بو عامر وكبش العيد / مدودّيات

[المدودي]

العام لاول
كما الوقت ذا

خرجت انا وبو عامر من المسجد بعد صلاة العشاء .. ودار بيننا الحوار التالي :
: بو عامر ذلحين عادك ما بغيت تعقل ؟
بو عامر : ليه حد قالك مكتوب في الجواز حقي مغروووووووووووم ؟؟
: مش كذا ... ذلحين انت سمعت لي يواضع آه قال .!
بو عامر : لا والله ... أصلاً انا خذتنا عيني ونمت .. ليه آه قال ؟
: قال ان الراس لي ذبحته أمس ما يعتبر ضحيّه .. الضحيه تقع يوم الزينه ولاّ ثانية العيد ... المهم حق امس ماهو ضحيّه
بو عامر : والحل ...؟ ما ذلحين كذ ذبحنا ..
: ما هي مشكله ذبح ثاني مره .. أن تبى السنّه
بو عامر : اول ثانية العيد وما بعدها كل يوم في عزومه .. وماحد خلي يذبح ... و نهار الزينه فين با تحصل حد يذبح لك .. وانت كذك عارف انا ما اشور ..;gra .. وفوق كل ذا لازم نشتري كبش زين كما لي ذبحناه أمس ..
: ولا يهمّك .. بكره با روح ويّاك لا سوق الغنم .. وبا نخلي بو علي ـ دلال في سوق الغنم ـ يدور لنا راس زين ... والذباحه برضه عندي .. بعد العواد با نرجع لا الدار و با نشخط لك الراس وبا نتبتبه زبن ... آه قلت ؟؟
بو عامر : فوقه ..المهم شفك لازم تقع عند كلمتك و نتشاوف غدوه


و قبل ما تشرق الشمس كذ بو عامر مركوز تحت الدار مساهنّا .. و غبشنا لا سوق الغنم ...

سوق الغنم .. و ما ادراك ما سوق الغنم زخي وعكران .. وروايح الدمان تفوح في كل مكان .. كل الناس لي في السوق غبران .. وان كانك تفند وجه حد .. و زحمه .. ذا لي ينتر بكراعك .. وذا لي يدقّك في لحيك .. وذا لي يهرس رجلك .. وذا لي يصقع لك من قفاك حاسبك صاحبه .. المهم نحن قصدنا نحصل بو علي..

وبالشِدّه والنّدّه .. شفنا بو علي

: السلام عليكم ..
بو علي :;kai عليه تسعه وسبع ميه بغيته ولا الله يفتح عليك
;kai
: السلام عليكم يا بو علي .. رد علينا السلام .. با نحصل عندك كبش زين
بو علي : ;fl عندينا ما كلمك .. قولك عليه تسعه وسبع ميه .. بلا طفش ...................... آه .. وعليكم السلام .. يا خي ذا واحد حاسبينه مشتري .. ينّه طلع واحد متهنتك .. ذلحين أه طلبك ؟؟
: بغيناك تدور لنا كبش زين .. وتضويّه معك لا دار بو عامر .. نحن ذلحين انكمتنا من العكران وما فينا آله نكاهم زحمة السوق .. المهم دور لنا واحد زين .. والقيمه ما هي مشكله
بو علي : أبشر ـــ ;fl شفك ثقّلتها يا ثقيل الدم كيه شله بتسعه وفك علي ولعاد تروينا صورتك ;fl ــــ ( بو علي هو وواحد من المشتريين )..



وما قصر بو علي جاب الكبش على حسب الطلب لا دار بو عامر



رصنوه في الميسمه



نهار الزينه بعد العواد جيت لا دار بو عامر



بو عامر : وينك مساهنك من قبيل .. كذنا الا حوشت
: يا خي قطعوا بي المعاودين .. يالله بسرعه قرب الكبش والشفار ...



جابوا الكبش ............. لبوه الهاله أكبر منّي



: كنك مسك على رجيله ويدّاته سوى
بو عامر : معاد سيبك ..

وحين بطحنا الكبش .. وقبل ما اشخطه ...



عطا فلخه من يدّات بو عامر .. و ساااااااااااااني لا باب الحوش .. ومنّه للشارع

وكذ نحن نخب ونهشل وراه ... و من كثر الخيخيه بدل ما البس الحذي في رجيلي حطيتهن في يدّاتي

وخبه .. ووراي بو عامر


من شارع لا شارع .. ومن مطراق لا مطراق

والكبش خبه .. ما شي يرده .. ولا يعوّل من لي قدّامه

الناس قالوا الجماعه ... قبع الوال عليهم

والكارثه ... وقعت حين دخل الكبش لا المسجد

والناس مسا هنين صلاة الظهر تقوم .. وكبش القدره دخل للمصلين ورعدهم .. وتوووووووووووووووووه حصل باب المناره مفتوح وطلع بالرقاد ...

ونحن من بعيد ما درينا الا بذا ـ الكبش ـ في راس المناره

دخلنا للمسجد حصلنا المصلين في كلفتهم


ذلحين با نطلع بالرقاد .. فزعانين لعاد ينطح نحن .. ولا هو الكبش يفزع مننا وينتحر من فوق ــ يا غير كذها مُوته .. والكبش كبش آه تقبض عليه ــ


والقصد خشّبت عند باب المناره .. وقلت لبو عامر صٌلق في المكرفون ..

وبو عامر لقّى حيّة من لا يعرف .. صلّق بصوته كلّه ..
خلا الكبش نزل مصوري .. ولعاد درى وين يوخذ

وبسرعه تطنّحت في رقبته .. وسحبلت ابوه ـ الكبش ـ لا برع المسجد وشخطّه

والناس يتنصّفون في وفي الكبش .. و بو عامر طلع ما سيبه ( قالهم الكبش ما هو حقّه ) ;baw ;baw


[poet font="Simplified Arabic,7,red,normal,normal" bkcolor="" bkimage="" border="none,2,gray" type=0 line=200% align=center use=sp char="" num="0,black"]
ومن العايدين
[/poet]



[poet font="Simplified Arabic,5,red,normal,normal" bkcolor="" bkimage="" border="none,2,gray" type=0 line=200% align=center use=sp char="" num="0,black"]
وكل عام والأمة الإسلامية في خير
[/poet]