02-16-2009, 01:15 AM
|
#41 |
|
مشرف سقيفة الأدب والفن
|
من عمر الذيب الى با شراحيل
مادام شفت الدمع من عيني ذرف=كنه كرع صباب من ماصوره يجري على الخدين لمان انتصف=ليل الاحد لثنين عا المعموره بان السبب ليا تجلا وانكشف=اثره فرح بالصوره المنضوره هك يا مهوك وانت يا دارف درف=بطلق عنان احليلتي المهجوره وبا دخل في بحر ماله شي طرف=وباسبح لا صور والنا قوره وباطلع با اللول منه والصدف=من حيث ما يوجد بقاع ابحوره لا تحسب انه وصف مثل اللي وصف=عندي وثائق ناجحه ممهوره الما لكي حارس مع بوش احترف=والمنتظر هدافنا الاسطوره هداف حتى الما لكي بيه اعترف=واصبح معلق يده المكسوره هداف رائع مابدا يوم انصرف=الا على التصفيق من جمهوره سالته وجاوبني الحقا ئق في الملف=ما با كتب سري على السبوره نحنا واهل البيت لبيض كف بكف=لما يجي واحد على دنقوره ياكم قصفنا بوش واليوم انقصف=بسلا حنا الذري الحذاء المشهوره ياريتها الا قنبله كان انتسف=واصبح قطع متراميه منثوره ولد الحراميه وسراق التحف=يلعن ابو اوغاده الما جوره وان سار اوباما على نهج السلف=من يد غيري با يحصل دوره ان جاء بلي احسن وفي النهج اختلف=بعطيه له فرصه كما السنيوره وان جا بنهج العنف باقعله عنف=با قعله الما غص وسط امصوره مادام في يدي رجا جيل الجلف=بي نشفون الريق في حنجوره لا ما خرج برضاه بن خرجه دف=لما يصل ديرة هله وصهوره بصدر اوامر قاطعه لهل النجف=كل جيب ها مر تسحبه مقطوره الشعب في بغداد والموصل حلف=واقسم برب العرش عا كل سوره ان يخرج الغا زي يسف الارض سف=مهزوم بعد الغطرسه وغروره من ارضنا ارض المعزه والشرف=ياخذ جثث اوغاده المقبوره وعليه لا والله لا ماشي اسف=ميت وللميت لقو تغفوره هذا وذا كله في الدنيا بشف=يوم العرب ماينكرو المنكوره ذولا وهذولا يعيشو في ترف=وغزه تئن في زاويه محشوره لا ما ولا كهرب ولا حتى علف=لانسانها يفطر بقوت اطيوره ياريت واحد فيه حتى عرق رف=وين الرجال الصادقه الغيوره ما شفت حد منهم على المنبر وقف=في وجه باراك العدو وشروره ولا مواطن حر في شارع هتف =ما يهتفو الا للعب الكوره اين التصدي والتحدي والصلف=والا قيادات العرب ما موره ما ينشغل حاكم ولا عنده شغف =على على التعديل في دستوره يارب بسترك رب يالاطف لطف=لا تنكشف حاجات جم مستوره |
|
|
02-16-2009, 01:19 AM
|
#42 |
|
مشرف سقيفة الأدب والفن
|
كم انت كريم يااستاذنا..ومخلص للسقيفه..تهدي اجمل ابياتك..لها ولحلانها,,
وعنونتها بكل تواضع.. ((اهداء الى جميع اخواني..حلان السقيفه..عمر الذيب)) ياقومنا دمع الثكالا ينهمر=واسيادنا في بار ليفني يسكرون بانة فضيحتهم ولا با تنستر=وتلطخو بالعار لي ما يستحون وذنوبهم كثرة ولا باتغتفر=والعار لاشعهم الما يبعثون العار ثم العار لما ينقبر=كل من تواطا من وسيعين البطون لما متى واحنا نموت ونعتصر=من قوم لا سمعو ولاهم يرجعون ماهزهم منظر بنيه تحتضر=وامعا ئها من جوفها يتساقطون هل شاهدو دمع البنيه يختصر=كل العتب واللوم للام الحنون للامه اللي كل بنيه تنتظر=منها جواب اخوتي ماذا تصنعون هل شاهدو غزه تئن وتنتصر= هل شاهدو عتاب الثكالا في العيون كمين ثكلا لي تئن وتحتقر =اربعماة مليون عاجز يشجبون لا لاتقولو القيد صعب ان ينكسر=با مكانكم اشيا كثيره تفعلون ساعة حساب النفس لابد ان نقر=ان الجماعه كلهم متواطؤن وان العماله سم قاتل منتشر=خلا كبار القوم عنا ينتحون وانها دنت ساعة حساب المنصهر=في شلة الشيطان لي باعو بدون باعو الكرامه والدماء لي تنتثر=والقدس باعوها لمن جو يشترون باعو بلا قيمه ولا شي ينذكر=ولا عندهم فكره ولا هم يحزنون هذاك يتبسم وهذا ينستر =خلف الستاره لي بها يتسترون والشعب في صمته مواصل مستمر=لما متى عا الظلم ذا باتصمتون ومن صمت عا الظلم مابا ينشكر=وانتو صبرتو حوج كم باتصبرون لا بد كل خائن يموت وينقبر=في قبر ماله لحد لابد يقبرون وامة امحمد تواصل تستمر= واللي لها مقدر من الله با يكون لابد للامه غضبها ينفجر =ويجيب كرداهم معا امات القرون وين القرون اللي بها بانفتخر=بعد الذي غيبه حبل النايلون |
|
|
|
02-16-2009, 01:22 AM
|
#43 |
|
مشرف سقيفة الأدب والفن
|
الرد من عمر الذيب الى الشاعر القناص
حيا وسهلا عد اوراق الشجار=وذبذبات البث لي عبر الاثير وما لمع برقه وعد طش المطر=واعداد حب الرمل وامواج البحور باقوال من شاعر لها عندي اعتبار=عندي وعند الناس جم مثلي كثير لي تابعو القناص ويقصو الاثر=في بحر شعره لي يقشب با لشعور ذكرني اشياء في زمن ولا وسار=في الارض لي تعلمت فيها كيف سير ارض الكرم والجود لي فيها مقر=وذكرياتي من شذى عطر الزهور ولي بها اهلي ولي صاحب وجار=زائد محب ملقيه عا قلبي امير ماهو من البارح من ايام الصغر=بدري تعارفنا ومدينا الجسور جسر الهوا والعشق ماهو باختيار=ولا يميز في غني والا فقير ياتيك صدفه بالمفيد المختصر=بكلمة صباح الخير وصباح السرور كلمه ونظره وابتسامه باختصار=من بعدها استسلمت واصبحت الاسير اسير نظره وابتسامه يا عمر=شقة سواد الليل من ثغره بنور هذا امير القلب وصفه والقرار=لو هو بيدي اليوم اعلنت المسير واعلنت قدام الخلائق والبشر=لي بيننا احيا وليهم في القبور ان عيشةالغربه جهنم والديار=جنه بها من كل رمضاء تستجير قرب المحب جنه ولكن القدر=ما جاز لي الا شهر كل سته شهور وباقي الايام ما بين المطار=ومنفذ اوديعه ونجران الشهير تجزع علي قسم المشقه والسفر=محروم من طعم المعطف والفطور واحرمت من شاهييه لخضر والخضار=لي في شفوف الزرع وعلوب الهبير ومن غصون البان في وادي خضر=ومن المذنب في وسيعات النحور يا حضرة القناص ذبحتنا السفار=كمن مسافر ها هنا صوبه خطير واللي معي ومعاك من ام الهجر=البهذله والهم جاثم عا الصدور |
|
|
|
02-16-2009, 01:25 AM
|
#44 |
|
مشرف سقيفة الأدب والفن
|
بسم الله الرحمن الرحيم اهداء من الشاعر //عمر سالم الذيب. الى الاخ العقيد ((عمر احمد بامشموس)) مدير امن مدينة المكلا ابديت بك يالله يارب النعم=يامسقي الضامي كرع قنفانها يامن رفعت السبع والبحر انقسم=وبأمرك ثبت موسى هزم طغيانها بضربة عصاء فرعون سلم وانهزم=واهتزت السحره مع عصيانها ذا باب والثاني به الهاجس نظم=في رجل يستأهل صدى قيفانها بهدي قصيدة للعزيز المحترم=للشيخ بامشموس ركن اركانها بو حسين لي ساسه على حيد النشم=رجل المواقف وابنها وعنوانها معروف من دار المعزه والكرم=من دار معروفه وعالي شأنها دار المعزه والمبادئ والقيم=حسب المأثر من قديم ازمانها وشعارها المعروف مابين الدكم=منقوش في القسم وفي عيدانها دار الرجال اللي يوفون الكلم=ويرجحو الوزنات في ميزانها واليوم ذا بوحسين حافظ والتزم=وزاد ماضي جودها واحسانها واصبح لوادي عمد في البندر علم=واهل الريد من حضرها وبدوانها معروف في دوعن وفي سوط القشم=وفي جبال الكار عن سيبانها من قال بامشموس حط منه وثم=دايم نصير الحق ضد عدوانها حتى المكلا فيه صم الأمن صم=وأمن ذهبها ولو لها ومرجانها خلا ذيبها سيب تسرح والغنم=في امان رب العرش ثم أمانها رجال معروفها تحافظ عالقسم=وتنفذ الخطه على ميدانها ضباطها وجنود ياكمن وكم=ماغرهم منظر بريق الوانها ماهمهم غير المهمه والأهم =ماينظلم مسجون من سجانها وشعارهم دايم بري المتهم=حتى ثبوت العكس في تبيانها للشعب قد ضحو وللوحده بدم=يوم التقى الجمعان في ميدانها ارجال في الشده تزم الحيد زم=بالله وبالوحده قوي ايمانها |
|
|
|
02-16-2009, 01:28 AM
|
#45 |
|
مشرف سقيفة الأدب والفن
|
بسم الله الرحمن الرحيم القيت هذه القصيده يوم 25/4/1428 بمناسبة استضافة الشيخ سليمان بن جربوع الصيعري من قبل الشيخ سالم بن حمد باسالم الديني وجماعته الدين في استراحة التهاني في الرياض ابديت بك يالواحـد الفـرد الصمـد=يالله ياعالـم جمـيـع اسـرارهـا الحمد لك والشكـر ماراعـد رعـد=واعداد ماجهمي خصب بأمطارها واعداد حنـات الجوانـي عالزبـد=واعداد ماتشرف بـروس اصبارهـا ورضاك مطلبنا وعفـوك ياصمـد=والجنه الخضـراء نحـل اديارهـا سالك بحق اسمـاك ياواحـد احـد=ننزل بها ونعيـش بيـن انهارهـا ذا باب والثاني فـي السمـره اشتـد=يالهاجـس الفنـان زر اوتـارهـا باسمك وبسم الديني واهل الريد=رحب بسادات العـرب واخيارهـا والترحبه ماهي لحد مـن دون حـد=مـن ريدة الديـن بكـل اديـارهـا انستنـا وارحبـت لا يابـن كنـد=انستنـا فـي نجـد بيـن انمارهـا انسـت وسعفـوك ملاييـن العـدد=وان ماكفا المليون زدت اصفارهـا مليـار ترحيبـه واكثـر تعتـمـد=بالشيخ بن جربوع مـن حضارهـا يالشيخ يابن الشيـخ ياشبـل الأسـد=ياسيفهـا المسـنـون يابتـارهـا معروف بن جربوع في كفتن ومـد=تعرف كبار القوم قبـل اصغارهـا من دار معروفه علـى ابـاً وجـد=بالطيب والنخوه وحسـن جوارهـا دار الكـرم والجـود ستعشـر فنـد=والله كرمهـا بعزهـا ومقـدارهـا ومعدن ذهب والماس مافيهـا رشـد=واحد وعشريـن النقـي معيارهـا واللي قبل وجهي في المجلـس قعـد=ترحيب له مخصوص من شعارهـا ولد الرميداني ونعمـك مـن ولـد=نهجه علـى نهـج البـوه واثارهـا عانهـج والـده العميـد المعتـمـد=كم جنب المركب صـدام اقشارهـا لا ماحضر والده في مجلسـه سـد=بالعقـل والحكمـه ودار افكارهـا ذا بـاب والثانـي وثالـث بـاب جـد=بـاب المخـوه واهلـهـا وديـارهـا ياشيخ بن جربوع سالم بن حمد=عميـد دينـهـا بــارض اسفـارهـا سالـم عميـد القـوم فـي اخـذن ورد=كلمتـه فـي الكفـه تـزن قنطـارهـا وبكـم بغينـا شـور قـاطـع مـايـرد=حسـب المخـوه لـولـه ومسـارهـا كنـا ولا زلنـا خــوه يــدن بـيـد=بايمـن جزيرتنـا وحــد بايسـارهـا والـدم واحـد والفصيلـة فـي الـجسـد=صيعـر وديـن عارفين اخبـارهـا مهـمـا تباعـدنـا بأطــرا ف البـلـد=الصيـح واحـد عالعـداء واشـرارهـا كنتـو ولا زلتـو فـي الشـد لا سنـد=يوم التقـى الجمعـان فـي مضمارهـا كنده مثيـل البحـر لـه جـزرن ومـد=فـي ساعـة المطلـع وفـي مندارها عـده اخـو مـن قال انـي بــن كـنـد=وادخـل معـه عاحلـوهـا اوقـارهـا واخـر كـلام الذيـب ياشاهـد شـهـد=عامـا يسويـه العـلـوج اشـرارهـا ريـت العـرب بيجونـي ساعـة بيـد=بهجـم علـى اسرائيـل بطفـي نارهـا واعوانهـا الخمسـه ملاعيـن الكـبـد=بخلص من عصابة جحـاء ومسمارهـا |
|
|
|
02-16-2009, 09:03 PM
|
#46 |
|
مشرف سقيفة الأدب والفن
|
بسم الله الرحمن الرحيم
من عمر الذيب الى قلب السقيفه النابض ((الأستاذ علي فدعق الهاشمي)) الأخ العزيز انا كنت خارج الرياض ولم اطلع على قصيدتك الا هذا اليوم الجمعه الساعه 6 والنصف ولذلك المعذره على التأخير وعسى ان ينال اعجابك ماتقرأ دكيت عا بابي ونا لبيت = با قول لك لبيه كل مدعيت ما هو شويه يالحبيب ارضاك= غالي علي ياسيدي مغلاك مابعد حني راسي ولا وطيت = ولا تقل في يوم قد قفيت باخذ وبعطي يالمحب وياك =غالي علي ياسيدي مغلاك لا تقولي مالقيت شئ لا لقيت = قد متت في عشقته وتوفيت حسب القوافي باقي الا رثاك= غالي علي ياسيدي مغلاك قدام شباك المحب ناديت = وظليت تمطر حارته وأمسيت لاذي انته جيته ولا هو جاك = غالي علي ياسيدي مغلاك بينك وبينه خمس تعشر بيت =يمكنلك اتشوفه الى شطيت وتحس ان كان الهواء يهواك=غالي علي ياسيدي مغلاك عارفك يالقانص اذا رديت=بندقك مامره قصر واخطيت قانص ولد قانص وملقي شباك =غالي علي ياسيدي مغلاك في مركب العشاق كم وديت = وكم بني ادم ظمي وسقيت تسقيه لو كانه زمن مسقاك=غالي علي ياسيدي مغلاك يشق بك لتقول ماشتقيت = دمعت عيونك ياعلي وبكيت من فعل لي جابك ولا وداك=غالي علي ياسيدي مغلاك يالله عساني يالمحب كفيت = كفيت في ردي ولك وفيت من دون لا عتبه ولا لولاك=غالي علي ياسيدي مغلاك |
|
|
|
02-16-2009, 09:07 PM
|
#47 |
|
مشرف سقيفة الأدب والفن
|
يابن مخاشن وصلتك ايد بيد رد عمر الذيب
يامرحبا بالقوافي لي علينا ظون=من عند شاعر روحت المسك ينفح وبن كلام له وزن وافي مهو من جاء وزن =وفى وكفى محمد والصدور امتلن كلام جابه مؤثر والعبر يثرن = والهجس هو والحليله بيتن ينزحن عا بير تسعين قامه منها يستقن=وان حد ضمي بيسقنه قبل مايشربن جابن جوابه من البير العميقه وجن =قالن لعبنا مع سكنه بواصر وصن وجبنا جوابه تفضل وابتدن يكتبن=من بن مخاشن عرفنا سرها والعلن ذكرك نخلك ومالك والسدد واللون =والجود والعز والناموس واغلاء وطن منسيتهن قال بو طارق ولا ينتسن =حتى العمل يوم نسرحله معي يسرحن فيهن لساني وقلبي دائما يوصفن =وحجاب قلبي وكبدي لجلهن ينزفن ودموع عيني من افراق الوطن يقطرن=لبكيت مره عيوني الف مره بكن تعبان والبعد والغربه عليه قسن =وذاب لحمي وعظماني بدن يذبلن وشعر راسي مع شاربي قد بيضن=والعاد باقي سواء الحنطه وطان الكفن كله من البعد والغربه ولي جورن =فينا وفي بن مخاشن دوب يتحكمن والغير خلو جماله في الحجل يمرحن=في بيح او منع خلوهن على مابغن من كل شجره خضيره في الحجل يؤكلن=وانا جمالي صميل ابليس فيهن يحن مشكاي لله غير الله نشكي لمن =وان شي يجي بالتماني يامحمد تمن ذاباب والباب لاخر شفت هندي رطن=يرطن لهندي خري ودعيت له باللسن سكن الحمط يوم جونا وسكنو في المكن=في كل شي ضايقونا في المحل والسكن ودي تبرع بجنبيه وفيهم طعن=ما سارت الايد في الركه بغيت السمن ذا باب والعشق له بيبان وتقفلن =خلاص قفلة بيبان الهواء وانتهن قلبي وقلبك ضروري هاهنا يقنعن =لاتين شفته في الحله ولا عنب دن ولا صخيري ولا قوري غبش ينزلن =والعول ماشي لهن مده معد ميحن مزقول بين الورش بيت وظلي لعن = عا الحظ لي جابني من قعطبه لايون من حيث كانت بياري والدلاء والزون=كانت ملانه دليي بالكرع يطلعن واليوم ماشوف شي والسمع اما هون=والا شواكيش اهل السمكره قربعن والختم صلو على المختار جد الحسن =واله وصحبه ومن والاه طول الزمن |
|
|
|
02-16-2009, 09:12 PM
|
#48 |
|
مشرف سقيفة الأدب والفن
|
عمر الذيب يرحب ب عبد الرحيم القحم العمودي
انستنا في نجد ياشبل الاسد=يا امين عام المنطقه وصمصومها يامرحبا بالقحم عد راعد رعد=واعداد ايام السنه ونجومها حبا وسهلا عد هشات البرد =من غيث غطت عاسماه اغيومها يالهيج يالهدار عندي معتمد=هيج القطيره لولي وقيدومها عدك ولا عديت اثني في العدد=لن الرجال اتعد بخير اعلومها وعلوم بو رائد على ابا وجد =من دار زينه نفتخر برسومها في الجود وانخوه لها قامه ومد=واربع قيم في المخيره ولزومها تاخذ وتعطي دائما يد بيد=وضد كل ظالم مع مظلومها من يوم ماكانت في الشده سند=الاصدقاء تشهد لها وخصومها هذه طباع الاهل وطباع الولد=المنطقه حامل جميع اهمومها نفذ طرق ودروب خدمه للبلد=يوم اخرجت كلمته من حلقومها ماقال مالي دخل في كفتن ومد=ولا تراخا يوم شد اعزومها كلمته بلغت والمقاصد لي قصد =قدها حقائق ثابته من يومها ماهم حد ملقي لها غرضه وشد=ما همه اعلوب الزبد او دومها واقف بجنب الحق في اخذن ورد=يوم العداله جات عا درثومها |
|
|
|
02-16-2009, 09:15 PM
|
#49 |
|
مشرف سقيفة الأدب والفن
|
رساله الى الشعوب العربيه
المملكه سخرة كامل مصادرها=بلخير دايم بلاد الخير مذكوره وصقر العروبه لهم كسر اوامرها=لي حطت اشروط معروفه ومذكوره بلفعل امته بو متعب مناصرها =ان عاد شي نصر به امتي منصوره مستقبل امته في يده وحاضرها=وصورته في قلب كل انسان محفوره اما خلافه قنعنا من منابرها =هذاك ماجا وذا شاغله دستوره وهذاك يذهب الى رايس يشاورها=وذولاك ياتون مثل اطفال ماموره نفس الجمل يا مجمل لينت خابرها=نفس البيانات جت بالصوت والصوره هذه حقيقه بصم ان كنت ناكرها=نفس الصور والاسامي جات منشوره ماشي تغير ولا شي بايغيرها =مادام في البيت الابيض بنت مغروره متعمده للعرب تجرح مشاعرها=كمين عربي وحر قد جرحت اشعوره والبيت لبيض على الباطل ياازرها=لما انكشف للعروبه والعرب زوره ويساعدو ضدنا كسرى وقيصرها=كسرى بسيفه وقيصر سن ساطوره لكن لنبار تقهرهم ماثرها =لنبار واهل الرمادي مشعل الثوره تلعب بلوغاد وتقلم اظافرها=ويبست ريق كل عاصي بحنجوره وشهيدنا نفتخربه في مقابرها=وقتيلهم جثته واعضاه منثوره لنبار تذكر من اولها لاخرها =اسطورة العصر يا لنبار اسطوره واما العرب والعروبه في حواضرها=تشجع ستار اكادمي اليوم والكوره |
|
|
|
02-18-2009, 01:35 AM
|
#50 |
|
مشرف سقيفة الأدب والفن
|
ثر ثره عمر الذيب
معد لي نفس في شي غير نظره في محبيني=بها يمكن يعود الدم يجري في شراييني ونرجع عا العوائد مثل ماكنا انا واياه =نسيني او تنا ساني محب القلب ما بنساه احبه واعشقه يهل الهويه لا تلوموني =ولا قد غاب عن عيني دقيقه صبة اعيوني صغير ما بلغ رشده احبه واعشقه واهواه =نسيني او تناساني محب القلب ما بنساه احبه والمحبه له لعد بعده ولا قبله =تراب الحي ليهو فيه حبيته وحب اهله ومن كثر المحبه له ولهل الحي يا ويلاه =نسيني او تناساني محب القلب ما بنساه بدونه قال بو طارق عمر تسود ايامي =وبحضوره فرح وسرور مهما كانت الامي تجاهلها تناساها متى مابان نجم الجاه =نسيني او تناساني محب القلب ما بنساه |
|
|
 |
| مواقع النشر (المفضلة) |
|
|
المواضيع المتشابهه
|
||||
| الموضوع | كاتب الموضوع | المنتدى | مشاركات | آخر مشاركة |
| باشراحيل ورحلته الى 000 أشجان العشاق المحضاريه | محمد التميمي | سقيفة عذب القوافي | 19 | 07-06-2010 03:13 AM |
| قراءة في "عزاء الى ردفان" للواقعي..من الشعر السياسي الحضرمي | باشراحيل | سقيفة عذب القوافي | 24 | 02-20-2010 09:24 PM |
| كتاب إلكتروني في ديوان الشاعر اليمني يحي عمر اليافعي | قائد المحمدي | مكتبة السقيفه | 0 | 09-15-2009 03:35 PM |
| ديوان الشاعر اليمن عبد الله بن لجذم الجعيدي في كتاب إلكتروني | قائد المحمدي | مكتبة السقيفه | 1 | 08-11-2009 08:33 PM |
| ديوان الشاعر اليمن عبد الله بن لجذم الجعيدي في كتاب إلكتروني | قائد المحمدي | سقيفة عذب القوافي | 2 | 07-28-2009 03:00 AM |
|
|
العرض العادي
