فيه مثل قديم يقول:لا تنسى تكلم المرور

[المدودي]

فيه مثل قديم يقول :
معك ليسن .. معك ملكية .. ما يكلمك المرور
وانا معي ملكية .. ومعي ليسن فيه كل الفئات عدا فئة الدبابة والطايرة
طبعاً الليسن وارد ( مناخة ) ـ عقبة على طريق الحديدة ـ ..
كل شي فيه كذب ماعدا صورتي واسمي الأول .. والباقي حطوهن هم وفكوا عَلَي .
المهم قدنا معي ليسن .. وماشي حسب القانون وحسب قواعد المرور
لأنه لازم على كل مواطن صالح احترام قواعد المرور وإشاراته و سياراته وحركاته ورجاله وعياله وعيال عياله وآله وصحبه أجمعين ومن تبعهم بإحسان إلى يوم الدين ...
أما بعد...
ولعلمكم قبل ما سويه كل يوم يطبنا واحد , وامات ثلاث ميه تتخرمع من الكيس ـ طبعاً حق المخالفة ونعوذ بالله من سوء الظن ـ
ومن بعد ما سويته وانا مرتاح البال نمشي وانا مستامن ... ماشي كما النظام يفك على أهله !

قبل ما حرك السيارة نتفاقدها : البترول , السليط , الفلتر ، الكفشه ، الهاتات ، الاسطب , لمبة الريوس , الاستبنا , كل صغيره وكبيره حتى الغطية حق والات الكفرات.
بعد ما نتأكد من سلامة المركبة ـ مهم حسب ما ينص عليه قانون المرور ( 2412/ ك ذ ب ) ـ نتوكل على الله ونتحرك واحد واحد , من القير الأول للثاني ، ومن الثاني للأول , الثالث والرابع نيو , ما قد استخدمتهن من قبل لأننا ما حب الخبة , ولأنه فيه مثل قديم يقول : لا تسرع يا بابا ماما تأخذ غيرك , وأخر يقول : في الـتأني السلامة والعجله من الشيطان , والأوليين قد قالوا : بِط .. تسرع .
ولو شي قدامي سيارة ما نلبق وراها كما بعض المتهورين .. نخلي خمس مية قدم على الأقل ـ حسب ما ورد في قانون المرور البند (625/ ط ق ع ) ـ
ولا قدنا بالف نأشر بالهاتات من بعيد .. بادخل مطراق نضرب هون .. ما نتعصب ..ما نتلفت الا قدامي .
وإذا بغيت باوقف ما نوقف في الخط ونعطل على المركبات الباقية .. لأنه فيه فقره من ضمن قانون المرور تقول :
إِذَا أَرَدْتَ أَنْ تُوْقِفَ المَركبَةَ فَلا تُوْقِفْهَا فِيْ الطَرِيْقِِ ، وإِنَّمَا فِيْ المَكانِ المُخَصَصِ إِنْ وجِدَ ، حِفَاظاً عَلَىْ سَلامَتِكَ وَ سَلامَةِ الآخَرينَ .
وفيه مثل يقول : بعد من الخط وغني له..




وإلى ما قبل أمس كانت في عقلي لوثة فكرية وكنت فاكر أن قانون المرور يجب على الناس كلهم إتباعه والمشي عبره ....
واتضح لي أن كل الناس ماشيين (عليه )
ـــ
ـــ
ـــ
ـــ
ـــ
ـــ
ـــ
ويسيرون ( فوقه )
ــ
ــ
ــ
ــ
ــ
وحاطينه تحتهم ..
وانا الوحيد اللي كنت ملتزم به ...
أمس حصل لي موقف قزّيت النظام ـ حق المرور من بعده ـ لما كنت ديخل قدا السوق وفي زحمة السيارات, فجأة توقف الخط والسيارات قدهن : ديد ديد , والمرور قيم عند أصحاب الخضرة وما هو فاكر بشي .. والسيارات ديد ديد , فان فان .. ولا شي فايده
خرجت من السيارة ـ لأول مره في حياتي نخرج من السيارة وهي في نص الخط ـ وقلت أكيد فيه حادث قدام وموقف الخط
خرجت
بسرعة


لا..لا



أوه



يا الله
فيه سيارة شاص بدون لوايح هي السبب في اللي حصل من عرقله
وفيها :

واحد

مشعنن

راسه منفوش

مطفي

السيارة





وينخّش أذنه بالقفل....
والمرور ما شافه طبعاً لأنه لو شافه
الله يستر
ما بايكلمه .!
وعندها تذكرت المثل القديم اللي يقول :
معك ليسن ... معك ملكية ... ما يكلمك المرور
وقلت من الأحسن أن يكون :
شعرك منفش ... وسيارتك بدون لوايح ....أنت المرور ومسموح لك تعطيل حركة المرور .. وعلى رغم أنف أصحاب المرور .

ملاحظة : لا أقصد النزيهين والمخلصين في عملهم ,وإنما أقصد النزيهين من الإخلاص في عملهم وكثير ماهم في هذه الأيام.;spl ;spl ;spl

[شيخ القبايل.]

احسنت يالمدودي ..

[الشعف]

بسألك يالمدودي ..
وراك تخزن ( اقصد تخزن قات )
ان كنت ماتخزن مصيبة.. وان كنت تخزن فالمصيبة اعظم

منين تجيب ذي الهدرة ؟؟.. حتى المخزنين مايجيبون ربعها ... شكلها مرقنة قوييييية ....

بس الله يقول الحق ... شفك تجيبها في محلها سوى,,,,,

[المدودي]

كل شي إلا القات
مش هو السبب في اللي نحن فيه ؟؟؟
مش المثل يقول : لو وقفك المرور من دون مخالفه .. شفه يعني بغى حق القات؟؟؟

[ابن الأحقاف]

كم با تســــــــمع وكم با تشـــــــــــوف!!!!!

ويا كثـــــر اللخبطــــــه والشعانيــــــن في كل مطراق ولكن ما شوف
شي سوق يالمد ود ي على المشطــــــه

وكلٍّ بشنّته يفقع وخل يدك في جيــــــبك ولعاد تمحق نفسك
تخرّج رخص ولياسن ؟؟؟؟؟؟؟؟ شعنن وامش ****