لو بيننا ويكليكس بايكشف المستور !!!!!!!.

[عيون المكلا]

ياغلطة العمر يالمفروض بالقوه = كوشت عابروم وتتآمر على فوه
وقتك مع الأوله والثانيه محزور = لو بيننا ويكليكس بايكشف المستور
حبك مزيف ومانته صادق النيه = ولاقواعد على ساسات مبنيه
سنين وانته تلف على بنتنا وتدور = لوبيننا ويكليكس بايكشف المستور
واليوم بانت مقاصيدك واهدافك = من قبل توصل بايكسرون مجدافك
بالسيف بايقطعون الحبل ذي مزرور= لو بيننا ويكليكس بايكشف المستور
تلقي لها سوم عالوادي وعالشاطي =متعوده المشي في العالي وفي الواطي
من كثر خطواتها صم الحجر محفور =لو بيننا ويكليكس بايكشف المستور
ماتشوف بالعين غيرك يكسر الخاطر = لاتحسب انك ذكي في لعبتك شاطر
مابعد تحرك بجد للعرقله مسرور = لو بيننا ويكليكس بايكشف المستور
تبغى كلاحه ومنك يمتعض ناصر = لك قلب قاسي وعقلك لم يزل قاصر
وفي خيالك تشيدها فلل وقصور = لو بيننا ويكليكس بايكشف المستور
ومن الصراحه وقول الصدق تتنفرز = وتقطع اوشاحهم والثوب لمطرز
وترغم ادريولك يشهد شهادة زور = لو بيننا ويكليكس بايكشف المستور
في الحب قالوا الثقه يالقادري راحه = خلك من الشك هزت قلبه اجراحه
حيد الرضم من تهاويلك صبح مشطور = لوبيننا ويكليكس بايكشف المستور
مارد لك امر وعطاك الجسد والروح= ولانسي يوم ماكنته تجي وتروح
ماوقفت لحظه لوحدك فوق باب السور= لو بيننا ويكليكس بايكشف المستور
روح وشف حد مثلك في الهوى فاضي = ماحد من الناس بك في ديرتي راضي
الأوله والأخيره حرثنا عا الثور = لو بيننا ويكليكس بايكشف المستور