مدوديّات/ الفضول قتل بوعامر

[المدودي]

لي ساعتين و انا دوور داخل السيقفه على المقيل ... وين ولّى و ين راح ؟؟
اللي كنت متأكد منّه أننا لو بغيت أدخل المقيل .. نسبّر نحسب من أول سقيفة .. سقيفة التميّز .. و نمشي سبع خطوات .. السابعه هي المقيل .. نضغط عليها .. و نلقي موضوع جديد ..
و لما دخلت ذلحين و ما حصلت المقيل .. قلت قبض بالمكن .. و حسُب من فوق .. بس و صلت لما سقيفة مواضيعها ما تدل على انها المقيل .. و بعد التدقيق و تنظيف النظارات أكثر من خمس مرات .. تبين لي أنها السقيفة الدينية .. طبعا ً الكلام اللي بغيت با اكتبه ما يسلك في السيقفة الدينية .. بالتالي خرجت و رجعت نحسب مره أخرى ..
و تذكرت شي ثاني كنت اعمله علامه لي لو تضيّعت و ما جيت على طريق المقيل .. و هو أن المقيل بين سقيفة التراث و السقيفة التقنية ..
و الحمد لله و صلت .. بس حصلتهم غيروا أسمه .. و ما علينا .. الموضوع اللي معي أهم ..

بسم الله ...
من زمان كنت اسمع بالمثل لي يقول ( الفضول قتل عزوز ) .. و باالبيت الشعري إللي على ما أظن يقول :
ومن الفضول ما قتل ..... >>> تحرييييف
القصد صاحبنا بو عامر ... أكيد معظم الحلان الجدد ما يعرفونه ... يتعبون أنفسهم شُوي و يعملون له بحث...

كنا نحن وياه على السيارة .. ومن الصبح سرحنا قال با نتمشى .. فيين با نتمشى ... مش عارف ..
البلاد كلها غبره دبره و ما شي فيها مكان نتمشى فيه ..
المهم تقصّفت رقابنا من النطنطه .. و حبْـترت مقاعدنا من كثر الجلسة على الكرسي المفروش بالباغة ..
و في الطريق و نحن راجعين .. شفنا قدامنا حادث ..
بو عامر .. قال :
فرصة .. من صبح الله ندور و ما شفنا شي يلفت النظر من شان نخابر به لا وصلنا ..
..... و وقف السيارة با ينزل
قلت له بو عامر : كيه قلع الفضول و شغّل موترك و شل نحن من هنا ...
بس بو عامر ركب كوره .. و قال : ظروري نشوف الحادث كيه و قع و من راح فيه .. من شان لو حد تكلم فيه نقدر نوصف و نقول لهم أنا و قفت على الحادث و شفته بعيني .. و ذيك الساعة حتى لو بغونا احلف با احلف و انا واثق ..
و مسكين ما حتى كمل كلامه و فتح الباب .....

..

..

..

..

..

..

تجي له سيارة تخمّه هو و الباب ..
و رجعنا لا البلاد نخابر الناس بطحية بو عامر ...

[المدودي]

نسيت ما قول لكم حاجه ...
بو عامر بخير ... كسر في ساقه الأيمن .. و بُخش فوق عينه .. أما الباب .. الله شلّه

[باغوزه]

الكسر يتجبر يالمدودي والبخش بابيتباخر ان شاء الله .. المهم الباب عسى ماشى خراب فيه ؟

[شيخ القبايل.]

قل له يدهن مكان الجرح
( الباب )

[المدودي]

هلا بكبير الحشاشين .. با غوزه ..
الحمد لله على كل حال .. و عارفين يا خوي ان الكسر يتجبّر .. بس بو عمار قِور .. و مارضي يدخل المستشفى ...
قال : ما بغيت حد يعمّر رجلي غير العامري صاحب تاربه ...

و وين نحن ذلحين من العامري ؟؟

محاولات إقناعة جارية ... و ربك يعين ..

أما الباب .. شفنا دُخت اليوم من كثر اللفه في محلات التشليح ندوّر باب يسلك بدل الباب اللي راح ..
ــــــــــــــــــــــــــــــــ

باذيب ...
يا ريت كان الدهن با ينفع .. كان نحن دهن السياره كلها و الزايد ندهن به بو عامر ..

[باغوزه]

لا انقلد باب بايفتح لنا الله يالمدودي ثمانين باب .. الباب بوصفك على باب زين ولعاد تروح لا تشليح ولا خرابيط مر وانته رايح لسيئون عند محمد عبدون قله يقول باغوزه عطنا باب حق حوش حديد ومايهمك الحساب عندنا .. واما كسر بوعامر ياخوى كسر الرجل يتجبر لكن هت لى فى كسر الخاطر مابايعرف له لا العامري ولا غيره وخوك خاطره مكسور ..

[الشبامي]

اقتباس :

لي ساعتين و انا دوور داخل السيقفه على المقيل ... وين ولّى و ين راح ؟؟ اللي كنت متأكد منّه أننا لو بغيت أدخل المقيل .. نسبّر نحسب من أول سقيفة .. سقيفة التميّز .. و نمشي سبع خطوات .. السابعه هي المقيل .. نضغط عليها .. و نلقي موضوع جديد .. و لما دخلت ذلحين و ما حصلت المقيل .. قلت قبض بالمكن .. و حسُب من فوق .. بس و صلت لما سقيفة مواضيعها ما تدل على انها المقيل .. و بعد التدقيق و تنظيف النظارات أكثر من خمس مرات .. تبين لي أنها السقيفة الدينية .. طبعا ً الكلام اللي بغيت با اكتبه ما يسلك في السيقفة الدينية .. بالتالي خرجت و رجعت نحسب مره أخرى ..

والله لك وحشه يالمدودي انت وبوعامر
وسلامات لبوعامر من البخوش والكسور

[صقر الكتائب]

ان شاء الله يبطل الفضول مره ثانية

[الحاير]

ياخير بوعامر رجال طيب وعلى نيته
بس يومه قور زي ماقال المدودي الله يرحمة

[عابرة سبيل]

اعتقد انه اصبح عندي ادمان على مواضيع باغوزه والمدودي..توي جاي من برا ..تعبان وطفشان ومفلس وباقي على اول الشهر14يوم..قريت مواضيعكم وضحكت لدرجة خفت احد يشوفني ويشك فيني..فعلا انتوا الاثنين فاكهة الموقع..سلامة بو عامر وبنرسله قصعة حلوى لا نزل الراتب(حق خروجه بالسلامه)..وسلامة خاطرك ياباغوزه من الكسر..