((حلّ الرحيل وفرّقوا شمل الاحباب)):

**خالد بن مهنا** · 07-03-2012, 12:37 AM

((حلّ الرحيل وفرّقوا شمل الاحباب)):
====================
حلّ الرحيل وفرّقوا شمـــل الاحبـــاب
ناسٍ علــى فرقــا الاحبّـــة مغــاليــل
غدى لهم مع طلعة الشمس ضبضاب
وسالت دموع العين مثـــل الهماليــل
وقفت اراعي سيد تلعـــات الارقـــاب
واغضي وهو يغضي بسود مظاليـــل
بشفــاة يظهـــر ماتخفــى بالالبـــاب
وبشـفاي افصّل له عن الحال تفصيل
اســـرار ودٍ بيـــن صايــب ومنصـــاب
نجوى لها باقصى الضمايــــر مداهيل
سرايرٍ تنســـاب من تحــــت الاجياب
لصدورٍ اطهـــر من قــراح الشهاليـــل
روحي على حبّه لهـــا كــم جـــذّاب
ويتل قلبـــي عــذب الانيـــاب بالحيل
لو ان حبـّه يطعـــن القلـــب باحــراب
ابرى ليا شمّيـــت بيــضٍ معاسيــــل
على نقـــا مانــي بغـــادر وكسـّــاب
وبالعــرض والله مانــدوّر محـــاصيـــل
مانـي بمــن يجرح عشيره بالاسباب
ويحـــط له مــع كــل ريـــعٍ محابيـــل
بس الحديث وقرعـــة النــاب بالنــاب
واظهــار مكنـــون الغــلا والتعاليـــــل
عزّي لمن مثلي من الحــب منصـاب
تارد عليـــه همـــوم قلبـــه زعاجيــل
اليــا رقـــا مرقـــاب نــاداه مـــرقـــاب
بمفارق الخــلّان شـــاف الغــرابيـــل
الله لايجـــــزي عريـبــيــن الانســاب
لو هم على ماقيل سوٍا على الخـيل
اللي سعوا بافـراق وضــاح الانيــــاب
وخلّوني اجـزع من عنا الغبن واشيل
فرقا ومنها القلــب وسط الحشا ذاب
وعسى هل الفـرقا لهم صافي الويل
عسى يصادفهــم من الغيث سكّاب
وبله غضـــب مابيـه يمطر لهم سيل
ابيه يجــــدع مثــل قـــلّات الاطــواب
منها البــرد ينمـــاز كبـــر المخاليـــل
وصواعــــقٍ منهـــا المواليـــد شيّاب
والحــي منهــم ذاهــل العقل بهليل
بامـــر الكريــم ومن ترجـّـاه ماخــاب
يمطر عليهـم مثـل ماجـــا هل الفيل
الا لطيف الــــروح يذريـــه بحــجــاب
كنّه براس الطور وهمّــه ورى النيــل
ويرجع علينــا جادلٍ يــزها الاســلاب
من خلقتـه مانيش عرضــه ولا قيــل
بــه مــايعيبــه للبعيـــدين واقـــــراب
حاشا ولا تلقــى عليــه المــداخيــل
نقي عرض ولا عشـــق كـل نصّــاب
الجوهر الغالـــي رفيـــع المنــاويـــل
وانا يصارحنـــــي بــلا ســـرّ وكتــاب
وعن حالته يشرح لي العدل والميـل
هرجه على قلبي كما الشهد ينذاب
وقلبي على قلبه يــردّ المراسيـــــل
كنّــه بعينــي لو غضــب كــل عتـاب
بدرٍ تعلّــى كوكــب الجـدي وسهـيل
طفــلٍ سلب مكنون عقلي والالبـاب
عليـــه اجــاوب نايحـــات البلابيــــل
ياشطـون قلبـــي زجّي السرّ بكتاب
منـي لابـو غشـّــام زبـن المشاكيل
قولي رفيقـــه من هوى الزين ماتاب
ويرجيــه رجو البدو وبـل المخــاييــل
وبالليـــل ياقف له عــن النـوم حرّاب
وكنّــه يلــوج بمــوق عينـه سماليل

*من شعر الامير محمد الاحمد السديري