(((((الدان)))))

[الوزيري]

شيبه بغانا للورى نرجع ونحن نحاذره=والعلم يتقدم ونحنا في البداوه باندور
شفها فضائيات يالباشق علينا كاسره =تدعي بحريه لكل لجناس واتبث الشرور

[ابوهارون]

وسارت الزقره تسوي لي يسووه الزقور ! ( والعكس من ذلك ) ههههههههههههههه

كلام والله كلام خليت البوري يسقط من ايدي يا ولدي ما شاء الله عليك .
وانت يا وزرآن هت من طيباتك ونحن با نخشّف على شان ما تمـلـّـون !! تحملونا يا عيالي القلب يحن لماضيه.

[ثابت بن ماضي]

خل تسع من هذا الزمن وان قد قبضت العاشره=عادك حذر منها برغم العاشره هيلا عشور
اقوال اهله تشبه العملات ذي هي بايره=وكلام ذاك الوقت امثيل الذهب ذي مايبور
احيان يصبح صاحبك يشبه خلال الخاصره=ونعيب دايم عا الزمن والعيب فينا والقصور

[سعيد محمد علي عبود باوزير]

مادامنا عظمي قوي بقطف ثمار الباكره = والربح والمكسب في البكره ومسراح البكور
ملقي شراحه عالمطارح بالحصون الظاهره = ماسيب مالي قال شاعر في المطارح للطيور

[ثابت بن ماضي]

ذكرتني الايام ذي فيها الخضيره وافره=وكان موسم في الحجل والقدر بالجُبر يفور
واليوم حفت هكذا دنيا دنيه قاصره=لو باشكي لك منها القلب واجنوبي فجور
وانته توقع لاتقع حذرك تثق في الفاصره=ذا الوقت عش يومك ترها تشبه الذئب العقور

[ثابت بن ماضي]

خرج ذا فصل والثاني دخلنا في مجال اخري=مجال العشق يالعشاق ذي فيه الكلام ايطيب
وبايطيب السمر والقول خلوا من سرا يسري=وبانسمر على ضؤ القمر لين القمر مايغيب
مزاجي راق لحظة مانظرت العول والقمري=يحفن في العليا خفت لاظربهن خطي ماصيب
برغم اني ضرب بالميم ط من كنت في صغري=ولكني تذكرت الشعر ذي وسط راسي شيب

[سعيد محمد علي عبود باوزير]

عجبنا الدان والباشق بلي في العشق من بدري =وقلبه شاب في العشقه وشعره عالحجر بيذيب
وصوت الدان نسنس فوق جده والهوى بحري = عسى رحمه وشفقه منهم يكفي كفى تعذيب

[سعيد محمد علي عبود باوزير]

بكلمه منهم حط الفرح والانس في صدري =وبسري في سواد الليل ما خاف النمر والذيب
بساس الدار يالباشق فرس اوخيل بن مهري = جوابك منتظر لا يالهلالي عاسعيد اتجيب
وتلعب في المداره ساعة المزمار والحدري = ولا فارس لها يصلح مدرب دارس التدريب

[ثابت بن ماضي]

بلخيول الاصيله انت ياوزران ذي تدري=ولكني سمعت ان الفرس تروض بالترغيب
ولو كان الهدف مبعد فقه تضربه بالجفري=ببو سته يخلي ذي بعد منك يصير اقريب

[سعيد محمد علي عبود باوزير]

ولا بضربه جيبه في الشبك اسلوبها عصري = وبا سايره عا غشمه وناوش بالعمد ونهيب