بدع وجواب بين (عبدالله بالحمر - ناجي بازراره)

[سالم الزير]

السلام عليكم ورحمة الله وبركاته

اقدم لكم هذه المحاوره بين عبدالله بالحمر وناجي بازراره

يوم امس عبر الهاتف

حيث ارسل ناجي بازراره :-

يا خو محمد قد وقع كر وفر = والظلم في كل المناطق باين
لا جبتلي من ارض بوظبي خبر = باجيب لك اخبار حفر الباطن

رد عبدالله بالحمر :-

اليوم بالباطن وباكر بالخبر = واتقول يتبع في اثرك الداين
الله يفرجها على كل البشر = ماشي سوى عاين وانا باعاين

رد ناجي بازراره :-

ماقول شي حكمه كلامك والعبر = يفرح بها ذي فالجريبه ساكن
واتشاوروا واتناظروا ياهل الفكر = قالوا لنا الكاهن يخلف كاهن

رد عبدالله بالحمر :-

وش بك تذكرني زمن عدى ومر = ذي صورته غبرا ولونه داكن
عهد الخيانه دوب ذكره ما يسر = باقول لك حسبي على كل خاين

رد ناجي بازراره :-

تتداول الايام والجو اعتكر = والجرح ينزف في فوادي ماكن
بالرخص ما بعنا الجواهر والدرر = ساهن سهن وانته مثيلي ساهن

رد عدالله بالحمر :-

لاقد رضي ربك بتفرج بالبصر = خل الامل دايم بقلبك راكن
والشرح يا ناجي بيحسن فالوصر = لما يجونك ذي بوادي داعن

رد ناجي بازراره :-

عهد الخيانه جاب ناجي في خطر = وين الحكومه ما ترد الخاين
يالله بساعة خير لا شن المطر = وانته على عرماء ودوعن راهن

رد عبدالله بالحمر :-

لجوا غريبه يوم برد ويوم حر = والبرق في راس المخيله شاحن
واحنا نراقب قال شاعر فاليحر = والخلق حد خايف وحد مستامن

رد ناجي بازراره :-

قل للشمالي يستعد ماشي مفر = صدر علينا نفط جم ومعادن
والديس والبقرين والغار الحمر = يسوى الحديده والجمال الفاتن

رد عبدالله بالحمر :-

كلام يا ناجي منقح بالعبر = نرتاح له لاقد وصلنا ساخن
والمشكله لاخوك في لحم البقر = يبغى حنك يا بازراره طاحن

مع تحياتي لكم سالم الزير