مساجلة (( الدين دين الله ))

[جمال العطاس]

يقول بن هاشم ترى بعض العرب متكسبِه=بالدين حتى والعقيده بعضهم يتكسّبون
مابانعُم والناس حد صادق وحد متذبذبِه=قالوا اصوليه وهم لجل اللقم يتذبذبون
كانوا شيوعيه ورا ذي الخلق ذه متقلبِه=لامالت اللقمه الي جانب لها يتقلّبون
يكفّرك والله لاخالفت شئ من مذهبِه=ويقول لك مشرك وانتم لاجهنم ذاهبون
يبدّعون الناس كل الناس ذه ماتعجبِِه=كل من حفظ آيه قعد يفتي ولاتتعجبون !!
الدين ماهو بالعمايم بعضهم يامكذبِه=الدين دين الله ماهو دين حد لايكذبون
وبعضهم لابس شماغ احمر براسه يعصبِه=وان قلت شئ مابايوافقهم عليك يعصّبون
اذا اختلفوا عالمصالح مالحق حد مطلبِه=لقيتهم فتنه على الباطل وبه يتطالبون
الدين ماهو باللحى والا بخطبه مرتبِه=لابد على حسن المواعظ ياجماعه يرتبون
الحق مهما كنت ياهذا الدعي ماتغلبِه=الحق مع اهله وحزب الله هم الغالبون
منهاج حزب الله لاتكفير ماشئ سبسبِه=واهل الفتن واللي يحبّون الفتن يتسابون
والحاصل ان الوقت ذا وقت اللعب والملعبِه=حتى العقيده صارت الاوباش فيها يلعبون

[المـتــ السري ـحـري]

ماشاء الله .... مشكوررر

[ســــــعــــــود]

صح الله لسان بوهاشم وقايل القصيده تسلم تسلم0

كل ماذكر واقع وعلينا ان لانكفر بعض شلكم سيل حنا خوان وعيال عمومه ومن وطن واحد 0

[سبع الليل]

[poet font="Simplified Arabic,4,black,normal,normal" bkcolor="" bkimage="http://www.alshibami.net/saqifa//backgrounds/10.gif" border="none,2,gray" type=0 line=200% align=center use=sp char="" num="1,black"]
أيش باتساهن من ضماير مكذبه=عابعضهم البعض دايم يكذبون
في داخل المسجد صفوف مسنبه=ماحد كماهم في الصفوف يسنبون
وفي خارج المسجد يدور مطربه=ووسط المجالس والمحافل يطربون
لا لا تساير قوم ذي هي مخربه=ماقصدهم غير انهم بايخربون
عاالناس وبتخلي العرب متحنبه=وألابن هو يا والده يتحنبون
هذا زمن ياصاحبي يامعجبه=كل جيل في ذي قبلهم يتعجبون
عااللف وعلى الدوران جم مدربه=وعلى الفعال المخزيه يتدربون
حتى العروبه اصبحت مستعربه=لما متى ذي الخلق بايتعربون
اما الحسد والبغض اعلى مرتبه=وفي الفتن والمكر كم بايرتبون
اقوال شينه بالمعاني متبتبه=وفي القيل هو والقال ياما يتبتبون
عاالزور والبهتان عقول مصلبه=ياويلهم ذي عالغلط بايصلبون
وان جيت تنظر في أمم متغربه=من اجل لقمة عيشهم يتغربون
ترثاء لهم وسط الخريب معزبه=غصبا عليهم ياجمال يعزبون
شباب في الدنيا تعيش معذبه=أوطانهم ضاعت وهم يتعذبون
لي ماحسـبنا فايده مابحسبه=من راس مالي كلهم مايحسبون
[/poet] ;alia ;alia

[جمال العطاس]

واجب على الامّه من الاوباش هذه تنتبِه= كل من يكفّر واجب ان الناس له يتنبّهون
لايخدعون الناس بالمظهر وكلمه طيبِه = الطيب ماهو حولهم لاشك ماهم طيبون
شُبّان حد عاطل وحد طفشان شُغلُه متعبِِه=ويكرهون الشغل يرهقهم ومنه يتعبون
جُهّال واغلبهم مسوَي وسط داره مكتبِه=والمشكله لاحرف يقرونه ولاهم يكتبون
والبعض فيهم لو بغيت الحق والله ( مسحبِِه )=وقت الله الله هو وأمثاله ترى يتسحّبون
وأن شئ طرف له في وسط غفلاتنا باينهبِه = واهل الورع ياناس ماهو طبعهم يتناهبون
حد منهم تلقاه مثل الضبع لادخلت ( دبِه )= وان شئ عزومه مدسمه هشلِه لها يتدبدبون
وان جيت باتنصح لواحد منّهم وتعاتبِه= يجمّع اصحابه واشباهه عليك يعاتبون

مسحبِه : مفرده دارجه بلهجة اهل الكسر تعني التحقير والازدراء
دِبِه : جحر الضبع بلهجة اهل الكسر
هشلِه : السرعه في المشي

[الزعيم]

بالصراحه معاد تركتم لنا مجال حتى لبيت واحد..... ياسلام عليك يابوهاني وياسلام عليك يالسبع ....

عاد الهوى عاد ..... عاد الحبيب الاولي عاد

[حاتم الطائي]

بانطرح السكين يالشّعار فوق الحبحبة=لازم نميّز بين لي يشرب ولي يتحبّبون
فينا المرض مزمن بغينا له طبيب يطبّبه=شوفوا مرضنا زاد حصل ناس فوقه يطبطبون
معاد حد باقي في العربان ناس مأدّبه=والنصح ماينفع اذا هم مابغوا يتأدبون
ان جيت باتنصح يجولك بالوجيه المغضبه=ويكرهون الخير واهله دوب منهم يغضبون
بعض العرب ان شاف شي صالح يجي له يخربه=وبعضهم عالشي وعالماشي دوام يخرّبون
وبعضهم عربيد ؟ كل طارف بجبنه يشربه=شي خمر شي هروين جيل اليوم هذا يشربون
والبعض من يصبح الى يمسي وهو في عبعبه=من زغط لا مطراق تلقاهم هناك يعبعبون
وبعضهم طارح لسانه للخنا والمكلبه=يعاونون الشر واربابه ولي يتمكلبون
ولي يدّعون العلم ؟ عاد العلم له كم منصبه=ماهو لمن جاء قال بافتي بس على من ينصبون؟
يكذب اذا حدّث بشي .. والا لنفسه ينسبه=ذا دين ماهو طين ياللي فيه انتوا تنسبون
قله لحق نفسك وحاسبها .. قبل مايحاسبه=رب العرش في يوم كل الناس فيه يحاسبون
حد زين باعماله وحد صورته صورة مشحبه=كل من عمل باطل ومنكر لازما بايشحبون
كل من تعَب غيره .. يقع له يوم غيره يتعِبه=ماشي كما الجودة .. نصيحة قبل ماتتعّبون
والقصد في ذا الوقت كم حاجات جم متشعّبه=تلين ل الليّن .. وتتشعّب على اللي يشعّبون
حد عقل حانب به .. وحد مسكين عقله يحنبه=من كان مستكمل بعقله .. خلّ ابوهم يحنبون

[جمال العطاس]

أهلا وسهلا بحاتم يامرحبا

حيا بها أبيــــــات من حاتم قوافي مُذهبِه=وين الخوارج كم وكم من بعدهم بايذهبون
مذاهب التكفير بالمهدي عواقب تعقبِه=من كفّر اهل الدين بكره باللظى يتعاقبون
مادام ياحاتم بيدّك قد فتحت الحبحبه=شف بعضهم كانوا من أهل الفسق والاّ يحببون
وبعضهم كانوا على ماظن شباب امهربِه=الله يعلم حالهم ان كان صدق يهِـرّبون
تشوفهم لجل المصالح للفرص مترقبِه=والا لزلات العرب ياصاحبي يترقّبون
نفوسهم شفها على المسكين دوب معقربِه=واذا لهم شئ مصلحه في شئ مايتعقربون
قلوبهم باشكالهم ياخوي شفها معجبِه=اقوالهم تعجب وهم بافعالهم مايعجبون
وبعضهم عاده يضعّف قول لو مايرغبِه=ويحسّنون القول لوهم في اتّباعه يرغبون
هم ايقظوا فتنه وامتنا لهم متهيبِه=سلّط عليهم ربنا من هو وله يتهيبون
من لامشى عالحق جم نكبات له باتنكبِه=بوجوههم في النار قال الله بايتكببون
والا كما الجهّال بعض الناس ذي متنسبِه=قالوا لنا سادة لأهل البيت بايتنسّبون
صحيح ساده لكن السادة رموز مهذبِه=منهجهم القرآن والسنّه وبه يتهذّبون
كانوا ائمه كم وكم داعي أمم تأتم بِه=كانوا مشاعل للهدى والناس فيهم يقتدون
ساروا على نهج النبي في خير منهج مصوبِه=من زاغ يدعونه بحكمه يرشدون . يصوبون
ماكفّروا مؤمن يباتوا عالقران محزبِه=ماهو على التكفير والتشريك بايتحزبون
دعاة في ذا الوقت تدعي للفتن ومخربِه=قالوا من اهل ( الناجيه ) نحن كَذَب ويخرّبون
كلن يدوّر له على فيللا وموتر يركبِه=وان كان ماحصل ( كروزر ) فيه قط مايركبون

تحيه خاصه للاخوان سبع الليل والزعيم والشيخ حاتم الطائي والمتحري السري وسعود . واشكرهم على مساجلاتهم الرائعه . الحقيقة كتبت الابيات هذه وهي قصيدة عادية ولكن يبدو ان المزاج عند الاخوان رائق فتجاوبوا واصبحت مساجله مطوّله لذلك أرى نقلها وتغيير مسماها من قصيدة ( الدين دين الله ) ونسميها ( مساجلة الدين دين الله ) عموما الشكر للجميع المشاركين والمتابعين ويسعدنا جميعا اسعاد الزوّار والحلان بمانقدر به والمعذره من الجميع .

[عوض بن عاصب صميله]

قويتوا

ببببببببببببببببببببببببببببببببببب

قول ملان ياسيد جمال ايه ذا ولعاد ذه حليله معك . والله انا قريت كمين مره وتعرف قراتي ضعيفه لكن الشعار كلهم جابو قول يغرم
ايه ذا .......كلامك كله صدق الوقت ذا اغبر وعيف وزقور جو ذلحين بغوا بايقعون علماء ( لبوها تطحن )
يجيبون خرطان وكلمان وحاسبين انهم معاد حد مسلمين الاهم
مبدلين عاد اماتهم ماعصرتهم سوى

[سالم محمد بلفقيه ((الشرقاوي))]

صح الله لسانكم ياشعار والنعم فيكم وربنا يكثر من امثالك