زين القوافي وينها

[الملبّد]

زين القوافي وينها
مالقيت الا شينها
عرجا وعورا عينها
وعوار مابعده عوار

كانت لها صيت وخبر
وبحبها قلبي خضر
واليوم ماله شي اثر
روح مع زاخي الغبار

اللوم يوصل اهلها
مالومها عافعلها
كل ماحصل من جهلها
تصبح وتمسي في الديار

هنوه لكل عاشق هرم
يشبع بها شمه وضم
الأب ماهو محترم
ترقص وهو يفقع بطار

[ابو نجود]

النااااس تقضي دينها
والصبر ضاااايع بينها
يوم اختفى بو عينها
خلا السيقفه للصغااار

يشهد عليها من حضر
الوضع فيها ما استقر
صارت من املاك البير
حطوا لهم فيها مزار

كم تنقضي في ظلها
اوقاااات ماشي مثلها
في كثرهاااا او قلها
كااانت لنا يا خير دار

واليوم جابت لي ورم
لا جيت با حط القدم
في داخلي زاد الالم
ولعاد حصلت العقار

[الملبّد]

ياريت لي عدى يعود
وتعود ايام السعود
دندن وغن يابو نجود
واعزف على لحن الوتار

حسبي على منهو السبب
في وضعها يوم انقلب
فرفر وطير بالعرب
اللي لهم صيت وخبار

مقهور من وضع الدبور
الضبع نكد بالنمور
والبوم تلعب ع الصقور
لي صار ماقد يوم صار

الصدق قل في المجتمع
ناديت ماواحد سمع
ماحد تقي صادق ورع
ينهيهم اصحاب القمار

[ابو نجود]

ما راح لايمكن يعود
لو فيه باتدفع نقود
والله ينصف في حمود
ملقي مطب رايح شتار

قهري على كم من شنب
عالعز والناموس شب
راجع حسابه وانسحب
ويقول محسوم القرار

لاجات غلطه من سرور
من هو علينا با يشور
ويقولها وسط الحضور
مطرود يامول الخمار

وان عاد في حالك وسع
يا صاحبيي والا قنع
شف بايحط فوق الوجع
فلفل معا شوية بهار