قصيدة لشاب فقير خطب بنت عمه المليونيره

[المهااااااااااجر]

هذه القصيده لشاب فقير أقدم لخطب بنت عمه المليونير أرجوا أن تعجبكم و تنال أستحسانكم

إليكم القصيدة

سبحان من يرزق بتوع الملاييـن*** الرازق اللي ما يخيب الرجـا بـه=
لي عم عنده معـرضٍ للصواليـن ***أموت واعرف بس من وين جابـه=
وإذا سألته قـال بعـت الدكاكيـن***ما يدري إني ما هضمت الإجابة=
الشاهد إني رحت له قبـل يوميـن***في قصره العامـر ودقيـت بابـه=
قال أرحب أرحب عدّد ورد البساتين***يا مرحبا باللـي لفـا يـا هلا بـه=
قلت البقا عـدّ النفـل والرياحيـن ***يا شيخ شمل أهل الكرم والذرابـه=
قال اسلم الله يحفظك لي من العين***وآمر أوامر حضرتـك مستجابـة=
قلت الصراحة طالبٍ قرب غاليـن*** ودي تزوجنـي كريمتـك يـابـه =
ثنّى وقال أهليـن والله وسهليـن***والكون ترخص لجل عينك رقابـه=
لكن ترا عندي شـروط وقوانيـن***قلت اشرط اشرط يا حبيب الغلابـة=
قال أولاً مهر العروسـة ثمانيـن***غير الرسوم وغير حق العصابـة=
والثانية عمك يبي منـك سبعيـن***رسم الأبـوّة والنسـب والقرابـة =
وأم العروسة حقها منـك ستيـن***عشانها ست الحسـن والمهابـة=
وإخوانها كلن يبي منـك خمسيـن***عداً ونقـداً تنـدرج فـي حسابـه =
وخواتها الخمس عطهن من ثلاثين***عشان تتوثـق عـروق النسابـة=
وتجيب طقم عيار واحد وعشرين***وخاتم من الماس المصفى ترابـه=
وأكياس متروسة كعوب وفساتيـن***ألوانهـا وأشكالهـا مـا تشابـه=
وموتر بسواقـه وفيـلا بدوريـن***أثاثهـا مـن بطرتـه ينحكـى بـه=
واحجز لنا قاعة بقصر السلاطيـن***واحجز بهـا رقاصتيـن وربابـه=
هذي الشروط اللي على بالي الحين***وذكرني اللي ما حسبنـا حسابـه=
قلت اذكر الله يا عـدو المساكيـن***واستغفـره لا يبتلـيـك بعـذابـه=
الظاهر إنك منت عارف أنا ميـن ***أنا لو أرقى فـوق متـن السحابـه=
ما جبت حتى نص درزن مواعيـن***واضحك بكيفك واعتبرهـا دعابـة =
شروطكم هذي شـروط المجانيـن***شروطكم شغـل ابتـزاز ونهابـه=
شروطكم تقصم ظهـور البعاريـن***شروطكـم همّـن وغـم وكآبـه =
شروطكم والله سيوف وسكاكيـن***تذبح بنات المجتمع مـع شبابـه=
وين الرضا والعطف واليسر والليـن***اللي ذكرهـا الله بمحكـم كتابـه =
وين الصفات اللي أمرنا بها الديـن **وين اختفى نهج النبي والصحابـة =
يا عم جعل اللي خلقنا من الطيـن**يرد عقلك مـن خطـاه لصوابـه =
ويجعل نصيبي عند غيرك قل آمين**ويحسن عزا الصابر ويجزل ثوابه =
قال أنت لو فكرت تفكير صاحيـن***ما شفت في مجمل شروطي غرابه =
حنا بعصـر العولمـة والمزاييـن *** ماهوب عصر الفلسفة والخطابـة =
الناس تسعى للرتـب والنياشيـن***وأنت اهتمامك بالشعـر والكتابـة =
والشعر ما ينفعك لو هو دواويـن***ما دام جيبك مثـل بيـت الخرابـة =
يا بوك لا تسمع كلام المصاخيـن***واسأل مجرب عاش في وسط غابه=
قلت الله أكبر يا محـرر فلسطيـن ***من يسمعك يحسبك ذيـب الذيابـه=
تراك شايب رأس مالـك رياليـن ***والبنت ما تسوى جنـاح الذبابـة=
قال انقلع مالت على وجهك الشين*** *لا عاد أشوفـك عندنـا ياقمامه=
قلت ابشر أبشر لكن الباب من وين**وأقفيت من عنده على صوت بابـه=

[سالم الدهبلي]

يشرفي اخي المهاجر ان اكون الاول من يمر على هذه القصيده
تقبال اعجابي والله يوفقك

[صوت سيبان]

لكل مجتهد نصيب
والله يرزق من يشاء بدون حساب

القصيده في مجملها ممتازه وتحكي واقع مرير في مجتمعنا
من غلاء المهور0 ملاحظتي على الشاعر في مطلع القصيده
وأستغرابه كيف جمع عمه الدراهم وكيف يخفي ماعنده من
أملاك وهناء الشاعر تلبسه نوع من أنواع الحسد
شكراً للشاعر والناقل
وتقبل تحياتي

[صالح باعمران ابو زايد]

اخي المهااااااااجر الف شكر لك على هذا النقل
واهلا وسهلا بعودتك من جديد
تحياتي لك وتقبل مروري واعجابي
اخوك صالح باعمران

[دمعة]

قصيدة حلوة بس حرام عليه يقول على بنت عمه انها ماتسوى جناح ذبابة، اجل هو ليه راح يخطبها
ههههههههههههههههههه
سوري

تقبل تحياتي

[بن احمد]

صح الله بدن شاعرها وشكرا لاخ الناقل بس البيت اللي قبل الاخير
ماهو مضبوط كلمة قمامه وانتم كراما اصلا ماهي على القافيه
والصح يازلابه ارجو من الاخ الناقل تحري الدقه وامانة النقل وشكرا على مجهودك

[المهااااااااااجر]

شكرا لكم جميعا على مروركم الكريم=

[المهااااااااااجر]

اقتباس : المشاركة الأصلية كتبت بواسطة بن احمد [ مشاهدة المشاركة ]

صح الله بدن شاعرها وشكرا لاخ الناقل بس البيت اللي قبل الاخير ماهو مضبوط كلمة قمامه وانتم كراما اصلا ماهي على القافيه والصح يازلابه ارجو من الاخ الناقل تحري الدقه وامانة النقل وشكرا على مجهودك

تشكر اخي على التنبيه وصحيح كلامك فيه اختلال بالقافيه=
ولكن النقل تم كما هو موجود=