القصيده اللتي القيت في حفل بانعيم

[عمر الذيب]

سلام وتحيات بعد التر حبه=من صاحب الناموس بالجمع الغفير
بو عبد رحمن الذي نعتز به=في الوادي القبلي وفي الشرقي كثير
من حقي اتفاخر الى تفاخرت به=رجال منه ما يجي الا كل خير
بعطيه حقه خائف اني اغضبه=ويقول لي مانا ملك والا امير
والا بعيني فوق عالي منصبه=بين القمر ملقيه والنجم المنير
وبو شرف ما تقدر ان تتجنبه=رجال عالي الفكر ومحنك خبير
ماشق باصحابه اكيد يشقبه=وما فرحهم يفرح الرجل البصير
ذاباب والثاني كلامي بقلبه=للعرس واهل العرس في اليوم النوير
اني عن الرضحين واهله منتبه=واني عن اهل رباط باكوبن سفير
العرس واحد والفرح والموجبه=والدار وحده للصغير والكبير
لا ذا ولا هذاك بي بايشتبه=ليلة فرح فائز بن احمد بن جبير
باوفي الكلمه وما اوعدت به=سلام وتهاني لكم عبر الاثير
مني ومن اهل البلاد الطيبه=من راس باواكد وصاعد للضمير
تعداد اوراق الشجارالمخضبه=والزهرلي به يثمر الغصن الخضير
واعداد برقه في القنوف المطهبه=واعداد ما طائرفي الدنياء يطير
هذا من الرضحين وانت اتحسبه=والمخشبي ما قصر الخال الجوير
جاري ومن بعض الحجج باعقبه=بنقل تهانيه لكم مسك وعبير
من شان فائز كسر راسي بعصبه=وباسبح لجله في البحر الغزير
باجيب له في الحفل كل ما يعجبه=الشال والدسمال والثوب الحرير
عزه وعز جده وابوه ونحسبه=عزي وراس المال في اليوم الخطير
وافخربارضي والجمال المنيبه=لي من بلادي تعصر الجلجل عصير
كم من جمل هدار في الضيق اهربه= بيسير قدامك وهو يهدر هدير
وان ما كفى واحد كلامك اثنبه=باتلحق الرضحين من خلفك يسير
يعرفه بو فائز وعنده تجربه= اسمع بها عنه ونا عدني صغير
لا جات للرضحين عنده مطلبه=يطعن بها مايهزها وسط الجفير
معروف حلال الامور المحنبه=لاجيت له في يوم تحقيق المصير

[السعدي علي]

الله يعطيك العافية يابوطارق والف شكر لك لقد امتعتنا بهذ الطرح
تحياتي لك وتقديري واحترامي

[خالد بن مهنا]

كلام يابو طارق كلام قوي وجميل جدأ,من شاعر قدير بارك الله فيك والله يوفق لما فيه الخير

اخوك/خالد بن مهنا

[محمد سعيد بن مخاشن]

قصيدة في منتهى الروعة أخي بو طارق يحس الإنسان أنها صادرة من القلب.

والله يجنبنا وياك الأمور المحنبة.

بس عرس فايز أخذك من السقيفة أخذا وفي نهاية المطاف العروسة للعريس والحرمان من شعرك ومداخلاتك للمتاعيس

حتى دان الحموم ما قدرت تدخل عليه وتقول يا خير هو أو خه منـّــه

وأيضا ولد الحموم خليته للشمس والقمر تتناهشه الذياب الجائعة

والحليم فهيم

[مرعي بن صالح بن سميدع]

كم من جمل هدار في الضيق اهربـه=بيسير قدامـك وهـو يهـدر هديـر


كلااااااااااااااااااااااااااااام يابوطارق صح لسانك

[بن احمد]

كفوا يابوطارق والنعم والله في الرضحين واهله
صح لسانك والربع يستاهلون وانت ولد الرضحين المخلص
قصيده منبريه اكثر من رائعه لا فظ فوك

[جمعان بانافع]

=كلك ذوق يابوطارق كلام جميل صح لسانك يالغالي

[ابوفضل سالم]

اقتباس : المشاركة الأصلية كتبت بواسطة عمر الذيب [ مشاهدة المشاركة ]

ني عن الرضحين واهله منتبه=واني عن اهل رباط باكوبن سفير

كفيت ووفيت يا بو طارق
نعم السفير لوادي عمد
ونحن فخورين بك شاعر فحل حامل راية الشعر بالعلالي
لك تحياتي
ابو فضل سالم

[صالح باعمران ابو زايد]

صح لسانك يابو طارق قصيدة في محلها.
ونعم بك وباهل الرضحين الناس الاوفياء
تقبل مروري واعجابي
اخوك صالح باعمران

[ابوهاني1]

قصيده تطاول النجوم علوا وشموخ

ابو طارق كلّك على بعض راااااااااااااااااائع

صح قلبك