ياخالق الانسان

[سبع الليل]

ياخالق الانسان وخالق له المسامع والبصر=سالك بحق ياسين تغمرنا بجودك يابصير
بامرك وتقديرك طلوع الليل وطلوع القمر=والامر والتصريف بيدك ياعليماً ياخبير
صلوا على طه عدد صاري في الغبه شمر=وعد مادارت كواكب في سماها تستدير
سلام من شاعر لكل غايب وكل حاضر حضر=من عند سبع الليل لي بيت يقلب في النظير
كل ما نكش ورقه يقابله الخبر تلو الخبر=اخبار ما تفرح تخلي عقل كل عاقل يطير
الارض اذا اهتزت تنافضن المعاتن والستر=والبحر لا قد ثار بامواجه يدفرها دفير
البارح المغرب سمعنا صوت من وادي عمر=حرمه لها سنتين لازفرت ولا جاها الزفير
وعادها الى اليوم بتعيش المخاطر والخطر=شربت من القاطع ومن نخب الحورور والحوير
وعادها قصه عجيبه بين قصاص الاثر=اربع ميه يمشون وستعشر على ظهر البعير
والمؤلمه تضغب ولا واحد تخبر او نظر=ولا جابوا الدكتور يفحصها ولا جابوا خبير
خبوا قفاء الدنيا وزروا عالحزامه والكمر=وأم الولاده عادها في حرحره ما هي بخير
شي يعتبر ياسامعين الصوت وشي ما يعتبر=نصله لها منظر حسينه جردوها من الجفير
لي باع بنته بالبقش بيت وبايصبح بشر=يستاهل الا ذا وخس ذي ما يشاور ويستشير
بعد العب رجعوا يزرون العمايم والعصر=لو هي بخيرتنا بغينا الحكم يسقط والوزير
الدار والديره بلا عاقل ولا فاكر فكر=كلين يهمع ما يفند بين منكر والنكير
وشوكت الميزان مسيوله وعارضها انكسر=اربع كفف متميزه والخامسه قسم الفقير
والشيخ متريش ومتنغنغ وعاقرصه جمر=اما البقيه بغاء لبوهم كلهم مثنات بير
بالجوع والحمى وظلم السمسريه والتجر=جالون ريما بالف لا صارت ولا ظني تصير
لولاء الحياء واللوم بانوكل من اوراق الشجر=احسن من البسكت ومن منقاء وسط حلقي مرير
سنين واشهر باتعدي والجماله في صفر=صفارت الانذار باتصفر وباتلقي صفير
كل من سرق والا نهب مال اليتم شرعه قصر=والكذب ياالاخوان مايوصل محل حبله قصير
ماغير باندعي الى الله باينسم كل عسر=ويصلح الاحوال بين الناس في الوقت العسير
ولي بغاه الله حيابه معاد شي بالخًير=ولي يحس بالظلم والباطل لربه يستخير
والختم صلو عد مامركب في الغبه بحر=وعد ماالاسماك لي في غبت البحر الغزير