لعل المانــع خير

[سالم علي الجرو]

لعل المانع خير
حينما تأخذ جولتك المعتادة في فضاءات السقيفة تتذكر أياما مشرقة خلت وأدمغة وأقلاما وحراكا ثقافيا , تسليك مقالاتهم الدسمة وطرافهم الهادف .
تصور اليوم في خيال عاشق السقيفة , العبد لله , الصقر مسرور والأستاذ السيد جمال العطاس ومجنون ساه , محب حضرموت , خفيف الظل , العميق في كتاباته , المرح ( أترك لكم تحديد اسمه ).
من نكاته:

اقتباس : المشاركة الأصلية كتبت بواسطة باغوزه [ مشاهدة المشاركة ]

بصراحة من كثر ما انا متسمر امام النت والتنقل من قناة الى قناة ومتابعة خطاب الزعيم الليبي اول باول وقبله خطاب الرئيس المصري اول بأول ولحظة بلحظة ومن قبله ايضا خطابات بن علي لدرجة اني حفظت تلك الخطابات حفظ . لكن البارح بعدما لفيت لفه على القنوات ومعاد شفت فيها شي الا ( الاعادة ) قلت ياوليد معاد لها الا النوم بكرة جمعة وراك بعد الصلاة متابعة ميادين التحرير في اكثر من 4 دول ونمت بصراحة تعبان هلكان ساعة في ليبيا وساعة فى تعز وساعة فى مصر وشوي في المنامة ووصلنا حتى سيئون رحت فيها نووووووومه عن جد . وبعد كذا ايش اللى حصل في المنام ؟ تعالو نشوف رأيت ياجماعة باغوزه رئيس جمهورية اسمها جمهورية الجرغوزه الديمقراطية ( مشتقه من مؤسسها وباني نهضتها الزعيم الجرو جد جد جد الاخ سالم الجرو وجد جد جدي ماريو باغوزه . واحلم اني لي 18 سنه في الحكم وما اسمع الا بهتافات الجماهير تحت الدار حقنا في ساه يهتفون : الشعب يريد اسقاط النظام .. ياباغوزه غور غور .. شل نفسك خلف دور .. وبصراحة الشعار اللي زعلني .. ياباغوزه لعلّك نبشه .. باترحل والا بالكمشه .. آخرتها ياباغوزه بايقع لك بالكمشه في راسك ؟؟؟ والله اهانة مابعدها اهانة . وشوي ياجماعة ماشوف الا والحذف بالحصى والفقاش في الخلاف حق الدار . والمهم شرفت عليهم من خلفه حق اكرمكم الله حمام وان هاذولا قريب 20 الف متجمعين باعلامهم وراياتهم ولافتات كتبت عليها ( ارحل ) ( انقلع ) ووحدة من اللافتات مكتوب عليها ( قطعت بنا باتروّح والا باوصل الحرمه للغيل وبرجع لك ) ولافته ثانيه مكتوب عليها ( وبعدين مع اهلك ؟؟ ) واما اللافتة اللي بصراحة لو شفت لى كتبها بحرقه اللى مكتوب فيها ( سمع ها ؟ اللواكه حق أهلك خلها مابايبنفعك سالم الجرو ) والمهم فرشت لى فرش في عطفة الرقاد في الدور الثالث وغطيت نفسي بمكيل . وشوي والاخبار انتشرت ان باغوزه بايلقي خطاب مهم واشوف نفسي في المسيلة المحتشدة بملايين الناس ( ميدان التحرير حق ساه ) والله لو جاء سيل بايكرف بوهم كلهم لقبر النبي هود .. المهم اوباما يتصل وجوبيه يتصل على الدار ولكن قلت للعيال ان احد دلا على التلفون بكسر ايده والتلفون مايهداء وعمر سليمان اتصل ومارديت عليه والثاني هذا حق روسيا عمرشحوف ماادري ايش اسمه اتصل وعمرموسى يدقدق من الصبح ولا عبرت احد . القصد ياجماعه قلت باتمحّى عفوا بتنحى خلاص اكثر من كذا ما اقدر اصبر لكن ياباغوزه نزل قدا المهاتيف هاذولا وهددهم وقلب وجهك عليهم يمكن يخافون ويرجعون في كلامهم ويمددون لي 15 سنه ثانية . المهم نزلت المسيلة وتحملت الضيم والظلايم حد يرشخنا بجزم وحد يحذفنا بجزمة وانا صابر وكل الصبر انى بغيت الجزمة الثانية تجي لكن الله يهديه معاد حذف بها عندي حذي مقطعة قلت باتوافق الجزمات وللاسف ان هذه الاحداث في المسيلة وانتم عارفين المساييل ايش فيها . لكن جزاه الله خير واحد اقترح علي ان نخطب من فوق النخلة ومالها الا النخلة وطلعت معاد وصلت الا فى السروال من كثر الحذف وسرقوا المحفظة حقي فيها 700 يمني وخطبت في شعبي الخطاب التالي : ياشعبي العزيز .. ايها الحشد الكريم ان هذال اليوم العظيم من تاريخ امتنا العظيمة وما اشوف الا والحذف زاد .. افتكرت بعدين ان هذي مظاهرات ضدي وانا فاكرها كما كل مره .. غيرت الصيغة ياملاعين الجدف .. ياسرابيت هذي آخرتها تلقون كذا في باغوزه اللي مابدا يوم بخل عليكم بشي ؟؟ تقومون تخربون وتكسرون البلاعة حق دارنا وتطفون المكينة وتسرقون الديزل وتدخلون زرب الغنم وتفكون الغنم في الشوارع ؟ هذي اخلاقنا ؟ لا ابدا هذي مش اخلاق ال ساه هذي عين وصابتكم عويله صغار يعطونهم القات يخزنون ويقولون لهم روحوا كسروا وحرقوا وفكوا الغنم حق باغوزه في الشوارع وطفوا المكينة حق الكهرباء عشان يوكل بوه البعوض ؟ اقول لاهلكم امسكوا عيالكم احسن لكم والا اذا حصلت واحد منهم بغنص لبوه . لازم تسحبون عيالكم من الشارع يضحكون عليهم يعطونهم حبوب الكركسه ويقولون لهم بتوا دمروا ونهبوا وسرقوا . لازم نزحف عليهم ونحاربهم دار دار .. مطراق مطراق ..دخش دخش.. .. زريبه زريبه .. الى الامام .. الى الامام ... من انتم باقول لكم ؟ هذي آخرتها ياسرابيت ؟ هذي آخرتها يا عيال شرم برم ؟ ياصفاصيف .. ؟ وما اشوف الا والنخله تهتز حوال 3000 نفر يزعزعون النخله لمان سقطت من راسها كما الخيل المقنوم حق التمر .على الارض ارتكزت من النوم وانا في حالة ابليس اعوذ بالله من الشيطان الرجيم . الحمد لله انه حلم . الله لايبارك في السلطة والله يسامحك ياسالم الجرو . بايقع ايه ياباغوزه من الخبخبه ورى القذافي لبوه قذفه الا كما هذا ومثله وقمت وصليت والحمد لله وتعوذت من الشيطان . (2) الحلقة الثانية : ياجماعة شكله ماهو حلم شكل هذا حقيقة لانى بصراحة بعد الظهر اليوم نمت لي شوي وماشوف نفسي الا ويرجع الحلم الاولي والناس هم ذولاك هم الناس لي حذفونا بالحصى والفقاش والمسيلة ملانه والنخله لي سقطت منها لكن الجيديد في الامر اني اتخيل الاخ سالم علي الجرو راكب على حمار اكرمه واكرمكم الله وجاي من قدا الغيل بعد صلاة العشاء ودخل السوق حق ساه وهو فاضي ومعه ميكرفون على الباتري وينادي بصوته كله .. ماعاد شي تخافو من حد .. شعب ساه مايموتش .. اتحرحرنا .. اتحرحرنا ... المجرم هرب .. باغوزه هرب .. باغوزه هرب .. وانا اقول في نفسي طيب يابو لطفي عادنا ماهربت وقدك تلقي كذا ؟؟ انقلبت علي بسرعه ..؟؟ وأشوف نفسي في الحلم اشاهد ناس متجمعين على واحد واقف فوق المسيلة حاط يده على راسه ويبكي قدام ملايين الشعب المتظاهرين في المسيلة بس المشكله المتظاهرين كلهم قاعدين ومتحوبيين تقول الا في شبواني والرجال هذا واقف ويبكي ويناظر فيهم بحسرة والم ودموع فرح وسألت على الرجال هذا من يكون هذا اللي لابس السباعية ؟ قالو هذا باشراحيل يقول : هرمنا .. هرمنا .. من اجل هذه اللحظة التاريخية .. ماعليه يابو محمد عادك السنه الثانية باتجي باتتخرف في ساه ؟ بارويك الهرامه حقتك . بانشوف من اللى بايهرم . لا ما خليت العويله يخبون وراك وانت تخب قدامهم وهو يصيحون عليك باشراحيل هرب .. باشراحيل هرب .. لاتسمينا باغوزه المهم بعدما رجعت للقصر نزلت نعد الدجاج لي عادهن باقيات حصلت 8 انسرقن سرقوهن المتظاهرين وسرقوا صارون بن علوي جديد بغيناه للعيد وكيس دقيق . قلنا مايخالف . وربنا يستر الليله شكلنا بانتمحى عفوا بانتنحى مادام صحابي قدهم يلقون كذا . وسمعت ان سالم علي دبر في طريقه على حماره بغاء رسب والريده بايخبر بمقرفونه . مايخالف ياسالم علي صح باغوزه هرب ؟؟ قاعد لك قاعد لك .

[الزين يفرض نفسه]

إن شاء الله يكون المانع خير

في غياب أستاذنا جميل الروح الأستاذ باغوزة

والكثير من الأساتذة والأخواة الغائبين والغائبات نسأل الله أن يطمنّا عليهم

ألف شكر استاذي الكريم سالم على هذه اللفتة الطيبة

دمت ودام بهاؤك ..