الفصل الثاني ..( العبر و الاعتبار ).. مساجلات الشعراء

[الشعف]

[poet font="Simplified Arabic,4,black,normal,normal" bkcolor="" bkimage="http://www.alshibami.net/saqifa//backgrounds/18.gif" border="ridge,2,gray" type=0 line=200% align=center use=ex char="" num="0,black"]
$$$$$$
*$$$( جمال العطاس )$$$*
$$$$$$
ذا فصل والثاني سمع هذاالخبر=من بايخابرني انا باخابره
وعادنا باقول له جملة خبار
الحصن ذي هدّوه في لحظه اندمر=واللي بنَتُه أُمه رذيله دامره
يستاهلوا والله كل هذا الدمار
الشيخ ذي وصّى عياله أو أمر=قرر على هدمه ولا حد آمره
شهدوا على التهديم كل طارش ومار
قالوا لصاحبهم بناحلّق وطر=وفوق ذاك الحصن فُك الطايره
من شاف ذا المنظر فقد عقله وطار
رجال كنده ذي تجرّوا عالخطر=ذي ماتهاب الموت تكسِرخاطرِه
لاغارت الصيعر في الهدّه خطار
غاروا على المبنى المخمّس وانفجر=و(كونداليزا)جات بنت الفاجره
ماتسمع الاكل ساعه انفجار
خلوك يالحمر تصقّع في الستر=وظهرك المكشوف ماحد ساتره
وخدعت يالضانه لهم تحت الستار
شبانك الحُمران ذي هم في قطر=والله بكره يركبون القاطره
شردِه ويمكن يسبقوا حتى القطار
لاشاهدوا في الجو حتى طير فر=تغدي قلوب الحُُمر ترجف فايره
وتشوفهم لمّا مخادعهم فرار
والشيخ ذي قاعد مع (أل..) عمر=يوم المودّه بين كنده عامره
وبين شاب القوم والشيبه عمار
والحاصل انه يوم مامثله عبر=ماشفت مثله في الوقوت العابره
وبالصمُل ردّوا لكنده الاعتبار
$$$$$$
*$$$( عمــر خريـص )$$$*
$$$$$$
يلي مسكت الشمس وحسبته القمر=مابايمر الوقت كله مقامره
باطل لعبكم لي لعبتوه والقمار
من قال لك ياطير في ذا الجو فر=قط مانصح لك وعوده فايره
بالغصب بايجيبوك الا ياطير فار
اللي عبر على الناس ترى خزوه وشر=خلى السماء حمرا وارضي شايره
الله يعين الناس على هذا الشرار
$$$$$$
*$$$( الشـــعـــف )$$$*
$$$$$$
سـلام مـني عـاللذي قـص العبر=دنـيـا دنـيّـه فـانيه قـل عـابره
لازم نحط ذا الفصل .. باب الاعتبار
شـف مـن عصا ربه وبوجوده كفر=سـمّوه قـال الـشعف دولـه كافره
يـاما امـم ذا الـوقت جملتهم كفار
مـابـايردك حـكم يـاحكم الـقدر=لاقـد قُـضِي امـرك بـقدره قادره
يـاربـنا نـسألك تـخفيف الـقدار
الـسيل بـايردف .. اذا قـالوا كسر=بـانـتقلب لـهرار مـثل الـكاسره
مـاباتدوم الـحال فـي ذل وانكسار
مـاحد تـبعهم غـير حـاكمها قطر=بـس ويـن .. بـاتعبر عليه القاطره
بـاتشوف دم يـذلح بقضبان القطار
شـوها فـضيله لااعتمى فينا البصر=لـعبوا بـنا يـاناس .. لعبة باصره
هذا هو الواقع .. ولي حاصل وصار
دنـدن بـصوت الدان ياشاعر شعر=يـاريـتنا لـلشعر مـثلك شـاعره
ذا ويـنهم يـاناس اصـحاب الشعار
$$$$$$
*$$$( شيخ القبايل )$$$*
$$$$$$
الوقت يالشعار يدهم بالمطر=عذاب يزحم في المناشي الماطرة
قولوا لبن صران لحق عالمطار
لفلف قشاشك قبل ما يدهمك شر=ان عاد شي حكمة رجع بالناشرة
الشقف ذي مرمد يقوبس بالشرار
والذيب ذي تخشاه يالبدوي ظهر=والتالية وحلة خبيثة ظاهرة
ذا ما يعول با يطلق بالظهار
خايف على ( العودة ) يكنسلها عمر=بايهتك السترة .. و كانت عامرة
الله يستر لو فلت وسط العمار
$$$$$$
*$$$( الشـــعـــف )$$$*
$$$$$$
الله يـحـفظنا مـن الـوقت الـغبر=لـيهو سـرد احـداث كـانت غابره
وتـنكشت صـفحات .. غطّاها الغبار
اهـوال فـي اهـوال هـدّت بالشعر=تـصعب على المظلوم كظم إمشاعره
حبل الكذب قاصر .. وماله شي شعار
لـحمر واعـوانه .. قطب حبل الوتر=وعـمـل بـلاوي بـعدها مـتواتره
خـلوك يـالمليوح تـعزف عـالوتار
حـتى الاسد خافش .. وماتشوفه ظهر=ولا قــرب جـنب الـمقدم ظَـاهَرَه
خلوا حيود الحصن .. متصدع وهار
عود الشخط وحده .. ترعبل وانكسر=و تـكالبت حـوله طـيور(ن) كاسره
صـعبه تِـجِبّر عـود به جملة كسار
مـاتـنقذ الـغرقان يـاعود الـعشر=بـاقول مـن واحـد الـمّا الـعاشره
مـا غـير نتوحد .. نلملم في العشار
فـي ذا الوقت لجواد .. بس كمه نفر=واكـوام مـن اقـوام مـنهم نـافره
حـد مـنهم شـيرد ومـتخبي وفـار
لـعور مـع العوران .. مامعهم نظر=يـدحقون الـناس .. لـيهي نـاظره
بـايجي الفرج .. لو طال قبله لنتظار
$$$$$$
*$$$( جمال العطاس )$$$*
$$$$$$
لحمرعطا الافغان بس واحد شهر=وقال ذا سيفي بيدّي شاهره
والموعد القادم على مفتك شهار
اما تسلم لي محمد بن دغر=هو والجماعه ذي معاهم داغره
ذي عامدين الكهف او في وسط غار
او باتقع هدّه مطاعن بالشفر=باقطّب اذانك وقص امشافره
وباتشوف اني معي جملة شفار
وقال لفغاني الي عندي ظهر=ماشي معك حجه عليهم ظاهره
والا ادلّه باتقطبها ظهار
وحان موعدهم وكلين اعتكر=والشر يتعكور وقامت عاكره
وتشوف قتلاهم اذاطارالعكار
وبعدها لفغان ذي راحوا طيَر=لاموا القبيلي ذي صدم بالطايره
وحكمهم ولّى من ايداهم وطار
$$$$$$
*$$$( الحضرمي 2003 )$$$*
$$$$$$
يا ريت صاحبنا يفهم ويعتبر=عندما الحمران دقوه ولطموه عاناظره
يا ليت يأخذ لطمهم في الاعتبار
إن كان عمده على العرب لا ينتظر=سنين مرت عليهم وأفكارهم متناثره
يا ريتهم يصحون يكفي الانتظار
كل الأمم متعاضده عند الخطر=الا العرب اشوف أمتهم نعم متناحره
يا رب وحدهم وابعدهم عن الاخطار
$$$$$$
*$$$( احـمد العطاس )$$$*
$$$$$$
امات نصلة بيدهم وامات جر=الدوعني يلقي مصائب جائرة
ولعادخلّى في البلد صاحب وجار
هوقال عر بدخل مع الحمران عر=ولقى فضيحة مخزيه ومعايره
عا كل مسلم قد مست خزوة وعار
الحمر لي قدهم بجنبه في قطر=وركاب في الرملة لهم متقاطرة
وبوش قد شفته مقدم عل القطار
لمّامتى ذلحين مبعد بان بر=بنت الظواهر ياالشعف ذة بايرة
لي سرقت الدولار قالت حرف بار
دركاه ناباقول لا يابلحمر=قم ناصح العربان لي متحامرة
شوفوالكم صرفة وبدّوا عل -----?
ماحد كما برويز ود خالي عمر=ماشفت غير أرضه خضيرة عامرة
يهناك ياولد الشرف ذاك العمار
$$$$$$
*$$$( الشـــعـــف )$$$*
$$$$$$
يـاريـت يـالـعطاس بـاتعيد الـنظر=ذا وقــت مـتـعني مـساهن نـاظره
اصـبر وانـا بـاصبر .. تحمل لنتظار
لـحمر نـوى الـقرحات في اول صفر=مـا بـاتشوف الـخلق حـل الـصافره
حد سكّري بايجيه .. وحد يشكي الصِّفار
لـحمر نـذل غـدّار .. لا كـنك حذر=والـدوعني مـا يـستحي مـا حـاذره
حـذراه من تالي الوقت .. كونوا حذار
لا زادت الـرشخات .. بـاتعكر عـكر=وابـليس يـرشن نـار عـظمى عاكره
يـارب سـلمنا الـرشخ هـو والعكار
كـله مـن الـهبلان اصـحاب الإمـر=مـا حـد نـهى المنكر .. مع المتأمره
عـنكور ابـوهم .. هـم زمر للإئتمار
كـل مـن مسك منشار .. عالرقبه نشر=بـايـقطب الافـعى الـكبيره الـناشره
والـلي وقـع نـجار .. بـاينشر نشار
لـيهو طـلع لـه ريش .. ظن انه ذكر=مـغـروم او مـصقوع فـاقد ذاكـره
ودعـوا عـليهم .. هللوا زيدوا الذكار
رب الـسماء .. وحـده اذا مكروا مكر=بـاتـقع لـهـم شـله عـيال الـماكره
مـايدروا ان الـحرب فـيها فـار كار
بـايـنكسر غـضروفهم وسـط الـفقر=لا وقـعـت الـوقعات حـل الـفاقره
بـاتـنتزع لـقلوب مـن بـعد الـفقار
[/poet]

[الشعف]

[poet font="Simplified Arabic,4,black,normal,normal" bkcolor="" bkimage="http://www.alshibami.net/saqifa//backgrounds/18.gif" border="outset,2,gray" type=0 line=200% align=center use=ex char="" num="0,black"]
$$$$$$
*$$$( جمال العطاس )$$$*
$$$$$$
من لا معه قدره رماها عالقدر=واما العرب يالشعف ماهي قادره
ماشي لها كلمه ولامعها اقتدار
يابوحسن (برويز) مالامسه ضر=يومه معه (ميزر) ولاشي ضايره
في مصلحة ربعه ولاهو قط ضار
البخص عاللي مايزرون العصر=شردِه اذاقدها العرب متعاصره
خافوا من النفله ومن زوي العصار
(مقادمتنا) كل ليله في سمر=في جوهم والله يباتوا سامره
والشُقر هن والبيض معهم والسمار
من يتبع الشيطان لاشك انقمر=باتوا معه في زندقه ومقامره
لما يبان الصبح في لعب القمار
وعالبرود الزين ماذاقوه حر=وباقي العربان تمسي حايره
خايف عليهم لايجيهم يوم حار
شيبان ماراعوا تجاعيد الكبر=رد النصيحه طبعهم ومكابره
وعادهم والله يلقون الكبار
بايزرهم لحمر بحبل ابليس زر=سكنتهم الراعه ولاهي زايره
يتحملون آثامنا هي والوزار
بيقع لهم ياحن ياامّا انكسر=وباتقع فيهم مصيبه كاسره
وبايذوقون المهونه وانكسار
هم باعوا البيعه وصاحبهم حضر=ودلالة الدلال معهم حاضره
وحسابهم معلوم ساعة لحتضار
هذا كلامي يالشعف بالمختصر=بيقع لبوهم طعن تحت الخاصره
ولعاد شي هنوَه بأكلات الخصار
$$$$$$
*$$$( شيخ القبايل )$$$*
$$$$$$
البخص عالبدوي اذا عدى الشهر=بايحترق داره بنار الشاهرة
ولعاد بايلحق يعدى من شهار
كل من ذرى الحيلة تهذهذ وافتقر=يا ذي تجبر با تجيك الفاقرة
واللي صرطها غضف يندرها فقار
و الله ما با ينطفي دمع السحر=يا صرخة المظلوم دكي الساحرة
لمان نزقل لحمها وسط السحار
$$$$$$
*$$$( جمال العطاس )$$$*
$$$$$$
يامرحبا بأبيات من شاعر حضر=شيخ القبائل كلها والحاضره
شف حكمهافي السلم بيدك والحضار
خرّت على البدوي مصايبها وخر=الشر في ذا الشهر اول وآخره
يومه تبع شوره ولاحتى استخار
سمع كلام اللي قعد بأم الهجر=طبّل له الهجري بدمّة هاجره
لمّا تورّط وانكسر فيه الهجار
مخدر مع البدوي ولكن ماخدر=الا اذا خبّى جميع امخادره
والا (طهمها) في وسط بعض الخدار
لحمر يدوّر للمخادر (لاأثر)=خايف مخادرهم تصيب مآثره
وارسل عياله ذي يقصون الأثار
$$$$$$
*$$$( الشـــعـــف )$$$*
$$$$$$
قـالوا عـبود الـدوح صـايم مـافطر=وعـيـال عـمه الـصايمه والـفاطره
خـافوا مـن الـهزات وقـت الانفطار
لـي هـو قـليل الخير .. مايوم انقهر=ظهرت ضروسه .. لي سكن في القاهره
بـس ويـن مـاعذره يـذوق الانـقهار
والـعـاهل الـمـريوح لـقّاها وهـر=واصـحابه الـغنمان .. تـرقل هـايره
والـمسقط الـتالي .. يقع عاجرف هار
جـابر كـسر ريـله .. ولا شافت جبر=هـو جـاب اصـحاب الجيوش الجابره
بـايـدحملونه لـين مـايقوى الـجِبار
حـتى ولـد هـاشم .. يـعزّم لـلسفر=مـن بـعد مـاشاف الـهوال الـسافره
شـل عـدته سافر .. تبهذل في السفار
ولّـى مـعمّرها .. خـربها مـا عـمر=كـانـت بـلاده قـبل حـكمه عـامره
بـادعي انـا لـله .. يقصف له العمار
خـانوا ضـمايرهم .. اذا مـعهم ضمر=مـثـل الـبهايم .. نـاشفات وضـامره
يـستاهل الـتفليس .. ذي ضيع ضمار
بـايقع لـبوهم دوس .. لا ويـن المفر=بـاتـشوفهم كـلّـن عـيـونه فــايره
لاكـذ بـدا الـعرّي .. يلاعب كل فار
هـم فـرّطوا بالعرض .. والباغي ظفر=كـل مـن ركز راسه .. قلم له ظافره
بـاعوش من مكناس .. لا ساحل ظفار
وان طـال عـمرك يـالمقدم او قـصر=شـفها فـعالك نـيّرت بـك .. قاصره
مـابـاتعزّك .. لا طـوالك والـقصار
$$$$$$
*$$$( جمال العطاس )$$$*
$$$$$$
كلما دعوا في الجامعه للمؤتمر=حد منهم خانع وحد متآمره
لاهم لحق تبعوا ولاله ائتمار
هذه نتائج زندقتهم والبطر=سمعوا كلام اساقفه واباطره
لادخلوا المسجد ولافقعوا بطار
كل من عبد ربه بلاشك انتصر=مايختذل والله ربه ناصره
العز له دايم ودايم لنتصار
حفت عليهم والحمَر شل الثمر=اليابسه بقيت وشل الثامره
عليهم الخدمه وله جني الثمار
ضرع البلاء يالشعف ماذا اليوم در=شفها عليهم باتدور الدايره
ولاعاد باتبقى لهم سقفه ودار
ان حد تكلم او نصحهم انتهر=وكل واحد من قداهم ناهره
ويغيبونه قبل مايطلع نهار
ذيك الزنازن ماتشل حتى نفر=من ضيقها ذي وسطها متنافره
الوف فيها مابها عشره نفار
الامر لاقد صار في يد الغَرر=تشوف بقعى تختلف ومغايره
ولايجيب الغِرالا كل غيار
$$$$$$
*$$$( شبامي اصلي )$$$*
$$$$$$
يبلغ سلامي عد مالعاكر عكر=والاجواء عندنا شوها عاكره
لو بخيره مابغيناها الزواخي والعكار
ابيات كالعقد وسطه منافيس الدرر=قلتم لزوماً باتدور الدايره
من قولكم غيَّب علَي حسّي ودار
لحمر بغى الامه ذي تغدي طيَر=جمّع صواريخه وكمن طايره
في ارضنا سوى القواعد والمطار
والتاليه فصلو وهاتو المختصر=وصفو لنا المبسم هويالخاصره
نبغى الغزل ماهو سنابيك الخصار
$$$$$$
*$$$( جمال العطاس )$$$*
$$$$$$
مولى جعيمه ماوثق في اهل سر=ولايسايرهم بتات مسايره
ولاطرش لاعندهم مره وسار
طلبوه يرجع عن فعاله واعتذر=لاموه كل القوم ماحد عاذره
كنه قوِس رافض يقدّم لعتذار
من بعد نكران النسب عنهم دبر=طردوه للسودان قطعوا دابره
لقبال فيما بينهم اصبح دبار
والسود حتى يوم حسّوا بالخطر=قالوا وجودك هاهنيا مخاطره
ولا لنا قدره نواجه ذي الخطار
قالوا له المسرى ومن قبل البكر=ولعاد لك مقعد المّا الباكره
دحقه ولا ركبوه حتى عالبكار
ولالها الا ..يروح ارض الوعر=ورجِع لهاذيك الجبال الواعره
ايام كان القتل فيها والعوار
ذا ليه ياود المعلّم لاتحر=خليت ذي الحُمران تمشي حايره
واللي فعلته فعل من شافه حتار
يغدون في خيبه اذا قرّح كفر=خوف وكتبه الله لأُمه كافره
مايستوي من كان مومن والكفَار
يدوّروالك تحت كل فّقِش وحجر=والستر ستر الله ماحد حاجره
باينبشون الحيد كله والحجار
$$$$$$
*$$$( الشـــعـــف )$$$*
$$$$$$
حـيوا الـشبامي ذي طرح شوره بَدَر=نـشـكره يـااخوان عـاذي الـبادره
حـيا ومـرحب بـالكواكب والـبدار
بـاقول حـرف الـراء عاده مانتحر=ذلا الـعرب يـهوين لـي مـتناحره
سـمّوا شـهيد القدس .. هاوي لنتحار
مـاحد حمى الاقصى كما طفل الحجر=حـاصر يهود الشر .. سوّس حاجره
هو مثل ذاك الطير .. لي حامل حجار
ويـنه ابـو الـسنقوف .. كنّه مانقر=والـبـاقي الا عـنـطزه ومـنـاقره
مـا عـقب مـايطعم بديل الحلو قار
شـارون لـه قلعه .. وله يغدي بِشر=يـاريـتنا نـقـدر .. نـقوم نـباشره
لـيهو رشـن بالحقد .. خلاّها شرار
اربـعميه وعـشرين لـعبوا بـالبشر=هـم وجـهوا ضربات .. له متباشره
وتـكدرت صـفوات كـانت بالبشار
ضـاعت كـنوز الارض الا مـاندر=لـي وزنـها غـالي .. وعمله نادره
والـمَدْيَره ضـاعت .. وكذ نحنا نُدار
تـاريخنا يـشهد .. وبـاقي مـااندثر=ولـنا مـعالم واضـحه مـش داثره
لـكن عـروبتنا؟! تـشارف عـالدثار
بـادعيك يـارحمن .. تكشف ماانستر=تـكشف عـيوب الغيد لي هي ساتره
وتـقضي الـمشهد .. بعد غلق الستار
صـلوا عـلى سـيد المحاسن والسير=واهـله واصـحابه وكـل من سايره
عـد مـا حبى مولود عا رجله وسار
تمت

[/poet]



مخصوص للحضرمي 2003 : حياك يالغالي .. وحرصا منا على الا نهضم حقك في المشاركة .. فقط تم اضافة ابياتك فيها بالرغم من اعتلائها ببعض القصور في الوزن والاشتقاق .. ونشد على يديك ونشجعك كي تشاركنا افكارك واشعارك .. وانشاء الله تقدم الافضل دائما .
عموما فالقافية تمشي على هذا النمط .. او اشتقاقاته مثلا :
اعتبر/عابره/اعتبار
خبر/خابره/خبار
كفر/كافره/كفار
............... الخ .

لذا اذا احببت ان تعيد صياغة مشاركتك على هذا الوزن .. فنحن منتظرين .. واذا تكرمت وسمحت للشعف بالتطفل و تعديل الكسر .. فنحن ممنونين .. وانت صاحب الحق الاول والاخير .. وان خليتها على ماهي .. ما نحن معاتبين .
وياريت لاتزعل من خوك بوشعفان .. والله ذلا من محبتي لك يالحبيب .. ومساهنين المزيد من مشاركاتك عن قريب .

تحياتي للجميع,,,
الشعف

[جمال العطاس]

تسلم والله يالشعف على الجهد
ولكن لي طلب وهو ان تكتب اسم
القائل بلون اخر سيكون افضل
وتعدل اسمي من العطس الي العطاس
ولك الف شكر وتحيه!!!

[الشعف]

العفو ياجمال ... والله يحفظك من العطس .. يالعطاس
ذلا مع الخبخبه وقعت البخبخه
وبخصوص اللون ... المشكله انه ماشي في خصائص ( محرر الشعر ) تعديل كلمة معينة بلون مستقل ؟؟

وانما اللون يشمل النصوص كلها ؟؟!!!
بانحاول نحصل حل ثاني

[باجرش]

السلام عليكم ورحمة الله
مُلأت السقيفة بالمساجلات الشعر الشعبي وجميل جداً هذا الشعر وكلنا نتابعة ونستمتع به والشعر هو شعر مهما كانت وسيلة تعبيرة والملكة هي الملكة ولكن نقول يا شعار نحاول الفصيح لانه اقوى وابقى واوسع ان استطعنا ولا تتركونا اسبح في الفصيح وحدي ياجماعة وهذه مشاركة ولو انني لا اجيد هذا اللون ولكن اخونا الشبامي وغيرة من الأخوان بكرم أخلاق مشكورين يدعونني الى المساجلة أرجو ان تنال استحسانكم

[poet font="Simplified Arabic,4,darkred,bold ,normal" bkcolor="" bkimage="http://www.alshibami.net/saqifa//backgrounds/38.gif" border="groove,2,gray" type=0 line=200% align=center use=ex char="" num="0,black"]
ما لدوعني شمّخ إذا سمّى نحر = با يقطب الأفعى و أيده ناحرة
با يجعل الأحمر يدور عانتحار
ذ لا حمق في وجه ذا الأحمر كهر = سموم من جوفه لهبْها كاهرة
ظهر وهو عورة في وضح النهار

والله ما قابله من ماكر مكر = والمكر بالقدرة شديده ماكرة
تشوي سلبها نار من بعده انصهار

شوها حوادث سوق حد رابح وحد فيها خسر = والأرض با تبلع ربيحة وخاسرة
الله يجنبنا الحوادث و الخسار

وحد على الطارف يدننه السمر = والبدر ما همه نجومه سامره
رجال ينخيهم من الجبهه سمار


[/poet]

[الشعف]

ياحيا وسهلا بشاعرنا الفصيح ... باجرش ... والذي نكن له كل الاحترام ومن اشد المتابعين لقصائده .. وماشاء الله شفك فصيح في الفصيح ... ونحن مالنا الا الدان الشعبي هذا اذا كان لنا شي فيه ؟!
مشكور عالمشاركه .. واللي نتمنى استمرارها ... وبخصوص الفصيح بانحاول نتعلم منكم .. وخصوصا انه يجب التقيد فيه ببحور الشعر واوزانها ... واللي نجهل تفاعيلها ... لكن بانتعلم وانشاء الله بانناوسكم
تحياتي,,,
الشعف

[جمال العطاس]

حيا الله أخونا باجرش
يامرحبا الف مرحب بك
بالنسبة للشعر الفصيح سنحاول كما قال بو شعفان وعد منا
واللي بايقدر عليه احمد العطاس كونه تخصصه اللغة العربية
والاداب ولكن بانحاول!!!
شكرا وجودك هنا شرف لنا