رقم 52 .
الشاعر الكبير المعروف أحمد محمد باقديم السيباني تناقلته وسائل التواصل الاجتماعي بسرعة البرق . حقا لم نعطيه حقه , شعره الراقي يفرض نفسه بقوة على ساحة مجتمعنا لمافيه من جزالة وقوة وسلاسة ,شعر يعبر عن همومنا وحالتنا وماوصلنا إليه , كل الشكر والتقدير لهذا الرجل الراقي المتمكن الجزل في شعره والسلس في لفظه والهادف في معانيه .
(قصيدة الشاعر الكبير المعروف أحمد محمد باقديم السيباني حفظه الباري !).
الله أكبر كبر والشام هلَل وكبر = قل لبشار شل قشك من اللاذقية
وأعتبر شط الى حسني وشط لامعمر =وانظر البن علي ذيهو عطاها السرية
والمشير اعتجن في بادي الامر كور = قال مابارحل عندي لكم بلطجية
حاصروه القبل والدم يصبح مطير = شي بأرحب وشي بالمعجلة والسخية
والحبيلين معصوده وابين ولودر = منهم تسمع الرشاش والبندقية
والصيح من تعز تنقح ومن خور مكسر =قال ماشي لها إلا الحكمة اليمنية
خرجوا امبادره تحفظ حمد مع مطهر = والسلامة بها للحاشية والبقية
باتنازل عن الكرسي وسيفي مجفر =واقبضوا عهد مني ماتجيكم أذية
والجنوبي يعين في جعيفر وجعفر = ذي من القافلة شلوا عليه المطية
والحراك اكتفت في الشحر ولعاد نفر = يصبح الصبح في روكب وروَح عشية
قل للعبد طبل ماتسمع خوك زمر = مابغى يندفع عن عادته الاولية
والعروبة تعاني كسرها ماتجبر = منفعتها القمم في الجامعة العربية
أين نحن من العمرين في الخير والشر ؟= والخلافات ذي فبها الكفف بالسوية
عدلهم شاع بين الناس في البحر والبر = من مدينة رسول الله لى اسكندرية
لأولي نام تحت العلب وغطاه محسر = والخري قد بكى لما انطلع عالوصية
والجماعة بغوا الكرسي باي أمر يذكر = لو يقع قتل ويموت الثلث في الرعية
عينهم لامن الدولار والتبر لحمر = والفلل والمواتر والقصور العلية
قسموا البحر والبترول معهم مصدر = والخامسي لهم والمكرمة والهدية
وأنت ياالشعب لالحقت الذره والمعصر = مالحقت الثمد موجود والهوملية
صح وغفل لقه مطلع وميتين مندر = ماتحلق إذن تنصت لك ولا مرجعية
ياسريع الدرك يسر لنا ماتعسر = وأصلح أوطائننا وديارنا الحضرمية
ذي معاناتها زادت عن الحد وأكثر =شي نعانيه من معطي وشي من عطيه
حظها عاف لاصعدت في الشعب حدر =حدرت هو صعد للغاظة الصاعدية
ماتلحق دار في وديان دوعن وليسر =لولا لها مغترب مرشوخ في الخاسكية
هاجرو منها والصفو فيها تكدر =والفرح غاب والولهات غابت عليه
والشباب انكسع عالتفزون المشفر = في الجزيزة يشوف القتل والعربية
حد يصاعط على ميت وحد عا مكسر =والخواجات مابهم فشطة المقلمية
كله الجعث والدق والدقيق المحضر =في ديار العروبه والحصون القوية
يالله احفظ حصون الجود لايلافها شر = ذي بها قبله المسلم ومسجد نبيه
ختمها بالنبي ذي خصه الله بكوثر = من صباره عسى نظفر بشربه هنية
دائما رائع يا حنطبه .
تسلم على هذا النقل البديع .
تقبل مروري وإحترامي يالغالي .