PM

هنا تطعم وتقراء وتدرس في جامعة عكعوك الشعر على اصوله
والله ماتقدر تقول شي
الا اعد قراتها مرارا لتروي عطش الشعر
ماهي غريبه على بوصالح هذا الابدع
حقه ابا عن جد
دمت في عز
وشكرا يامحمد على النقل وسلم على الوالد
تحياتي

**طالب النعماني** · 10-20-2008, 10:45 PM

زين ماسويت اخي محمد
قصيده رائعه واكثر من رائعه
\ولا وصيك لاشفت مثل هذه الدره الثمينه تنقلها لنا
ومالبوصالح الا ان نكلفه هكذا

سمعون قال اهلا · 10-20-2008, 11:18 PM

القصيدة روووووووووووووووووووووووعه

أنا أول مرة أسمع بالشاعر ولكن من خلال هذة القصيدة أعرف أنه من فطاحل شعراء حضرموت

أتمنى أن يقوم أحد الأعضاء بوضع نبذة تعريفية عن الشاعر

قبل مروري

سمعوووون قال اهلا

10-20-2008, 11:27 PM

شاعرنا يسلم صالح بن عكعوك صح الله لسانك وعلا شانك قصيده جميله يعطيك العافيه وشكرا للاخ محمد

**عبدالقادر صالح فدعق** · 10-20-2008, 11:46 PM

الله الله الله ..

يعلم الجميع لاشك أن التطرق الى الشعر الوصفي من أصعب أنواع الشعر وذلك لكثرة ماتناوله الأسبقون من الشعراء حيث في إعتقادي لم يتركو أي وصف إلا وأسقطوه على عضو من أعضاء الجسم من حيث التشبيه والوصف ,, لذا من وجهة نظري المتواضعة أن الشاعر الكبير بن عكعوك قد نقلنا الى دروب ومضى بنا سهول وقام بتصوير حال واقع في أبهى صورة وألبسها أبهى حلة ..

من أروع وأبدع القصايد التي تستحق التأمل بعمق .. وتستحق التثبيت فورآ ...

سلمت يد الشاعر والناقل ..

تم التثبيت ..

.