اقتباس :
المشاركة الأصلية كتبت بواسطة المتريث
[ مشاهدة المشاركة ]
|
هذه القصيده للشاعر حسن محمد باقديم مهداه للباحث الكبير الاستاذ والاديب ابوعوض الشبامي
قال باقديم من شتنه وروس المعابر = والمنيع الاشم زبن الذيب والنماره
في معاقل جدودي والبوه والماّثر = راض قلبي وحبيت الجبل والمغاره
قمت الخير والراحه تسود الخواطر = والمعافاه نعمه والقناعه تجاره
عندها ماغبط منبي ولاغبط بشاور = والمنامه ولاجده وبرج الاماره
بعد ذلحين ياالعاني ركب جيب فاخر = من شبربر جبل عذبه يثج من صباره
شل خطي ومضمون الرسالات باكر = قبل تلفاك خت يوشع وزهف الحراره
لاسقيفه شباميه ولاصرح شاهر = نال لاعجاب والشهره وحاز الصداره
بلغوا باحث التاريخ مافيه صادر = واضربوا له تحيه كامله في حراره
عمدت المنتدى منجم من العلم زاخر= عندنا قد غلي شانه وزاد اعتباره
حامل الذائقه والنقد باالصيت ظافر = كلمة الصدق واجب قولها عن جداره
لامنافق ولامداهن ولاني مساحر = او بحاجة غرض واهداف خلف الستاره
لاولا .. لست من هذا الفصيل المناور = لاغشاه الفشل ناور وزاد انكساره
لست معني بهذا الشرح بل جيت خابر = واسئل الباحث الناقد واسمع خباره
هل مقام العداله طاح والصدق غادر = من صروح الادب وارحل ومحيت اثاّره
اوجديد الزمن هدم علوم الدكاتر = فاح فيهم بلاء منزل وباتوا حياره
او حديث النبي الطاهر رسول البشاير = داهم الورث واجتاح المقر والاداره
رذمهم زاد وبلغن النفوس الحناجر = سرت مزكوم من ريح التتن والسجاره
والنجر ياالشبامي تركوا في المناجر = ذي لهم صيت ويعرفون فن النجاره
والخريبه كما برهوت ماترد حافر = والحطب من دخل به ماضوى به لداره
واهل حبان صنعتهم نقت في الشياذر = من خرج من مسار الاهل ذاق المراره
والذيهوا حصل من حجر في اهل صافر = بايتمي شبيه الوقر ذي في الحجاره
كل من سار عادروب الشروع القواصر = مامعه فائده دائم وهو في خساره
قلتها والجسد والقلب والثوب طاهر = عاوضوء جيت وسرحته وانا عاطهاره
مثل ذاك الجبل مابين صادق وفاجر = والعنب ياالحصيني طاب لك في شجاره
شي يجي لك وشي تاتيه يااهل البصاير = والمقدر قضاء عاالمعرفه والشطاره
باتبع الركب مابازوغ صاعد وحادر = قالوا البدوا كل حاشي يتابع قطاره
بازراره لقاء في الشحر ضوله وناير = ياالله احفظ صحاب الشحر من بازراره
وان نصحته وذكرته بطاّه وغافر = صابني رذم منه ماسليت الطعاره
قلت باحط رحلي عن مثقف وشاطر = خل قلم بوعوض يرسم صحيح العباره
لايفرق شبام العاليه من خشامر = والوزاره يفرقها ثنعشر وزاره
في سهون الاجابه ناوغيري مناظر = من فكار الذي كلن يخذ من فكاره
احبائي المشاهدين اعذروني من التعقيب حيث ماعندي نت اكتب من الشارع وان حدث غلط في كلمه او بيت فهو مني وليس من الشاعر
|
الجواب الشافي من الشيخ الوافي ...!!
عمدة المنتدىجاهـز وبالـرد حاضـر=بوعوض مستعد واليوم رهن الاشاره
جت رسالتك والمطلب من اول لعاشر=صار مفهوم واسمع ياسليل النمـاره
الفوايد لنـا لثنيـن مافيـه خاسـر =بوعوض هكذا دايـم يحـب القـواره
صرح للآ داب يابقديـم لا زال عامـر=مارحل منّه التشويق هـو والاثـاره
والزمن لازم الانسـان لـه بايسايـر=والتطور ضروري في زمان الحضاره
والنجر ف المناجر والمخابر يخابـر=كل واحد معي علمه وعنـدي خبـاره
واهل حبان عالعاده وزايـد وقاصـر=والمهم نجمهم ماقد هوى في مـداره
واهل صافر وحجر اليوم في خير وافر=كلهم فـي القيـاده بطلـو والامـاره
جيت في بازراره والدمع ف المحاجر=تختبر معدنه وبغيت تعـرف عيـاره
مادري هو ذكي ولا غبي مـا يحـاذر=اكبر انسان ف اهل الشحر حرقته ناره
مابقي وقت تنصح لادمي عيف غادر=ياحسن لا تلخبط في صحيح العبـاره
ذا كلامي وردي سجلـه ف الدفاتـر=واحسن القول يابقديم هو ف اختصاره
.