12-18-2002, 03:45 AM | #1 | |||||||
شاعر السقيفه
|
خير اللهم اجعله خير .... ياخس حلم(فلم) ؟؟ وين المفسرين؟؟
البارح حلمت حلم عيف ياجماعة ؟؟ ياخس هو داريين هواه ؟؟ .... حلمت اننا... ؟؟؟
خلونا ندخل في وادي الاحلام : البارح ياجماعة الخير بعد ماناموا اهل الدار قعدت اتفرج على برنامج نم وتغط في قناة ( غ ر آم ).. وقبلها كنت فاتح على قناة .." س ف ط ه ".. وكنت اتابع حوالي ساعتين ركت برنامج " التيار المقلوب " وكان موضوع الحلقة : مقاطعة المنتجات الامريكية في البلاد العربية . المهم الحلقة كانت مرررة راشنه عالاخر .. وكان كل واحد من الخصوم له وجهة نظرة الخاصة فالاول يؤيد المقاطعة ولو انحصرت فائدتها على تعويد الشعوب على اسلوب المقاطعة كمبدأ .. ولو لم يكن له ذلك الاثر الاقتصادي .. .. والثاني يقول المقاطعة ضرها اكثر من فايدتها ... وكل واحد ينبح في اتجاه ومعه براهينه وادلته ومقرب سمواره وعدته . المهم ... قدام ماتنتهي حلقة " نم وتغط " في قناة " غ ر آم " .. الا وانا عيوني مشنقة .. وقمت سحبل عمري للوقاء .. وديفت فيه كما يوم تديف الستره ( دااااااف ).. وسقطت كما الجنازة لي بلا لحاف .. كله من السهر يخلي الواحد يرك ويتصكصك ... وبالشدة والمدة تطنحت بالتكية ... وهت يانوم ... خخخخخخخخخ خخخخخخخ خخخخخخخخ . على فكرة نسيت قول لكم اننا ليلتها تعشيت ( دير وكرعان ) الله يخلي الوالدة يعجبها الدير ؟؟ مانا داري ليه ( مع انه رياحي طول الليل والقنابل .. قاح ..قاح ) ..وبعد العشاء شربت لي فيانين شاهي مصلوووب وختمت بكوووب لبن على كيفكم .. وتفلقحت تحت التلفزيون .. اتابع ذيك البرامج .. خلونا ندخل في الحلم: المشهد الاول : خوكم يحلم انه غرشة ببسي في وسط ثلاجة .... ومااقدر احترف ولا اصطرف لايمين ولاشمال .. لان السفن اب والميرندا متلازقين في كما اللبز.. وقدامي زجاج ( كاشه ).. باب الثلاجة .. وانا والجماعة والثلاجة في وسط بقالة صغيرة " بقالة شعطر ".. ماذكر وين بالضبط بس تقريبا في سرحة الحصن . يابوي انا عالبرد لي ينجف داخل الثثثللالااااججججةةة .. وانا قاعد انتفض كما السبولة .. واللي جنبي لبوهم نار ان كان حد يتحرك كما الالف .. مايهزك ريح , شكلهم مبطيين في الثلاجة منشان كذا ولفوا عليها . المهم كل مادخل مشتري قاعد اتشوف فيه حق بحلسة بغيته يخرجنا من ذيك النشبة ... وطالت الوقفة والسهن وكل من جاء فتح الثلاجة مد ايده لعصير (الهناء) والا (ديكو) .. والا سحب له غرشة ماء ( شملان ) ..., وانا كل ما ساعة اغمز لذا واضحك لذاك .. وان كان حد لفت قداي ... ... وخلاص جانا ضيق وهم وقلت والله شكلها نهايتك يابوشعفان .. قبرك في وسط الثلاجة ماهو في جرب هيصم . وعبرت الايام وانا و الجماعة قيام .. وفي يوم جاء زقر صغير للبقالة .. وقعد يهدر هو وصاحب البقالة (شعطر) وهت ياكلام هو وياه : ملاحظة : الله يقلعك ياشعطر يومك مخلي الثلاجة توي وبرودتها على اخر فرته ... وراك الكهرباء بلاش <<<<<( ساحب سلك من حق الحصن ) . الزقر : ياشعطر عندك ببسي ــ شعطر : آه بغيت .. غرش والا قصاع ؟؟ الزقر : بغيت قصاع ــ شعطر : ماشي معي الا غرش الزقر :لالالالالالا مابغيت الا قصاااع .... ان شليت غرشة لازم اشربها وارجعها للصندوق .. وانا مابغيت اقعد عندك اشرب . ــ شعطر : طيب ود من انته ؟؟ الزقر : ود آل بن خيلباه ــ شعطر : والنعم .. خلاص سمع شل الغرشة ...ولعاد ترجعها ... ومن شانك بخمسه وعشرين . الزقر : باشلها بخمستعشر ريال ؟<<<<<<<< ماحد يزيد عالصغيرين وخصوصا اذا كان ( شبامي ) ــ شعطر : .. لبوك الترترة من زقر .. عادك تتحكم وتتلكم ... يالله شلها لك قلعة . <<<< سوقة فاتر مسكين بغى بايبيع حتى بخسارة . وانا بازيغ في الثلاجة ..جات الفكية خلالالاص .. .. شطيت في السفن اب لي جنبي وقلت له بمسخره : مع السلالالالالامة يالباير .. باشوفك بعدين .. واسمع ياللخه ان بغيت باتترحرح وتنسدح في مكاني .. عادي لق لي بغيته الدار دارك ... الله يعينك انت والميرندا شكلكم عادها الا بالطويلة عندكم ... المهم الله الله في الثلاجة ولاتنسون تتغطون بالليل قال : ماهو سوى منك ياقليل المروة .. بايقع آه يومك ماعندك دم نسيت العيش والملح .. المهم بيني وبينك الصندوق وبانشوف من اللي بايمشي سوقه الاول .. يا انا ياانته يالكوووور قلت له: انت ماسمعت شعطر يقول للزقر شله ولا ترجعه للصندوق .. ماهو منك معذور بك الوقفة صنت آذانك .. انا طيلع خرووووج نهائي يامبدل . عادنا الا غلقت كلامي الا والزقر مرشنا من رقبتي .. وخبه عالدار. فتح له ابوه وشط فيه ... وقعد يتفرج في وفرقز عيونه.. قلت باسلم عليه : مسيت يابو الزقر .. ماشاء الله عليه ولدك سبيع اشترانا بخمستعشر ريال بس .. ومع الغرشة.. الرجال مارد علي .. خاف ماسمعنا .. والا يمكن يتصيقع .. بس مسك ولده من اذنه وفحسها .. وترتره لا داخل الدار.. والزقر من الفجعه زقل بي في القاع .. بس ماانكسرت الحمدلله ان الزقر قصير وقريب من القاع السقطة كلها الا كم سنتم الاب : ياحمار ياخمع يامبدل يالوح ليه تشتري ببسي ؟؟؟؟ ماقلت لك لا تشتريه طوووول ــ الزقر : اهي اهي .. ياااببه انا حب الببسي وماقدر اجشي بعد الاكل الا اذا شربت ببسي الاب :ياحمار ياتنح يا.... عفواً ـــ>>> ( فاصل اعلاني )..... فاصل اعلاني : 1- تعلن تعاونية الحزم عن بيعها للبودنق والجيلي مع كرتون شخط .. والبيع بالطابور .. يرجى احضار فاتورة الكهرباء والماء المدة محدودة لفترة اقصاها نص شوال ... لاتفوتكم الفرصة. 2- تعلن قناة " ش ط ح ات " عن تعاقدها مع مفسر الاحلام الشهير " كعزووول " والملقب بــ " محمس ويذرى " وذلك للاجابة على تساؤلاتكم حول احلامكم .. ونحيطكم علما بأن تخصص الدرويش " كعزووول " هو كوابيس سياسية. كما تعتذر القناة عن استضافة المفسر " لعري لدري " في حلقة الاسبوع المقبل نظرا لالقاء القبض عليه من قبل الشرطة الدولية ادخل بول ENTER BOOL . 3- تعلن شبكة " اثرم ثريم دوت نم دوت تغط " عن فتح باب التصويت في صفحتها الاساسية لترشيح حلم الاسبوع .. وذلك اسبوعيا خلال شهر صفر القادم. ....علما ان جوائز السحب عبارة عن تذاكر للسفر الى قومواناموا. يعلن مكتب بو شعفان للاستيراد والتصدير عن طرحه لمناقصة شحنة احلام طازجة قادمة من سيحوت .. بسعر الجملة على الاخوة التجار الراغبين بادلاء عروضهم البعث بها على الايميل mailto:[email protected] العفو .. الله يقلع الاعلانات نرجع الى مسلسلنا المكسيكي ( حلم الولهان بعد الدير والكرعان ) الاب :ياحمار ياتنح يا.... ياولدي نحنا مقاطعين المنتجات الامريكية يالوووح ــ الزقر : اهي اهي .. طيب يابه ذحين انته سيارتك جمس والجمس امريكي .؟؟!! الاب : ياولدي السيارة طحست وكذ نشبنا فيها لكن من اليوم ورايح معاد شي حاجة اسمها امريكي. انا قاعد اسمع خرطانهم ومرطانهم .. وخذ وهت وشل وحط .. المهم حسيت ان الزقر ربخ ورضخ وسبر بايقتنع بكلام الشيبه القور .. وتخيلت انه يرجعنا لبقالة " شعطر " .. وكله بشق وتخزال السفن اب ومسخرته بي بشق ثاني .... لا والله باموت ولا بارجع عند شعطر وثلاجة هيصم . المهم قويت قلبي ونهقت كما الحم.... : يااااااا بو الزقر ايييي ياااااا بو الزقر انته شفك غلطااان وان معك شي كلمنا راس براس . الاب : يعوي راسه ويصويه ويشط يمين ويدنن ويدنقس ويطوس المهم فرت راسه في الاتجاهات الخمس يدور منين ذا الصوت جاء ... والزقر بله مسكين و فزع وقعد يتلفت ـــ>>>>> هييييي شط هنا تحت ياشيبة ابليس . الاب يهذول : بسسسسسسسسسم الله الرحمن الرحيم .. بسم الله الذي لايضر .. والزقر مسيكين نقز نقزه وتطنح في رقبة ابووووه ... طمر طمره تستاهل ميدالية ذهبية في الاولمبياد ... ــ قلت : يا جماعة صلوا عالنبي .. وهدوا شوي .. صحيح انا ببسي لكننا اعرف ارطن واتكلم لغات. الاب : انت سكني ؟؟ الله يرضى عليك .. خل نحنا في حالنا ... وشف ولدي الا سقله وحمار وثور ووو... لا تعابر عليه والله مايعرفك .. ولي مايعرفك يجهلك .. وذحين باخليه يرجعك للبقالة وهو مغمض عيونه. ــ قلت : لالالالالالا مابغيت ارجع للبقالة .. ماصدقت اننا اتخارج منها .. وسمع انت وياه شونا مانا سكني ولا شرهوت .. انا ببسي متعلم برع و معي لغات يالوح .. وبعدين تعال يابو المصايب انت تسب الزقر وتقوله ياحمار وابو الحمار = حمار جممممم الاب مسك نفسه وسبر يهدأ.. ــ قلت : انا بافالجك في قضية المقاطعة وان قلت باترجعنا البقالة شفنا باقرح نفسي فيكم .. باتقول كيكيه بافجر نفسي ؟؟ باقول لك .. الشغلة سهلة كل مافيها رجه والا رجتين .... وبافك الغطاء .. واستلم من النطش لي بايصلك انت والحمار ولدك يابو الحمار . الاب : انته انتاج امريكي ونحنا مابانشتريك منشان ماندعم اقتصاد امريكا. ــ قلت : من قال ياخي ... شفنا انتاج مصنع " الجميح " سعودي .. يعني مانا امريكي . قال: الجميح يعبون لكن المصدر امريكا ... ليه حد قالك خمع مانفهم الكلام ــ قلت : شفنا مالي ذنب .. انا جيت انشرب يعني تشربونا .. وحق اننا ارجع للبقالة والا انحبس في الثلاجة حق الميتين .. لالالالا والف لالالالا .. آه سيبي انا وبعدين آه موقفكم في الامم المتحدة.. و آه موقفكم شخصيا قدام " كوفي عنان " .. قال: الكوفي مايضر نشرب كوفي .. ..بس ببسي حرام مايدخل شويتنا ــ قلت : كوفي من... اييييي سمعنا هنا ياخي انته ماباتخسر شي ... الشغلة كلها خمستعشر ريال .. يابلاشاه خل البخل لك راعه ..شف الزقر مسكين بغى بايشربنا.. وخل نحنا حبايب منشان مارجع الثلاجة .. ووعد مني ارجع سباحة لمريكا وانا غرشة الاب سكت قليل ..<<<<( له قلعة قور) انا الاب : يعني مانته سكني ــ قلت : لا ياشيييبة ابليس .. الله يستر علينا وعليهم .. وانشاء الله ربي بايعوضك في الخمستعشر ريال حقك وبايخلف عليك بديلها يابو الرجال ياطم شي فرحت .. حسبت الشيبة اقتنع بكلامي والعلاقات تحسنت . الاب : يعني اكيد اكيد مانته سكني ــ قلت : لالا:p قال: ياولدي قمممم.. شل ذي الغرشة الكشفاء وصقع بابوها في الستره ــ انا : والله والزقر ماصدق .. جاء يخببببببب ... له قلعه وقعت له شهقة السكني .. ونتعنا بايداه الثنتين ( لهن الكسح ) ... قلت له كنك وين محبتك للبسي ياحبوب .. نعنبوها والله صدق ذلا كلام سقل .. ياهوين كنك رجعت في كلامك .. الزقر لكشف لقبع مارد علي والظاهر بغى بايبرد كبده في اهه و نوش بي بسرعة تتجاوز 50 ذراع في الثانية .. وشوّل بي على السترة .. والله نشغه قوية ذا وهو زقر كيه لاكبر ( بايقع مصارع ) .. لبوه راعه على حقد انا زعقققققت ونهققققت وفجأة .. حشرت من النوم حصلت نفسي ديفت من القعادة للقاع ... قمت توضيت وصليت ركعتين وتعوذت من ابليس .. وتحمدت ربي انه كان حلم ماهو صدق والا كاننا الان في ( جرب هيصم ) ويستاهل لي يوكل دير وكرعان بالليل ويشرب قفاها لبن ... والعفو ان طولت عليكم ... ماسيبي ذلا الحلم هوكذا وبغينا تفسير ياجماعة ... غير مانا بايقع بي شي ؟؟ ;baw ياعمييييري. |
|||||||
12-18-2002, 07:54 AM | #2 | |||||
حال جديد
|
ماتشوف شر شعف والحمد لله على السلامه
وانت مره ثانيه اذا اكلت دير وكرعان عليك بقمحه كمون0 يقولون زينه0 لاعدمتك اخا0 |
|||||
12-18-2002, 05:54 PM | #3 | |||||
حال جديد
|
ما تشوف شر ياشعف
بس أنا من خلال خبرتي في تفسير الأحلام أقول << والقول قول الله>> إن الدير والحمدلله صافي ... لكن الكرعان حق طلي من طليان مولى جعيمه كرعان وسخه ..... دايم وهن يدحقن في العدانه والوالده .. الله يطول عمرها ويعطيها الصحه ما غسلت الكرعان بالفلاش الأحلام المقبله با تكون سعيده إن شاء الله ... تحياتي .. وشكراً |
|||||
التعديل الأخير تم بواسطة بن صران ; 12-18-2002 الساعة 05:56 PM |
||||||
12-18-2002, 07:15 PM | #4 | ||||||
حال نشيط
|
خير انشاء الله يا بو شعفان
بعيد الشر عنك>>>>>>>>>>> مستورده بس اللي مستغربه ليه السفن أب والميرندا ما قالوا شي من البرد ؟؟ ولا يمكن لابسين اكوات على كل حال أنا أقول أنه لا الدير ولا الكرعان لهن دخل في اللي شفته لانهن ترباة بلادنا .. والسر في اللبن والشاهي ـ عارف منين مصدرهن ؟ ـ المهم ذهن ثاني مره وتفقد في الصناعه .. الحمد الله ذي المره ربنا ستر و قلت ديف من القاعده للقاع ... ماحد عارف يمكن المره الثانيه تقول : وشت من القاع للقاعده وانت قدك عارف بعدها لا ويييييييييييييييييييييييييييييييييييين بدل الثلاجه ــــــــــــــــــــــــــــــ> تنار تمسي على خير بو شعفان وتأكد قبل ما تنام أن تنام تحياتي المدوديه |
||||||
12-19-2002, 01:06 AM | #5 | |||||
حال قيادي
|
والله ماهو من الدير ولا من الكرعان
الحلم العيف من الكراعين المقشعة لي بيتت تبصبص فيها ونت عارف الفضائيات ( كلهن لا بسات من غير دير ) والظاهر اعلانات الحفايظ اثرت فيك انتبه لنفسك خوي |
|||||
12-19-2002, 03:46 PM | #6 | |||||||
شاعر السقيفه
|
العفو ياجماعة الخير .. غير مانا بطيت عليكم .. ذلا شونا عادنا الا وصلت ذحين الهف لي يومين وانا قاعد دوّر ارضية جنب الحبايب والحبابات ;baw ...( الواحد يضمن له بقيعة ؟؟ خاف يغلين الاراضي غدوه )... وماحصلت غير الا ( 12 فوت ) >>> خير من ماشي ... ماشاء اله جرب هيصم امتلأ كله وحلانه اكثر من اللي في البلاد عايشين ... المهم انا شفت ماحد فسّر الحلم بعيافة وقلت ماحد ضامن عميره .... وقربت الكفن ;baw .... وهي كلها موته يافي الثلاجة ;alia يا صقعة في السترة .... يارب حسن خواتيمنا
ويابت المكلا .. مشكووورة وعساش ماتشوفين شر يارب بس بيني وبينش انا تعقدت من الدير والكرعان >>> ( بالليل بس ).. وياريت تتكرمين وتكتبين لنا الوصفة في المطبخ خلي الناس تعرفها عالاصول ... يمكن يحلمون احسن مني .... ولا تنسين تذكرين الكمون ويابن صران... شف الوالده حنقت منك ... قالت شفها تغسل الكرعان ( بــ كلوركس ) >>>> ( انصع واكثر بياضاً ).. ولو انه مش عارفين مصدره ؟؟!! ...اما الفلاش ؟؟ ... عندينك ناوي علينا .... ومشكور عالنصيحة .. اما انت يالمدودي تعال هنا .... خليتنا وسوست حتى في ثيابي يالخام >>> ( منين مصدرهن ؟؟!!)... ومنين بانجيب شاهي ولبن ؟؟>>>> ( من مدوووودة ) .. ياريته الا صدق ينزرع هناك كان ما حنبنا ... وذلا كان اول اللبن من ديد الضانه .... ماذحين حتى الحريم ميوبسات مافيهن لبن ... وخلوا نحن نرضع من ديود البقر ( الهولندية ).... حتى صرنا منهن >>>> " اخوان في الرضاعة " ...ونصيحتك عالعين والراس بننام سوى قبل النوم ... وتفلها يالمدودي ... ( القاع ده ... آه ) >>>> القاع ارحم والله .. مافينا آله ؟؟!! .. والله يستر ... من السّتر... ولا تزززززعل . .... ولي غلق الباقي بوحمد ؟؟!! ... الله يهديك شفنا انسان يويّد >>>> ( والله اعلم ).. وحالي حال نفسي من السترة ... الى السترة >>> ( كما غرشة الببسي ) ... مانا حق قنوات فضائحية وكرعان مقلية ... دايم اتفرج الا على قناة ( س ف ط ه ) و ( غ ر آم ) بس و ...ــــــــــــــــــــــــــــــــ>> " صنعاء " ..... ولو انهم قالوا يشفرونها قريب ؟؟؟ .... واخيراً وليس بآخر سلامي لكم يالحلان ... وحلّوا لي ان قرحت الغرشة ... والى اللقاء .... مع حلم آخر ....,,,,,,,,, |
|||||||
03-01-2003, 03:10 PM | #7 | |||||||
حال جديد
|
ماشي شر عليك .. ليه ما كلمتني؟؟!!
وبعدين تعال .. حبابتي داريه انك قاعد تحش في الكرعان حقها ولا لا؟؟ اعقل ولا بدق لك مسمار |
|||||||
03-01-2003, 03:53 PM | #8 | |||||||
شاعر السقيفه
|
ياحيا بذيبنا الصغير ... ذهن تمسمر ... لان حبابتك اصلا درت من زمااان .. ومن يومها معاد طعمنا للدير والكرعان طعم ;baw
بس خذها نصيحة مني واسأل مجرب ولا تسأل طبيب .... ذهن من الببسي شفه ما من ابوه خير ... لاننا سمعت انك ماتقدر تجشي الا لاكذ شربت غرشة ... شفك باتجيك كواااابيس عيفة كما الشعف |
|||||||
08-23-2008, 02:27 PM | #9 | |||||
حال نشيط
|
من أجمل ماكتب قديما
هل سنجد له مثيلاً ؟! |
|||||
مواقع النشر (المفضلة) |
|
|
المواضيع المتشابهه | ||||
الموضوع | كاتب الموضوع | المنتدى | مشاركات | آخر مشاركة |
دعاء اوصى به نبي الامه صلى الله عليه وسلم مره واحده في العمر | الدمعه الحزينه | سقيفة الحوار الإسلامي | 6 | 05-28-2011 11:43 AM |
أجمل دعاء للأم فلا تبخل عليها بقرائته لها | تناهيد شاب | سقيفة الحوار الإسلامي | 9 | 04-05-2011 02:07 PM |
وفـاة الدكتور أحمد محمد الحملي | قيس الجفري | سقيفة التعازي | 4 | 11-25-2010 01:39 PM |
من روائع المحضار / لبيك اللهم لبيك | من السادة | سقيفة عذب الكلام | 4 | 11-18-2010 04:26 AM |
|