الى خالد سالم بن مهنا المري (الشكر والعرفان)

[عمر الذيب]

الاخوه الاعزاء حلان السقيفه السلام عليكم ورحمة الله وبركاته اقر واعترف انني ما اعرف في الكميتر الا يا الله اكتب القصيده وانزلها واحيانا كثير قصائد ضاعن
وكنت اتمنى بيني وبين نفسي ان اجمع كل قصائدي في ملف واحد او ديوان كما يقولون وكل ماجيت باكلم واحد من اللي يعرفون فكرت ان العمليه ماهي بسيطه
وتحتاج تعب وسهر وكل مره كنت اصرف النظر ولكن اليوم فاجاني الاخ العزيز خالد بن مهنا وقدم لي على طبق من ذهب ان صح التعبير ماكنت احلم به فكتبت ما ستقراؤن
على عجل هذه القصيده المتواضعه واهديها الى اخي العزيز خالد سالم بن مهنا المري عمر الذيب

الشكر والعرفان

تعداد موج البحر واوراق الشجر=واعداد اس ام اس ومتكلم يقول
الوه والا مرحبا فيمن حضر=واعداد حبات الذره لي في السبول
واعداد من هلل وكبر واعتمر=واعداد من صلى وسلم عا لرسول
ومليون وتريليون وان عدشي كثر=ارقام ما عرفها على الخاطر تجول
عد كل ما تقدم على القاري ومر=الشكر والعرفان لك يابن الاصول
لهلك ولك ولا الشوامخ والقور=وللارض لي قد سرت فيها بالرجول
ممعي خلاف الشكر يا وعل النتر=عنوان مخراجي ومفتاح الدخول
ندخل به البحرين والدوحه قطر=ومتاكد انه با يحصله قبول
عند المهنا نون عيني والبصر=خالد وليهم في البلد عرضا وطول
كمن وكم من وعل في قرونه عجر=يوم القشاع التاج عا روس الوعول
وانك بغيت الصدق وابغيت الخبر=من عند بو طارق حكم لك با يقول
ما كل غيمه تنتظر منها مطر=ولا كل بارق تحتري منه سيول
ولا كل شجره منها تجني ثمر=ولا كل غوصه منها تطلع بلول
ولا الطبع واحد يارفيق في البشر=قدام كل جيد ميه واكثر فسول
وانا يقول الذيب بو طارق عمر=اختار في السعفه رزينين العقول
امثال خالد بن مهنا وافتخر=ان المخوه والصداقه والميول
بيني وبينه عتمها الساهر سبر=واسقى البذور اللي غرسنا في الحقول
واثمارها من كل حالي في الثمر=الجود والناموس واخيار الدلول