حكم بن حيدره في قضية العمودي وباتيس

[طالب النعماني]

قصيدة الشاعر عبدالرحمن بن محمد بن بدوي العمودي
مرسله للشاعر طالب بن حسن باتيس ابوراضي
10/5/1428هـ الموافق 27/5/2007م

ابديت بالله باللاه المعتلي=عالم سرايرها وعالم مايكون
دعواي يالحكام قال المدعي=دعوى على طالب وربعه يعرفون
دعوا على باتيس خله يتقي= في المال هو والنخل واسواس الحصون
والمصنعه ذي هدموها من بطي=عوّر علينا يوم هدم في الزبون
ماهو سوى منه ولا هذا قدي=من حق واضح يالجماعه تنكرون
وانته حفرت البير وارسيت الدلي=هذه مشاكل قل لحمران العيون
من حد بن ماضي وعلوا ملك لي=ولقيتها بين المطاحن والسنون
وانا خطوطي ثابته ياصاحبي =تشه على الظالم وذي بايظلمون
واليوم برفع دعوتي ذي هي معي=لا عند بن عكعوك واهله يحكمون
عارف عوايدها وعارف كل شي=من زام جده في السوالف يفصلون
خيل برواق في مناشي تحتري=حطاب بيشل الموازع والدفون
والختم صلوا عالحبيب الهاشمي=مرسل على الثقلين لله يسجدون

قصيدة الشاعر طالب بن حسن باتيس ابوراضي
جواب للشاعر عبدالرحمن بن محمد بن بدوي العمودي
10/5/1428هـ الموافق 27/5/2007م

يامرحبا ترحيب بك يالمعشري=غالي ولك تقدير غالي مايهون
يامرحبا مليون جم ماهو شوي=ترحيب بالحكام هم والمدعون
يامقدم الدعوى علي لاتدعي=لاحق لك عندي ولا لك شي ديون
دعواك باطل لاتقع لي باطلي=وإلا من اهل الظلم ذي هم يظلمون
المال مالي والمطارح ملك لي=مثبوت شرعا بالحجج هي والبيون
حقي ورثته من قفاء جدي وابي=ذي هم يشلون القذاء من كل نون
وانته تباء ترد القذا ياصاحبي=مابايقع هذا ولايمكن يكون
تدعي وعادعواك واجب لتقي=هت مامعك ياوعل منصوب القرون
بالبينه ملزوم لاتقع لي غبي=راجع حسابك قبل دحراج العيون
من لا معه حجه ولامبنى قوي=ياقطب قلبه ياجنونه بالجنون
قلوا لبن عكعوك ثبت كل شي=والحكم شف عد له مناقد ينقدون
وانا على ماجوب ببلغ واجبي =باقول ذي قالوه حمران العيون
بعطيه كل ماقاله الله والنبي=حسب العوايد عند ذي هم يحكمون
وغير شرع الله مابعطيه شي=بغلب وباتغلب معي تسعه حصون
وان حنت الرعدان لا بافرحتي =يافرحت الخاطر بهشات المزون
ملقي ظمر للسيل والشاهد علي=دوعن وريمه من عتق لما هدون
والختم بالمرشون هو والذائبي= والكنش والباروت محكوم الوزون
قوت الميازر قوت كمن جرملي=كل ماقرح صوته يميّل يالذهون

حكم الشاعر يسلم بن عكعوك بن غانم بن حيدره
في قضية بن بدوي وبوراضي

اطلبك يامعبوود تقبل دعوتي = وانت الذي لاقلت كن بمرك يكون
يامن رفعت الكون يالفرد القوي = الطف بعبدك وانت له مرجع وعون
ماغير وجهك ياألاهي يرتجي = اما البشر ضعفا ولا باينفعون
بالعفو وإلا مالعمل ماهو شلي = امن الخطايه تبت وانته لك شيون
متظرعن لك وانت اقبل توبتي = والناس من بعض الخطا مايسلمون
قم ياعوض رحب بمن جا معتني = جونا جمال الليل ذي مايحتجون
رحب بمن جوني ومن نشدو علي = وانهم على اعمامك الى المسمر يجون
اعمل جماله لاتكسّل وكفني = تلفن النعمان الذي مايخلفون
وانهم على قوم العمودي اللولي = ذي في بضه واهل الخزانه يحضرون
وذي عمل فالسوط ماباينتسي = اهلن وسهلن ماشرق ورد الغصون
بو وجودهم امسا فؤادي مصطفي = من شيمتي يفرح بحمران العيون
لانا برخيه باتناول بندقي = خمسه مخازن فوقهم يتخالفون
بايمسي المرشون تسمع له دوي = لما يزوع ادقام مايتحركون
ياامرحبا بالمدعي والمتقي = من دون معرف ايش مني يطلبون
يبغونني حاكم وانا ماشفت شي = ماهو كذا يلقون ذي يتحاكمون
لول عدايلكم بيدي ترتسي = واكتب عليكم وثر في زايد ودون
باتيس يطرح لي ثنعشر نامسي = ومن ولد بن بندوي كماها يرتسون
محكم على مجهول شف مانا غبي = وان قد عرفت الحق باشد الرصون
بحكم على المخطي وبابري بري = وبانسطر حكم محكوم الوزون
الشيخ يحظر مامعه لامجلسي = وطالب يجي عندي معه تسعه حصون
وباتحصل حكم يالوجه الرضي = هرجك عسل عندي ولاطعم(ن) ولون
لاكنني بوصيك وفهم كلمتي = خلك فالحاظر وذي سابق يهون
ياكم ميت مات من وقت(ن) بطي = وانته تنشد عالمصانع وزبون
خلك ذكي ماشفت حد ميت حيي = من مات خذ قسمه تهنا بالسكون
مالمصنعه هدمت ولا باتبتني = من يوم قد طاحت قللها والركون
لانته تباها تبتني بالزاجري = في يومها احضرت ذي مايحسبون
وراك مانبيت جب المشجري = من حول لما القرن جمبك يوقفون
مليوم لاتطلب بذي ماهو قدي = خلك فالحاظر وهونها تهون
ذا ذي حصل مني ولاني عنصري = عندي سوا لثنين ذي يتنازعون
هذا طلع جاري وهذا صاحبي = اثنينهم عندي كما نور العيون
والختم صلى الله على طاها النبي = والآل والاصحاب عد خصب المزون

[هائم رخيه]

صح لسانك يابوراضي وبن عكعوك والعمودي
والله بن حيدره مايحكم على شي عاده في الجو
كان عدلتوا بيده وباتشوفون الحكم ذي ميزون
لكنه حكم بحكم الشرع والحكم جاء عادل
ومشكورررررررررررررررررين جميعا

[طالب النعماني]

اقتباس : المشاركة الأصلية كتبت بواسطة هائم رخيه

صح لسانك يابوراضي وبن عكعوك والعمودي والله بن حيدره مايحكم على شي عاده في الجو كان عدلتوا بيده وباتشوفون الحكم ذي ميزون لكنه حكم بحكم الشرع والحكم جاء عادل ومشكورررررررررررررررررين جميعا

شكرا لك اخي هائم رخيه
مرورك من هنا شرف لنا جميعا

[ابو يوسف بن شحبل]

سلمت يا بوراضي على نقل الدرر الثمينة

لك التحية والتقدير

[مجمل]

كلام منقح
كلام من الوزن الثقيل
كلام يدخل المقاعد
كلام شعار كبار متمكنين
بارك الله فيكم

[خالد بن حيدره]

[كل عام وانتم بصحه وسلام]

[عبدالله الجعيدي]

كلام جميل البدع والجواب ومن ثم الحكم جميع الشعراء يشار اليهم بالبنان اتمنى
لهم التوفيع ومشاهدة الكثير من ابدعاتهم ذات الوزن الثقيل . تحياتي