وانا المهيمن وفارسها وعفريتها ((مرسله للشاعر الكبير طالب بن حسن باتيس النعماني))

**يسلم صالح بن عكعوك** · 12-16-2010, 03:52 PM

بسم الله الرحمن الرحيم

السلام عليكم ورحمة الله وبركاته

هذا القصيده مرسله للشاعر الكبير طالب بن حسن باتيس النعماني

احلمت بارح تلوله حلم ورّث سهر = بغيت فسره مثل احلام فسرتها
واعجزت مالقاله التفسير ياللكدر = الذاكره خاربه عندي وانا اهملتها
ولعاد فكرت قلنا الوقت كله عبر = محسبت ان عادني بعوز لنبراتها
عند القروم النشاما مكرمين الدفر = باشل قسمي كماهم وقت سمراتها
الشيب مثل عليها والنكد والذجر = واسلاكها شوطت فتكت بكمراتها
صور بها صورة الوردي ترده حمر = وترد لبيض سود من ضعف حجراتها
ياهوين ياليتني عالجت قبل الكبر = ماليوم مسوا الخساره يوم عالجتها
عالج وعالج وتما ضعفها مستمر = عند الدكاتر وحتى الكي كويتها
ولعاد شي فادها لنبير فوق الخطر = لاراح ماراح ماينفعك ياريتها
علاجها قبل تضعف يطرحون الصبر = وبايصون النضر بتشوف من ذاتها
الحمد والشكر له عدت حروف السور = وعد نبت الذره وعد حباتها
لنسان في تالي سنينه يجيله خبر = اما خبر زين والاخبار هفواتها
يالله تستر علينا وانت رب القدر = احجب علينا من الزله وعثراتها
والذكر يبقا لنا ياضي تقول القمر = ياساتر استر من الغدرا وضلماتها
وبعد مرحب في الهاجس وصل لسمر = يبدع قوافي ولاشي نقص عدلتها
منشان ينظم بيوته مثل نقح الحجر = وان جات كسره في الميزان ساويتها
بغيت راسه يضل مرفوع بحرن وبر = ماباله القاصره قدني تحاشيتها
ابغاه يبقى في العالي بروس القور = حتى ولابي مواجع منه خبيتها
وان جابلي مشكله اقول مابي ضرر = وان سبب اجراح لي بالصبر داويتها
وان قال انا فارس الفرسان مزرور زر = من فوق لدهم على الصهوه تعليتها
نصبت نفسي ملك كسرا وبيدي وجر = وانا المهيمن وفارسها وعفريتها
قلناله السمع والطاعه لبالك خبر = لاكن جفّر سيوفك شفك سليتها
خلك مسالم وخل القزعله والقور = وصل خطيبتك بنت العم في بيتها
ام الجعود الطويله واللباس الخضر = ماباك تقسى عليها لنت حبيتها
شوفك مراهق ومتنحوي وبيدك حجر = بتضر صهورك وباتقضي عى صيتها
بغيت بنصحك مابا الضر لك تنحشر = وتكون تسرح مع الجوده وضويتها
وتكون تعرف محرم قبل يدخل صفر = وتعرف الجاده لو كنت ضليتها
من بايناصحك غيري يالزعيم العسر = والصقر حساس متغره كتاكيتها
قولو لبو راضي الصمصوم لا تعتذر = ابغا جوابي في السرعه لمبديتها
هاجسك ضالم كما هاجسي لازم نقر = انته وانا قد شربنا دلو من هيتها
كلمه صراحه تجي منك وانا بنتظر = ان جات قهوه عسل صافي تقهويتها
وان جات ماهي عديني منها بعتذر = باقول مالي وللقهوه وجنبتها
ولعاد بعتب على قهوة جليل العجر = بو راضي الجيد ماهو من فحاتيتها
ولد ال بالخير معروفه رمات الضفر = سالم بن احمد وبو راضي رفع صيتها
ماقولها كذب قولي مثل نقش الحجر = واقوال شعار قبلي منطفا ليتها
الحمد لله فالسبعين عمري عبر = ولعاد بظلم وراد الظلم طويتها
والختم يالله جنبني دروب الوعر = وامحى خطايا بسابق عمري القيتها

يسلم صالح بن عكعوك بن غانم

16 \ 12 \ 2010م

**الواقعي** · 12-16-2010, 04:16 PM

يا ساتر استر

تسلم وتعيش يابن عكعوك

تحياتي

**سالم علي الجرو** · 12-16-2010, 04:27 PM

كم تمنّيت أن تكون: ( .... المهيمن وفارسها وكبريتها )
أحسنت يا ابن عكعوك

**أحمد العمودي أبوفيصل** · 12-16-2010, 05:22 PM

العم يسلم بن عكعوك
امتعتنا بهذه القصيده الرائعه من شاعر رائع
في انتظار ردابوراضي دمت بالف خير
تحياتي

**صبي العول** · 12-16-2010, 10:11 PM

صح الله لسانك يالشهم
ومنتظرين رد باتيس

**حصن باجيف** · 12-16-2010, 10:15 PM

قصيده مزلزله من العيار الثقيل يابن عكعوك
ومنتظرين جواب بوراضي دمت بالف خير
تقبل تحياتي

منيف النعماني · 12-16-2010, 10:58 PM

كلام منقح يابن عكعوك وشفرات لن يفكها الا شاعر بحجم بوراضي وكما يقال ماللحديد الا الحديد مترقبين جواب بوراضي حتى وان تاخر لان السيل مايبطي الا من كبره ,,,

تقبل مروري ,,,