سراااااااااااااااااااااااااااااااااااب الجول

[عمر الذيب]

عمر الذيب في سراب الجول

يقول الذيب بو طارق عمر يهل الهوى العذري=معي قصه حقيقيه لكم ماهي من المجهول
شهر وسنين كاتمها وصاح الهجس من صبري=يباني قول ما عندي او اسمحله وهو بيقول
وبعد انقاش هذا اليوم حانت ساعة النشري=وبانطرح لكم قصة هوانا بعرضها والطول
عرفته في سنة اربعمايه واثنعشر الهجري=وعاده خيب ما يدري بخلق الله ويش اتقول
احبه واعشقه يهل الهوى والعشق من بدري=وربيته على يدي مسي حرك به الهندول
ازوره كل يوم الصبح واجي الظهر والعصري=وكم قد سرت عارجلي لشانه في نصاف اليول
بلغ في العمر ستعشر عطيته سري وجهري=وعام ونص خذ خط الهوى مابيننا مشغول
اسرني طرفه الناعس ونا سلمت له امري=وفي بحر الهوى غصنا الما قاعته واللول
هو الاسر ونا الماسور وتمتعت في اسري=وفي اسر المحبه كل ما جاب المحب مقبول
معاه ابسط صباح الخير كيف اصبحت ياعمري=ونتغدى ونتعشى كلام السانه المعسول
بدون امبالغه عشقه بشراييني مسا يجري =مجاري الدم لي يجري بجسمي طلوع والا نزول
اشوفه في سما عشقي وشوفه بري وبحري=وحسه الاكسجين اللي بها يتنفس المعلول
ولكن ذي السنه جاني خبر عالبال مايطري=برى لحمي من اعظامي ومنه عادني مذهول
تفحصت الخبر وكتمت غيضي في وسط صدري=ثلاث ايام وليالي رهيبه شي مش معقول
حجزت التذكره في بن معمر قبل مايسري=وصبحت الوطن من حيث لا كافل ولا مكفول
لحقت الامر جد والمال هو والنخل يالبكري=معاده حسب خبري فيه لا طلعه ولا شي سبول
تعبت انهارت اعصابي ولاحد شد من ازري=تحملت الاذيه والوجع عدلي امل مامول
وكن الصبح من بدري غبش ياخالد المري=عبر جنبي ولا سلم علي المحبوب ياللهول
عبر شاخط ولكنه رمى بسلاحه الذري=بطرف العين ودعني ونا لا حي ولا مقتول
تمنيت الكفن والمغتسل والنعش والقبري=ولكن قبل دفني تركوني ها هنا مزقول
الما يمر ويشوف الذي سببه من امري=ويترحم علي ونا بنعشي بينكم محمول
حلم كله ونا نايم ولما اذن الفجري=تبين لي الحلم انه فصيله من سراب الجول