مسابقة بن شريشر للشعر الشعبي الحضرمي لشهر أكتوبر 2009 م

[طويل بن عامر]

قال من قد شل زاده وأعتلى في راس قاره=من سعف للوقت بايسقيه من حالي وقار
جيتكم من بعد عاني جيت ناوي عالصداره=بادخل وسط التنافس مع طويلين العمار
لجل موروث الحضارم ماهو لشان التجاره=والله أني ماحسبت المال وجيوبي كبار
الله اللي قد عطاني ماكسبته بالشطاره=أحمده وأشكره عانعمته في ليل ونهار
والقناعه ثوبي الغالي معه ماشي خساره=مقتنع حتى ولو ظليت في راس العصار
جيتكم بندقي بيدي لجل با أقدح شراره=لأن ميدان التنافس ماعطوا له أعتبار
شوف شعار السقيفه كلن إتزبن بغاره=مادري هل هو تجاهل أو سبب قل السبار
وعادها عندي قضيه أشعلت فالجوف ناره=وايش بايطفي لهيب الجوف لي هو شاب نار
نار حمراء جابت الضارب لراسي والحراره=في رباع الجسم وأسقتني على بارد وحار
وش تقولوا في محمد لي تغرب في دياره=وين غادي ليش رايح كلما دبر وسار
زيد عالليسن سأل وعبيد يطلب لستماره=أسأله من كثرها تحسبه داخل قندهار
كلها من شان حق القات أو حبة سقاره=ماهو لشان البلد لي أصبحت شبه الدمار
وعنده أرضيه قديمه راح حصلها عماره=وان نشد هذي لمن قالوا لواحد من ذمار
بطل واضح يوخذوا حقه وهو غافل بداره=والقضايا واجده داخل ملفات العقار
لا إداره للمجالس . لا محاكم . لا وزاره=كلها فوضا بفوضا بينها ضاع القرار
أصبحت أرضه قذاره بعد ماكانت حضاره=حين دخلوها البهايم لي يمضغون الشجار
حق ضايع . أمن فالت . جو متراكم غباره=يالله إنه ينكشف لي خير من تحت الغبار
الحقيقه دايما مره وزادوها مراره=لي لها إتنكروا تحت ألف معنى أو شعار
لي رموا لحم السمينه تحت أولاد الجعاره=ينتشونه . بعدما ربيوا على قحي الفقار
والعذر إن كانني عن مشهدك زحت الستاره=يالذي تبغى تغطي الشمس في ظهر النهار
وختمها من لانشد عادم بن عمه وثاره =موته أبقى من حياته قلتها والثار ثار

وسلامتكم

تمت لقائلها / منيف بن عيظه بن سالم بن منيف النهدي
في 25/10/2009