(( عصيدة أم مرعي الحضرمية بالصور ))

[قلب وااافي]

بسم الله الرحمن الرحيم
السلام عليكم ورحمة الله وبركاته


كيفكم عساكم بخير ومتعافين أن شاء الله
اليوم حبيت اقدم لكم عصيدتنا الحضرمية الشعبية والقيمة
العصيد بطريقه قريبتي الغالية أم مرعي بارك الله فيها
اتنمى تكون سهلا عليكم و تعجبكم عسى ربي يسعدكم




المقادير :

كيلو تمر
خمسة أكواب بر (دقيق أحمر)
نصف كوب حيدوان مطحون طحناً ناعماً (

)الحيدوان نوع من الاعشاب معروف في حضرموت )



زيت معصر ) زيت السمسم )



الطريقة :

ننقع التمر في ماء دافئة أو حارة من الليل حتى الصباح وبالإمكان اقل من كذا حسب طراوة التمر .بعد النقع نضع التمر في مصفى ونخرج نواة التمر ونضغط التمر بأيدينا عشان يخرج الرب حق التمر ويتخلص من القشر والنواة مايبقى غير لب التمر
تضيفي شوية ماء علشان يتصفى كويس نضعه بعد ذلك التمر اللي صفيناه في قدر ونضعه على النار وننحط عليه رشة ملح
وبعدين لما يغلي شوي نشيل الرغوة اللي تطلع من التمربعدين نشيل نصفه ونخليه على جنب والنصف الثاني في القدر



نضيف الحيدوان المطحون الى مقدار الدقيق ونخلطه



( الماء الموجود في القدر يكون موازن لكمية الدقيق ) نضع الدقيق والحيدوان شوي شوي على التمر (طبعاً هذا التمر سائل لأنه تمر وماء معاه مخلوط .. لأنه لما صفيناه من قبل حطينا معاه ماء عشان نقدر نصفيه ) نحط الدقيق شوي شوي على المديد ( التمر ) ونحركه ويصير كتله وحده عشان مايتكتل طبعاً في هاذي الحالة يكون مش على النار تحطين القدر على الأرض وتحركين كل شويه .. طبعاً التحريك متعب ويحتاج قوة ..

والتحريك مايكون بملعقة يكون بعصا حق العصيد



بعد ماتحركيه كويس رجعيه على النار واعملي فيه حفر بالعصا وحطي شوي من المديد اللي خلتيه على جنب وحطي منه شوي وارجعي حركيه شوي وهو على النار وبعدين حركيه ولما تشوفيه ثقل شوي خرجيه واعصيديه وهو على الأرض وتحركيه كويس
وتكرري الطريقة من جديد ترجعيه على النار وتحطي شوية مديد وتكررين نفس الطريقة




بعدين إذا شفتي العصيدة صارت لينه مش رطبه كثير ولا قاسية تكون مرنه ومافيها كتل طبعاً
بعد كذا تحطين ملعقتين زيت سمسم عليها في القدر وتعصديها شوي وبعدين شيلي شوية من العصيدة في صحن وادهني اصابعك بشوية زيت ورتبي شكل العصيدة في الصحن واعملي حفرة بالنص وحطي شوية زيت سمسم ...


بهنا وعافيه عسى ربي يسعدكم

.
.
.

[آمال]

طريقة جميلة جدا
والله من يومين مشتهية العصيد

طيب سؤال
فترة نضج هذه العصيد قصيرة يعني كم تستغرق من الوقت من وقت عجنها إلى نضجها ؟؟

ممكن نستخدم طريقتنا اللي نعجن فيها بالمديد كل الدقيق
ثم نحطها في الفرن مرة واحدة نخليها لعدة ساعات

وتخرج وتسبك ان احتاجت مديد او نار اعيدت للفرن
وإلا تكون جاهزة

جزاك الله خيرا على الصور والمقادير الدقيقة

[الماسه*]

اللــــــــــــــــــــه عليك "ياقلبو"شكل العصيدة تجنن
ماشاء الله تبارك الله !!بس هذي تبغى لها عضلات هههههه
واختك ماعندها للاسف حتى شويه ..بس ممكن نستعين
بفتوات الحاره ههههههههه ربي يسعدك خليتني احس بالجوع
وعلى فكره انا ماكنت احب العصيد بتاتا لحد ماطعمت عصيد التمر
عند خالتي فعلا تجنن..باروح اعزم نفسي عند خالتي هع هع هع
بس ان شاء الله ماتنقل من بيتها لما تعرف اني جايه هههههههههه

[أبوعوض الشبامي]

.


شكرا على هذا الموضوع لأكلة تراثية حضرمية مشهورة ... والتي تعززت فكرتها للقاريء والقارئة بالشرح المفصل والصور الجميلة المرفقة في ثنايا الموضوع ..
وأذكر أن السيد عبدالله السقاف قد خصص في آخر جزء (( الجزء الخامس )) من كتابه (( تاريخ الشعراء الحضرميين )) خصص صفحة تناول فيها طريقة تحضير وطبخ (( العصيد ))

وكنت قبل ان أعقب على هذا الموضوع في حوار في احد المنتديات العربية حول (( الوجودية عند الفيلسوف سارتر )) وفجأة انتقلت الى هذه السقيفة وقرأت هذا الموضوع وسطرت
تعقيبي عليه ولسان حالي يردد قول الشاعر الجاهلي (( طرفة بن العبد ))

وَلَسْتُ بِحَلاَّلِ التِّلاَعِ مَخَافَـةً .....وَلكِنْ مَتَى يِسْتَرْفِدِ القَوْمُ أَرْفِدِ
فَإِنْ تَبْغِنِي فِي حَلْقَةِ القَوْمِ تَلْقَنِي..... وَإِنْ تَلْتَمِسْنِي فِي الحَوَانِيْتِ تَصْطَدِ

ولكن أقول :

وَلَسْتُ بِحَلاَّلِ التِّلاَعِ مَخَافَـةً ......وَلكِنْ مَتَى ((يعصد )) القَوْمُ (( أَعصد))
فَإِنْ تَبْغِنِي فِي حَلْقَةِ القَوْمِ تَلْقَنِي ...... وَإِنْ تَلْتَمِسْنِي فِي ((السقيفةِ )) تَصْطَدِ


مرة أخرى شكرا لكاتبة الموضوع المشهي ..

..

[عفاف]

ماشاء الله تبارك الله شكل العصيد حلوة شكلها يشهّي , تسلم يديكِ ويدين أم مرعي .
السؤال هو كم خذت وقت ع النار ؟؟؟؟
ولك خالص الشكر والتحايا .

[سالم ربيع علي]

ماشاء الله تبارك الله

عصيده تفرح (وتسيل العاب) تسلم يد (ام مرعي)
بصراحه منظر عجيب لها في الصحن بنجومها دليل نجاحها
يسلم القلب الوافي على هذا

[عابرة سبيل]

واااااااااااااااااااااااااااااااااو

وايش ذا يا قلب وافي...والله بانك وافيه وقلب وافي...


عصيد,,,وفعلا عصيد على اصولها,,,,جعلها تسلم ايدك وايد ام مرعي...

بس انتبهي لا تنقطب مريتها في العصيد..

اضحك معاك,,,,

انا((والعياذ بالله من انا)) ,,,اسويها بنفس الطريقه,,,لكن بس اختلاف بسيط:

اولا التمر افصصه من النوى والقلافيع((غطاء راس التمره))
بعدين احطه يتخمر شويه مع الماء,,,ومن ثم اضع المويه والتمر في الخلاط البلندر,,,اللي هو الجيك,,وينطحن كله سوا...

تحطينه ينطبخ على النار...وبعدين تصفينه بالمصفايه عشان ما يبقى اي شوائب. /مكن تصفينه قبل ما تطبخينه او بعد,,,انا افضل قبل لانه بعد ما ينطبخ يصبح ثقيل..
والان اصبح المديد جاهز للاستخدام في العصيد((المويه المطبوخه مع التمر اهلنا يسمونها مديد))

اما باقي الخطوات فنفس الشئ..

ومثل ما اشرتي تستمرين بالطبخ وكل شويه تسقين العصيد بالمديد الى ان تجدين بانها لم تعد تتشرب المديد بسهوله,,,تتوقفين عن اضافة المديد لكن تستمرين بالتقليب بالمعصاد..

البعض يضع زيت المعصره والبعض يضع الزبده او السمن ,,واذا لم يتوفر السمن ..
هذه وصفه للحصول على سمن بطعم رائع..
جيبي زبده وحطيها على النار مع ملعقه صغيره هيل وملعقه كمون وخليها تفور شويه بس من دون ما تحترق...

جربي واكيد بتدعين لي..


فعلا نعجز عن شكرك يا قلب وافي,,,,,وعساك دوم بصحه وعافيه.

[الشبامية]

وووووووووووووووووااااااااااااااااااااااااااااووووو ووووووووو

ماشاءالله تبارك الله يعطيك الف عافية انتى وام مرعي

روعة جد الف شكر حبيبتى انا عن نفسي مااعرف اسويها يادوب الهريس اضبطها وكان ودي اتعلمها

اعرف مقدايرها بس خطواتها مااعرفها لكن بعد هالشرح المفصل ان شاءالله اجربها خلال هالاسبوع

وانزلك صور

تحياتى

[شجين]

ماشاء الله عصيد ام مرعي ؟ تتصروط ؟ ما تنشب في الحلقوم -وا نعاد شي في فيجان بغيه -تدفيك لو انك في بركه ثلج

جابت الجوع - قلب الله يهديها

[عبدالقادر صالح فدعق]

الله عليك ياقلب وعلى هذا المجهود ..

ويابخته أبو مرعي ... بهذي العصيدة الشهية ..


تسلمي ياقلب .

.