قصيده غزليه للشاعر طالب باتيس ابوراضي

[طالب النعماني]

الاخوه حلان السقيفه تحيه طيه
يسعدني ان اضع قصيدتي بين ايايكم وتهمني ردودكم وانتقاداتكم فلا تبخلون علي بأرائكم وانتقاداتكم ان وجدت

قصيدة ابوراضي الثاني
طالب بن حسن باتيس النعماني

قال المعنى زعل نومي من اعياني = وامسيت سهران دير افكار وهميه
ماجاني النوم والمحبوب ماجاني = ماجاني إلا خلاف اسمه وطاريه
ليلة طلع في السماء بن سبع وثماني= واشرق بنوره على حي العزيزيه
هاجت شجوني وهز الشوق وجداني=واشتقت لك شوق جم ياطيب النيه
يامن جمالك وحسنك عجز الساني =من حوري العين تسوى مئية حوريه
سبحان من صورك في هئية انساني=وانته ملاك البشر تحكم بحريه
انته ملك في نظر بوراضي الثاني=تحكم وترسم بدون اجيوش حربيه
تحكم قلوب البشر بأسلوب فناني=فنان في الذوق لك موضات فنيه
ذواق فعلا وذوقك ذوق لبناني=كأنك بلبنان عائش والسعوديه
ياطيب الاصل نعم الاصل قحطاني=عربي النسب والحسب ولغتك عربيه
لك جعد هندي ملون عدة الواني =سبحان ربي عطاك اجعود هنديه
وتقول شلال جاري فوق لمتاني=شلال داجي وفيه امواج بحريه
واعيون حوراء ورمش العين صنعاني=لك رمش يمني ولك عينين نجديه
تفتن بها الناس طرفك طرف فتاني=كل من شخلته يمر بأزمات قلبيه
والخشم منصوب كأنه سيف روماني=مدته مده وحده حد جنبيه
واخدود حمراء طريه ورد ريحاني=داخل بساتين مكنونه ومحميه
والثغر فيه العسل مشنون جرداني=فيه الدواء للكبد وامراض مخفيه
كلما تبسمت يبرق برق رشاني=تحسبه بارق برق في راس منشيه
والعنق مهياه كنه ريم جفلاني=مرصوعه رصعه ذهب واحجار ماسيّه
والصدر بستان فيه احبوب رماني=والبطن طاقه حرير الهند مطويه
والخصر تلتف عليه الخمس ليماني=والعجز سمبوك رسى في شواطيه
واقدام بالنقش مرسومه وسيقاني=كل ما دحق في بلد غبراء ضوت حيه
والطول والوزن مايحتاج ميزاني=موزون جسمك طلع ميه على ميه
يحماك ربي من الحساد والشاني= من عين عيّان ماصلى على نبيه
ياطيب النفس لك باسرح العاني=بعطيه لك مهر ماواحد دفع زيه
الماس رورسي وبلجيكي وعثماني=يسوى ملايين دولارات نقديه
ومن الذهب مايقدر به ذهب غاني=عشره قناطير مشغولات هنديه
واربع تريلات فيها الزي لسباني=كل الموديلات شرقيه وغربيه
زايد ثنعشر كروزر جيب ياباني=زايد ثنعشر همر بأرقام دوليه
مسموح تمشي بهن في كل لوطاني=من دون تحتاج شي رخصه وملكيه
ومن البنادق ثنعشر وارد الماني=زايد ثنعشر كلاشنكوف روسيه
هذا لوالدك واما الخال له ثاني =بعطيه سوق العروبه والعقاريه
وانته لك الحكم عالقاصي وعالداني=بلقيك في قصر له برجين محميه
محمي بعسكري واجيوشي وفرساني=قدام بابه ثنعشر طقم دوريه
يحمون عرش الولايه طول لزماني=واما الخدم والحشم من كل جنسيه
مصري وهندي وبنقالي وسوداني=واشكال والوان عربيه وعجميه
والختم صلوا على احمد نسل عدناني=صلاه تغشى ضريحه صبح وعشيه