بدع وجواب بين الاخويين الشاعر/ مبروك بن ماضي ..والشاعر/خالد بن مهنا

[خالد بن مهنا]

هذا البدع من الشاعر/خالد بن مهناء

الا ياالله ياعالم بلي باطن ولي ظاهر=طلبت العون منك والمدد ياواسع المده
وانت الناهي الآمر وانت الاول الاخر=ولك وجهي سجد اما لغيرك ماسجد سجده
يقول الليث خالد بن مهناء شاقني شاعر=يهد مثل النمر لاقد حظر في ساعة الهده
هلالي..من قبيله باسله باروتها ثاير=ابن ماضي وله ماضي وله حاضر يحن رعده
وله تاريخ مابايختفي كاالنجم لي زاهر=اباارسل له خطابي يومني طمعان في وده
ولا لي قصد ثاني يعلم الله لي في الخاطر=وكل انسان تعرف من كلامه ايش هو قصده
وفي..مبروك ماقصّر وانا ماشي علي قاصر=صقيري من بني مره بطل واخوالي الجعده
كسبنا العز والناموس ببلاجيك وميازر=في الوادي لنا كلمه ومن عاهد حفظ عهده
لبسنا القبوله ايام كانت ثوبها طاهر=وقدها اليوم مثل الدار لي ماشي لها سده
وكل من جا تقبول وان نغزته قال بو عامر=لبار انه معه شي رزق ولا قرش في يده
تغيّر كل شي ماحد درى وايش الذي صاير=وسكين العداله في البشر كنه برد حده
وفي ارض اليمن ادخل وشف وش يلقي التاجر=يسوي مابداله يخلق الاسعار من عنده
ولاتكلمت ولا قلت شي قالوا شف الماكر=من الوحده انفصل... لابارك الله فيش ياالوحده
تشتّتنا تغرّبنا وكم لي من كلف سافر=وكم لك في الرياض انته وانا كم لي وسط جده
بغينا ارضنا تصلح ويرجع بو يمن ظافر=ويسلم من هموم الوقت لي قد حمّست كبده
ولو بشكي همومي كلها باتملي ادفاتر=ولكن كل شي لازاد عن حده انقلب ضده
معك شل الرساله ودها ياطير ياطاير=وعطها الجيد بوفيصل وانا له منتظر رده
وصلى الله على محمد عدد مادلهم الماطر=واله والذي وقفو معه في ساعة الشده

وهذا الجواب من الشاعر/مبروك بن ماضي ....كما ورد في رسالته عبر البريد الاكتروني:

في كل شي يقولون يامحسن البدع لولا الجواب إلا في هذي فأنت راعي الاوله وماتنلحق
هذا صدى لصوتك الجميل الذي شرفتني به من خلال ردي المتواضع والذي اتمنى ان يحضى بإعجابك
تفضل بقبول تحياتي واسمى الاعتبار 00 أخوك / مبروك بن سالم بن ماضي

الا يالله يالـفـرد الصــمـد يالخـالق القادر =طلبتك تبعـد الشـيطان عني دوم وتصده
إليك ألجا ولك في كل حالٍ حامد وشاكر إ=لاهي كن معي دايم وأغثني ساعة الشده
واجعل لي لسانْ يسبح بحمدك ولك ذاكر = ووفـقـني لما ترضى وعـني كل شـر رده
ونا من بعد ذا برسل جواب إلـ حضرت الشاعر = الأغر اللي ارسل بدعه إلينا من بلد جده
وصاغ أبياته الجزله وهو في صنعته ماهر = تجي عذب القوافي له ذليله طالبه وده
أخص خالد بن مْهناء الصقيري والذي بادر =وشـرفـني بقيفانه ومد بالطيب لي يده
معرّب من بـني مُــره لهم تــاريخ ومـآثر =بطـولـيـه 0مع الايــام والـتـاريخ مـمـتـده
حموله تصنع الامجاد فـ الماضي وفـ الحاضر =لهم في القبوله صيت وخبر وشده وعده
على وضح النقاء يمشون من الاول الى الآخر =قروم يكسبون المرجله بنفوس معـتده
ولايخشون في وقت الوغى من أيّـة مخاطر =يعود خصمهم خاسر ويتراجع الى حده
وابستعرض معك حال البلد يالشاعر الثاير =وشعبٍ عايشٍ في البوس والتهميش من مده
ترى مافي اليمن حاجه تسر البال والخاطر = وكل مسـئول إيـده له يسـوي مثل مابده
وابتساءل بيبقى لامتى هذا الشعب صابر = يعاني الضيم والحاكم عليه مْصعرٍ خده
غلا الاسعار ياخالد مثيله عالشعب مامر = وكل تاجر من التجار يابخته ومن قـده
اذا عارضتهم قالوا انفصالي شخص متآمر = جنوبي 00 والجنوبي لاتحرك إلعنوا جَده
عميل معارض الوحده وبالشر لليمن ضامر = إذا هو طالب بحقه لـزوم انـا نـقـف ضـده
ونا يـاصاحـبي وطني ولانـا لـلبـلـد ناكـر =ولكـن لايعـــيـرني الـشـمال بـتهـمـة الـرده
ابا كامل حـقوقي 0 كان هي ماجاتني باكر =رجاءاً لاتـلـومـوني اذا انا صرت في حِده
وصلى الله على الهادي وأله ماذكـر ذاكـر = واخـلص بالعباده لـلـعـظيم وسـبح بحـمده

[طالب النعماني]

ياسلااااااااام عليكم قصائد رائعه
وقمة الابداع نجده هنا في قصائدكم
بارك الله فيكم وكثر من امثالكم

[شجين]

بارك الله فيكم -- وكلاااااااااااااااااام جزل وقر في حيد
تسلمون الجميع المريري والهلالي
تقبلو تحياتي اخوكم (شجين)

[زماني غدر بي]

بارك الله فيكم وكلاااااااااااااااام من نوع ثقيل بالله لا تقطعونا من قصايدكم

[بن الحامد]

ماشاء الله تبارك الله
تسلم يالمري عالبده وتسلم يابن ماضي عالجواب

سدد الله خطاكم

[محمد التميمي]

ابداع رائع

لله دركم

مساجله جميله وغايه في الروعه

تسجيل حضور واعجاب بهذا الابداع الساحر

اخوكم محمد التميمي

[خالد بن مهنا]

اقتباس : المشاركة الأصلية كتبت بواسطة طالب باتيس النعماني

ياسلااااااااام عليكم قصائد رائعه وقمة الابداع نجده هنا في قصائدكم بارك الله فيكم وكثر من امثالكم

هلا باالشاعر الكبير طالب حسن
انا سعيد بمرورك ...........
لك مني الشكر والقدير

[علي فدعق الهاشمي]

الشاعر المحبوب

خالد المري

والشاعر الفـذ

مبروك بن ماضي

بوفيصل

ياحياكم الله

سلمتوا وغنمتوا على هالمساجلة الشيقة الممتعه السلسة الجزلة الذي تشرفت بقراتها عدت مرات والتي تدل على مخزون شعري كبير ,,عسى المخوة دائمه بينكم .

شهادتي فيكم مجروحة والمعروف لايُعرف ارى ان القصيدة اتت في وقتها المناسب

قالوا في اليمن وحده ,,وقلنا وش هي هالوحده ,,ولانلنا عوافي عقب هالوحده

تقبلوا مروري السريع

لكم خالص التحية

[خالد بن مهنا]

اقتباس : المشاركة الأصلية كتبت بواسطة شجين

بارك الله فيكم -- وكلاااااااااااااااااام جزل وقر في حيد تسلمون الجميع المريري والهلالي تقبلو تحياتي اخوكم (شجين)

مرحبابك اخي العزيز شجين انا سعيد جدأ بمرورك واطرائك الجميل
لك مني كل التقدير والاحترام

[خالد بن مهنا]

اقتباس : المشاركة الأصلية كتبت بواسطة زماني غدر بي

بارك الله فيكم وكلاااااااااااااااام من نوع ثقيل بالله لا تقطعونا من قصايدكم

الله يعطيك العافيه اخي العزيز مرور الطف من النسمه
مشكور وبارك الله فيك