اقتباس :
المشاركة الأصلية كتبت بواسطة محمد سعيد بن مخاشن
[ مشاهدة المشاركة ]
|
أهدي هذه القصيدة المتواضعة إلى الغالي أبي فضل سالم لأننـــــــــي
أعرف إن بو فضل في العشق مرجع=با مجاراته ولو كان بيتين
منتظر رأيه ورده وبا اسمع=ما يجيبه من زيان التلاحين
في عجل بالله بو فضل وإسرع=صيغ وانظم لي درر ما يملّين
القصيدة بعنوان
لجله إرعى نجمة الصبح
قلب بو صالح يحِن ما تقنّع=لا متى يا عين بالدّم تبكين؟
هاجِسي دايم مشتّت مشرّع=في غشيّم ما بلغ سن عشرين
لجله إرعى نجمة الصبح ما اهجع=والثريّا والقمر والميازين
له محيّا عينة الزّهر وأينع=عطر ينفح من ردانه رياحين
هو حياتي دوب أنا به مولّع=سلوة الخاطر مليك المحبّين
مُهْر قدّامي غبيشه تجزّع=قلت: يا خيل الزّناتي على وين؟
يا التّرِف يا الهَرْكَلي يا المدلّع=ليه تقطع قلب عاشقك نصّين؟
قال لي: لو كنت فارس تبرّع=أو لِبِد لا ما معك شي زُمُكّين
والهوى شف فيه مندر ومطلع=يا محمد ... وإنت عاشق مسيكين
من شعق باصْبُعه ما عذر يرقع=با يقدّم راحَتِه غصْب بعدين
نا هويتك بس حِذْرَك تشرْبع=للبيوت أبواب عا الشّرع والدين
لا تقع مقدام جم وتوقّع=لنّ أهلي بطشهم كالسلاطين
وإطلب المولى ودايم ترَكْوَع=وإقضي الحاجات بالطيب واللين
قلت: ماني طفل عا الدّيد يرضع=لا تناصح من شقع ست وخمسين
بن مخاشن صار لحمه مَمَزّع=وإنبرى من غير شفره وسكّين
والنّبي من عَشْقَتَك كيف برجع؟=بتبَعَك حتى إلى الرّوس والصّين
لا دواء لي زين وعلاج ينفع=غير حضنك بس يا قرّة العين
لو تبا مليون والله بدفع=نا قتلني البعد يا خِل والبين
بس ردّ لي رد في الحال فيسع=أو تباني سير سعف المجانين؟؟؟
|
كلاام يابو صالح والله يستر من عشقة الشيبان
جعلك على القوه يابوصالح
تقبل اعجابي بما كتبت
تحياتي عارف النهدي,