جديد المعمور وبوراضي وباعمران مقطع صوت

[طالب النعماني]

جديد المعمور وبوراضي وباعمران مقطع صوت

اخواني الكرام
يسرني ويسعدني ان اقدم لكم هذا المقطع من شريطنا الجديد
المعمور وابوراضي وباعمران 2009م
والذي قام بتسجيله الفنان محمد باغوزه في استراحة اجمل التهاني بالرياض
غنا الفنان المعروف عمر المعمور والفنان القدير سالم علي الحامد
عازف العود الفنان علي سالم باسنبل
الشعار
الشاعر طالب باتيس ابوراضي
الشاعر صالح باعمران ابوزايد
اليكم جزء من التسجيل والمحاوره كامله كتابيا

المحبه طبها في من تحبه =والدواء والسم في يد الحبيب

ابوراضي***=*****
قال بوراضي قليبي وين طبه=مانفع قلبي علاجك يالطبيب
طبه إلا في الذي يسعد بقربه=اح ياريت الدواء مني قريب
المحبه طبها في من تحبه=والدواء والسم في يد الحبيب
ابوراضي***=*****
المحبه يالمحب صعبه وتعبه=والجفاء والصد عالعاشق تعيب
لاتخليني كذا غربتي غربه=في زمن مايرحم الضيف الغريب
لاتقع قاسي حجر والقلب صبه=لاتجرعني الصبر بعد الصبيب
ابوزايد***=*****
قال بوزايد دروب العشق صعبه=عانوا العشاق في الدرب الصعيب
بين رخيه والطرف ضليت خبه=في محب القلب ضني مايخيب
كل ماشفته يدق قلبي برهبه=مكتمل زينه وله منظر رهيب
ابوزايد***=*****
ماعبر لي قوت جبه بعد وجبه=عندما دقيت رقمه مايجيب
ليش يطعني بجنبيه وحربه=لي سكن بروج وترك في حريب
يومني لجله عبرت الفين غبه=من شروق الشمس لمان المغيب
ابوراضي***=*****
اح ياقلبي لقوك الناس لعبه =وانت في شرع المحبه ماتعيب
مادروا ان الهوى كربته كربه=والجفاء يحرق كما الجمر الكريب
اح من نار الجغاء جوفي لهبه=وايش يطفي النار لي تلهب لهيب
ابوراضي***=*****
حب مضنوني وله فاقه ورغبه=لي وجوده يشرح الحال الرغيب
بعد ماقلبي عشق نبظات قلبه=مابغيت إلا على جاله قريب
في البشر ماله شبه لو باتشبه=غير لي نوره يشب بعد المشيب
ابوزايد***=*****
دق ناقوس الخطر بعد المنبه=والثقيله تعتلي الهيج المنيب
مادحقت الجول لي فيه الف نقبه=فيه بورضي معه رتبة نقيب
مادحق الا على جيلان صلبه=جبت لي رادو وساعه بوصليب
ابوراضي***=*****
كل شي له وقت ياصالح وزبه=من يقول إن العنب يرجع زبيب ؟
والذي مايخاف في ذا الوقت ربه=بايهذلف بك في الشعب الوريب
الهوى كأسيف كل ضالم يقصبه=يشبه المنشار في راس القصيب

ابوراضي***=*****

ويقول بوراضي سقوني=ياذي على المنهل فضيله
ميت ضماء بالله حيوني=واحيوا لي النفس العليله
جودوا بشربه واسعفوني= شربه كرع من سلسبيله
بالمثل ماعطيكم عطوني=حتى ولو كلمه جميله

ابوراضي***=*****

عن حالتي لاتسألوني=مصطاب واصوابي دويله

يوم الاطباء تركوني=قالوا سرح مافيك حيله

ان شي دواء والا اتركوني=لاتقتلوا عابر سبيله

ياذي بغيتوا تقتلوني=بسهام لعيان الكحيله

ابوزايد***=*****
ويقول بوزايد شطوني=في المملكه ماهي قليله
لاقدءا بلادي سفروني=ماباء الملز والخنشليله
ماعزي إلا في حصوني=ذي بين داعس والخميله
ابوزايد***=*****
وقت السفر جم ودعوني=ودعت ربعي والقبيله
لما انقلب شكلي ولوني=ماخو حسن كلن رثيله
ياريتهم بايذكروني=حتى في الشهرين ليله
ابوراضي***=*****
ياهل الهويه صدقوني=لي يقتل العاشق خليله
حبيتكم لاتكرهوني=كره اليمامه للجليله
من حيث مارحتوا خذوني=بسمر معاكم كل ليله
وقت السمر بنظم لحوني=شاعر وقد عندي حليله
ابوراضي***=*****
ذلا الزمن خيب ضنوني=واحرمني الخيل الاصيله
ياقطب قلبي ياجنوني=حاير ولا في اليد حيله
واهل الهويه عاتبوني=قالوا سرح دور بديله
مايعرفون إن عيوني=للان ماشافت مثيله
ابوزايد***=*****
عاشق وماتنهنى سكوني=من صغر سني في مليله
وان بشتكي مايسمعوني=حلان في الوادي وخيله
يكفي كفا لاتحرموني=من حب حد لازم يجيله
ابوزايد***=*****
ميتين حارس هددوني=بالجرملي والبوفتيله
من عند بابه رجعوني=مهموم واهمومي ثقيله
مابمتنع لو يحرقوني =لان الفصيله عالفصيله
ابوراضي***=*****
كلمه اخيره واسمعوني=ياهل التقارين الجليله
لا ماحصل قصدي لقوني =مابين مخيه والغليله
شلوا بنعشي وادفنوني=تحت الشناطيب الطويله
ابوراضي***=*****
من حيث ماراضت شطوني=بين البساتين الضليله
سووا فضيله وارحموني=يامن قتل يدفن قتيله
والعفؤ منكم سامحوني=لاجاتكم زله وميله
ابوزايد***=*****
ماشي عتب لو شوقوني=شوق الصحاري للمخيله
في كل شي مايظلموني=دايم عطاياهم جزيله
كن العواذل يحسدوني=صاغوا ميه والفين حيله
يبغوا ضروري يبعدوني=خلف المقد والا المسيله

[المهيب]

المحبه طبها في من تحبه=والدواء والسم في يد الحبيب
حكمه يابوراضي
المحبه مالها دواء الا عند الحبيب
قصيد جزل ولحن شجي
شعراء فطاحله ومغنيين كباروعازفين اساتذه
اشكرك اخوي ابوراضي على النقل الجميل ونامل المزيد

[طالب النعماني]

اقتباس : المشاركة الأصلية كتبت بواسطة المهيب [ مشاهدة المشاركة ]

المحبه طبها في من تحبه=والدواء والسم في يد الحبيب حكمه يابوراضي المحبه مالها دواء الا عند الحبيب قصيد جزل ولحن شجي شعراء فطاحله ومغنيين كباروعازفين اساتذه اشكرك اخوي ابوراضي على النقل الجميل ونامل المزيد

حياك الله اخي المهيب
العين ماتعلا على الحاجب انته استاذ في الشعر
ونحن تلاميذك
شهادتك اعتز بها وافتخربها
اشكرك جزيل الشكر

[صالح باعمران ابو زايد]

لك مني كل الشكر والتقدير يابو راضي على
هذاالنقل والله يعافيك ويوفقك
تحياتي اخوك صالح باعمران

[بزبوز]

لحن رهييييييييييييييييييييييييييييييب والله بحق
كلمات جميله سمره جميله ولكن وين الشريط كامل لوسمحتوووووووووووووووووووو

[بزبوز]

طلب وليس امر يابوراضي
كمل الشريط والا قلنا وين موجود

[طالب النعماني]

اقتباس : المشاركة الأصلية كتبت بواسطة صالح باعمران ابو زايد [ مشاهدة المشاركة ]

لك مني كل الشكر والتقدير يابو راضي على هذاالنقل والله يعافيك ويوفقك تحياتي اخوك صالح باعمران

لاشكر على واجب اخي ابوزايد
ارجوا ان ينال رضاك

[حسن بن قيران بن حيدره]

كلام جميل ورايع وليس بغريب من شعار عمالقه نتمنى لهم التوفيق
هذا الشريط موجود بالنسبه فالرياض في الغبيره شارع الجوالات استديوووووو سمراء
وفي حضرموت القطن استديو بن ماضي
كما نهني الااخوان على الشريط الذي نال اعجاب الجمـــــــــــــــــــــــــيع

[أحمد العمودي أبوفيصل]

اقتباس : المشاركة الأصلية كتبت بواسطة بزبوز [ مشاهدة المشاركة ]

طلب وليس امر يابوراضي كمل الشريط والا قلنا وين موجود

الشريط موجود في استريوا سمراء حي غبير بالرياض وعنده اشرطه اخرى
بس لايزعل علينا بو راضي

[طالب النعماني]

اقتباس : المشاركة الأصلية كتبت بواسطة بزبوز [ مشاهدة المشاركة ]

لحن رهييييييييييييييييييييييييييييييب والله بحق كلمات جميله سمره جميله ولكن وين الشريط كامل لوسمحتوووووووووووووووووووو

الحمدلله اخي بزبوز طالما ان الشريط نال اعجابك ورضاك
اشكرك جزيل الشكر على مرورك وتعقيبك الرائع