باعوك يابندر عدن !

[القلم الناطق]

قــــال المعنّى بومحمّد آآه من ذا الوقت آه=ضاعت موازين العداله والشّروع الوافيه
وتبدّلت خُضر الرواني واختلف لون الحياه=وبات يهذي كُل عاقل بالهروج الفاضـــــيه
(حُكم الجهاله) والولي خيّم على عقله غبــــاه=ومن يولّي حُكم جــــــــــــاهل لايلوم التاليه
الظُلم والباطِل تعالت سُـــــــــلطته والحق تاه=ودفّة التطوير من تســــــــــعين قِدها خاويه
غابت شُموس الحق واستلّت سكاكين الطُغاه=لِمن خرج عن طوعهُم حطّوا مكاوي حاميه
ياما برئ من جورهُم يسبح ويغرق في دِماه=وعصُبة الشيطان تمسي في الشوارع ساريه
باعوك يابندر عدن بالرّخُص ذي ماشي كماه=ويوم جاء حل الشراء صارت ثمانك غاليه
حطّوك مِثل المأدُبه كُلّين يوكل ماشتهاه=والنمل والجِرذان تنهش في العضام الباقيه
غلطة من الرُّبان غامر قِد تمادى في هواه=قاد السفينه للغرق وانقضْ عود السّـــاريه
من بعدها سلّم حباله واستمع همس الوشاه=واصبح يراجع في كشوفه والمخازن فاضيه
العيب ماهوه بالخطاء العيب من يتبع خَطاه=ومن يخزّم في حِذاء غيره ورجله حــــــافيه
ومن رهن جيشه وحطّه في مضاريب الرّماه=وصادها في العين من خُشم القصاب الحاميه
باقولها من خاطري باقول ماعيني تراه =باقولها يهوين من بعض الفعال الواطيه
ذافصل والثاني توكّل وامسكه حبل النجاه=قُرآن ربك حكّمه في كل ازمه طاريه
اِحذر تساوم اوتفرّط في طعامك والمياه=وعزْ نفسك وامتلكِها بالصفات العاليه
ولاتمُد اليد للمخـــــــــلوق دام انك كمــــاه =الرزق من رب السماء ينزل بحِكمه باهيه
والعون عون الله ومن يطلُب من المولى عطاه=ونعمة الله سابره وماســــواها فانيه
اُدعوك يارب الملا يافرد قادر في عُلاه=تضمُد وتجبُر كسرنا يامن صفاتك عاليه
والختم صلّوا عالنْبي وخُص له ازكى صلاه=عداد حبّات الندى فوق الغصون الراويه