طبخة السرنديبه ..... بالهناء والعافيه

[بن صران]

السلام عليكم ورحمة الله وبركاته
بصراحه لي فتره طويله منتظر حد من الطباخين أو الطباخات المهره ينزل طبخه جديده ولكن طلع نقبي على شونه مثل ما يقول المصاريه
قلت يا وليد يا بن صران ليش انت ما تتطابز ( عدني ) وتطرح طبخة السرنديبه . أكيد كل من هو جويع مثلي .. أو ملقوف مثل بعضهم با يستفيد منها.
وعلى كل حال الطبخه ممكن تكفي واحد .. إثنين ... ثلاثه ...... وحتى ميه .
وذا طبعاً يعتمد على حجم الطس لي با تطبخ فيه وعدد المشاركين أو المدعيين
طيب نخش في الموضووووع ( الطبخه )
المقادير والمطلوب :
طماطم حبوب ، بصل ، ثوم ، نعناع ، كزبره ، ماء ، قليل زيت ، فلفل أسود ، كمون ، قرفه ، هيل ، بطاطس ، جزر،ملح ، وبيض و .....بس
العمل أو الطريقه :
تجيب طس حسب الطلب وتحط فيه ماء برضه حسب الطلب وكميه من البيض حسب الطلب كذلك
حط الطس فيه الماء والبيض فوق نار ( حسب الطلب ) وبعد ما يبداء الماء بالغليان يمكن تخفض النار شوي وتتركه لفتر عشر دقائق
خلال هذه الفتره قرب منحاز وصحن متوسط وكذلك غسل باقي الخضار المقربه سلفاً وضع كل منها في إناء مناسب

بعد العشر دقائق طفي النار واترك البيض يبرد وإذا كنت مستعجل يمكن تبداء بصقع البيض أو ضربه بخفة يد في جنب المنحاز ثم قشر البيض وضع القرش أو القشر في الصحن لي قربته وكل البيض بالهناء والعافيه

وبعد ما تقضي على الجوع يمكن تدعي أي واحد عنده خبره أكثر منك في فن الطبخ ( مثل لي فتحت السقيفه من أجلهم وتمارشوا حسب تعبير المدودي ) وقلهم يصلحون طبخة سريعه ...
المواد موجوده حسب الطلب .. والأواني موجوده حسب الطلب ... والشوله موجوده حسب الطلب ....والسقيفه موجوده حسب الطلب .... والجائعين ( مثلي ) موجودين حسب الطلب ... والملاقيف (مثل غيري ) موجودين حسب الطلب وبالهناء والعافييييييييييييييه

على فكره أنا خاطبت الرجال فقط لعمل هذه الطبخه لأنها متعبه جداً على الهوانم

وسلامتكم وتعيشون