ياخوي هذا الوقت وقت أهل السفـالة والسفل !! قصيدة

[جمال العطاس]

كتبت هذه القصيدة قديماً . وهي تحاكي وضعاً إجتماعياً متردّياً !!

ياخوي هذا الوقت وقت أهل السفـالة والسفل = وأهل الرذيــلة وقتـهم هذا ..قبيحيـن الفعــال
أهـل الفضائـل مالهم ياخوي قيـمـة أو محـل= ماحد يقـدّرهم ولا مـدحـوه قـالوا .. بن حـلال
اللي يخاف الله تقــول النـاس عنـه ..ذا هبـــل=لاجاء لهم قالوا المغفل جاء ولايعطوه بـــال
وإن قال كلمة حق قالوا شوفوا المهبول ضل=عنــكور أبــوه النـذل يتجرّا علينا وإستطال
واللي معه درهم يقوموا له إذا جـاء أو قبـل=حيّا وسهلا ..مرحبا بك عنــدنا ..أرحب ..تعــال
يـاكم وكم ســافـل ومتـهـتـّك ودله خس دل= يـمـلك دراهــم مالــها تـــالي يدحّيـها جبـال
من قـل مابيـده بعيـن النـاس في المقدار قـل=كمّين سافل بالدراهم صار من خير الرجال
كلمته لاقـد قـالـها أحلى من أقـراص العسـل=يسمّحون القول ذي قــاله ولوهـو خس مقال
كمّين ضـانه مقْـرِشــه القــرش خـلاها جمل= ضانه وصارت هيـج يهـدِر مايبالي بالعقال
لبطه ومتمحذق ولايسوى ملا مروّض جحل=لايفطن الهرجه ولايعرف تفاصيل القــوال
لولا الدراهم ذي معه ماحد على سعـره سأل= لولا الدراهم مالحِق عرشِه تظلـّه أو ظلال
قِل الدراهم قـال شـاعـر هـم ..وقــد قـال المثل=اللي معـاه ريال يسـوى عند خلق الله ريال
والحاصل ان الخُلُق بين الناس ميزانه إختل=أخلاقهم صارت مجرّد رِبح وتجاره ومـال
همّتــهُم الـدنيـــا وخـلـق الله تتســابق هشــل=وبيــوتهم خِــربت ولاشئ منهم حتى سؤال
نسوانهم مثل البقر ذي هن في الشارع همل=قال المثل حرمه بلا رجّال ..بقــره بلاحبال
وأولادهم تِدشـُر ولا حد قال لأبنه قـُم وصل=ماتنشد الآباء على الـزقـرات مره والعيال
الــزقــر بالجوّال يتغــزّل وراكب إكـــس إل=قصّته كابوريا وبعض أحيان كاشخ بالعقال
سيــارتـه تهتـز من صوت المسجّـل بالقــلل=وصاحبه يرقص على الكرسي وهو في خس حال
والبنت بالرميّه وسط الأسواق تمشي بالمهل=تمــشي وتتــلـوّى تزاحم ماتخلي لك مجال
والأم ماهي داريه باللي جرى واللي حصل=ليله سـرت باتحضر المــلكه وليله بإحتفال
وإن جيت باتنصح أبوهم قال : ( شـاغلنا العمل)=وبعضهم يحنق ويصبح بينـك وبينـه قتـــال
ماللنصيحه عند بعض الخلق موضع أو قبل=والــديـن أوصى بالنصيحة بيننـا أكـّد وقـــال
وختمها يارب تكفــانا البــلاء ذي قـــد نزل=والفي صلاة الله على المختار ماحط السـبال

[باغوزه]

رائعة يااخى جمال العطاس . واجتهادك وسعيك الحثيث لابراز مثل هذه القصائد التاريخيه ينم عن وعى وحس مرهف . فالف شكر سيدي الكريم .

[حاتم الطائي]

مبدع يا أبا هانئ كما تعودناك
قصيدة بالفعل تلامس الكثير مما نعايشه وفيها من الابداع الكثير

صح لسانك
ودام عطاؤك

[عبدالله الجعيدي]

قصيدة رائعة بروعة قائلها تحكي واقع مرير للاسف الشديد سبق وا استمعت منذ فترة طويلة لمقتطفات من هذه القصيدة بلسان كاتبها . شكرا لك ابا هاني فدائما انت مبدع . تحياتي

[حسن البار]

الحبيب جمال :

معاناتكم نعايشها ، ومن خلالكم وصلتنا بهذه الصورة الأدبية الشعرية الجميلة .

ولها لإن شاء الله آذانا صاغية . والأجر والموثبة لكل من ساهم في تصحيح الاخطاء . والرفعة والسمو لكل من عرف اخطاءه فتجنبها ...

لعطائكم شكري . ولمواهبكم اعجابي

[الفارس الهاشمي]

شـــكــــــــرا جـــزيـــلا

[شيخ القبايل.]

القصائد التي تسعى لابراز سلبيات المجتمعات وتدعوهم الى مسالك الخلق الكريم هي دعوة لوجه الله خالصة محضة
فجزاك الله خيرا

[خالد بن مهنا]

شكرأ ياستاذ جمال على هذه القصيده الرايعه والابداع المتميز
وكثر الله من امثالك
تحياتي****************