والشوق لا يمكن مع الوقت ينزاح

[بن قطمان]

انا حسبت انك مع البحر ملاح
وطلعت ماتعرف أصول الملاحة

وخابرك يالشهم بالأرض سواح
تدخل دروب الشعر ساحة بساحة

وطلعت لي تجرح وتجرح وجراح
خبره معك والقسم كله جراحة

والناس يابن الناس في كل مرواح
ماحد معه يالشهم فالوقت راحة

تسري معك مسرى وبالصبح مسراح
والبعض في راحه مع الاستراحة

عساك طول العمر في شوق وأفراح
طاب الفرح للخل طابت فراحه

وبعد ذا ياطير مفروش الاجناح
والشوق هز ارياش تحمل جناحه

مايوقف إلا لو طرح غيث ورياح
واحيان يسرع يوم تكثر رياحه

شل الرسالة جد من شخص مزاح
والعشق خلا الصدق يشبه مزاحه

بلغ تحياتي مع عطر فواح
للي لهم بالقلب رغبة وفاحة

يا غبن قلبي من زمن فالهوى راح
والادمي ماعاد يحسب مراحه

عدا على تاجر وعامل وفلاح
والتالية موسم بري الفلاحة

والشوق لا يمكن مع الوقت ينزاح
والمال وحده قابلا للازاحه