سقوط مسجد الجامع أغرب من سقوط بغداد ... خبر عاجل من شبام

[الصهدود]

السلام عليكم يا حلان السقيفة اليكم الخبر مفصل !!!
حصلت تغييرات هذه السنه في مسجد الجامع اثر على شبام سلبا وايجابا .. الموضوع ان الشيخ عمر باعبيد جاب شباب من مسجد بن احمد يصلون بالناس عشاء وتراويح وياخير شي اول ليلة ولعاد شي من الموالات بين كل ركعتين . والغريب انهم رضيوا يصلون ثلاثة عشرين ركعة وانهم يبسملون وهذه في حد ذاته خطوه نحو الصح و عدم التشدد ..
المهم ثاني يوم بعد صلاة الظهر معاد شي تشهوده بعد الصلاة [ اشهد ان لا اله الا الله استغفر الله نسألك الجنة ونعوذ بك من النار ... الخ ] .
صاحوا الشيبان وقام كرامه عبيد حم ونسف الشيخ عمر ولا خلا ولا بقى فيه وقال كلام مايقوله مفطر واش عاد صيم وغلق الباقي جمعان خراز وعطا الشيخ عمر ماتيسر من الكلام القبيح وحصلت فوضه في المسجد لكن الامام وقع عاقل ولا رد عليهم بزينه ولاعيفه ولا كأن حد يتكلم قدامه ..
المهم ان الشيبان[ الله ينصف ] يخرع ولعاد يحبونه بعد الي حصل وبصراحه شبام فيها رمضان هذه السنه ماهو كما كل سنه الناس مهمومين وزاد الطين بله هذا الي حصل اول يوم في رمضان ..
والقصه ما انتهت الساده زعلوا وراحوا فتحوا مسجد الحاره وسوو فيه جهاز ومكرفونات وطرحوا السيد ودعان امام وهت يا ضارب من الساعة سبعة وربع الى الساعة عشرة وشوي وهم في سطله معاد خلو شي ابدا حتى الي نسيوه الشيبان جابوه والحاصل انها مهزله ولعاد درينا با تنتهي على كيف ؟؟‍‍
ولعاد درينا نغلق الباقي والا لا بغينا ردودكم وبعد بايقع خير ان شاء الله

[عوض بن سالم]

والله انتو ياعيال بن احمد سافطين المساجد اه معى ابوكم ود باعبيد مسكين الله في حاله ليه ماتكلم السنه الماضيه كل شي ريض ليه الا السنه ذي شو ذا ماهو ريض منكم دعوة الشيبان في الجامع وقولة نصيف الله ماهي زينه هذا مسجد الجامع الي يلعب فيه ياويله من ربه حقه ينزله وبعدين ذي عدات زينه في البلاد اذا التغت كما الراتب والذكر والترتيل والتراويح وكل عدات الجامع خلاص ماكئنه في في ناس صيام في البلاد هي هذه العدات الي تذكرنحنا بالذة الصوم وتحسسك انك فعلا في رمضن في شبام الناس يتلاقوة في الجامع ويتخابرون ويسوقون في سرحة الجامع يشترون البقل والخضره والليم ياعيال ذلحين اه معى ابوكم يكفيكم المساجد الي معكم باطبي ويحله وعقيل ومساجد وايده شليتوها وطردتو الشيبان منها ولا خلاص مات عبدالله بن سميط وعوض معدان باتلعبون ماكذب لي قال ( لاراح الهر تميح الجرذ) نصيحه من عوض بن سالم حاسبو انفسكم قبل ان تحاسبو روحو صلحو انفسكم اول مختلفين على اشياء في السنه حقكم وقدها سنه

[هدهد سليمان]

اللهم لا تأخذنا بما فعل السفهاء منا .......... اللهم بارك في من نشر السنة المحمدية .......... اللهم علية بمن خالف السنة المحمدية كبراً وغطرستاً ونعرتاً .............. اللهم اعن شباب بن أحمد على كل خير

[العجيب]

اقتباس :

الرسالة الأصلية كتبت بواسطة هدهد سليمان اللهم لا تأخذنا بما فعل السفهاء منا .......... اللهم بارك في من نشر السنة المحمدية .......... اللهم علية بمن خالف السنة المحمدية كبراً وغطرستاً ونعرتاً ..............

[عشماوي]

بسم الله الرحمن الرحيم
السلام عليكم و رحمة الله
أكبر عليك يا ( الصهدود ) على تعليق طرحته
صراحة ضحّكنا ، خاصة و أنا إسمع عيال البلاد عيال السوق اللي يقول البصرة سقطت و اللي يقول المقاومة عادها في الفلوجة ( على مسجد الخوقة ) و الحاصل إن عيال البلاد حصلوا لهم شي يتكلمون عليه و يعلقون و يولهم
و أنا أشوف مسجد الخوقة تحول إلى ( ملجأ ) كل من حنق من الشيبان راح مسجد الخوقه و قدّم أوراق إعنماده و قص له بطاقة عضوية و مسك له ضبرة في المسجد
و من ضمن التعليقات قالوا ان مسجد الخوقه محمي بألغام أرضية و صواريخ أرض جو و الداهية الأكبر انه محمي حتى من إنفجار نووي الله يجازيهم و الله من صدق عيال سوق
و قولك يالصهدود إن الشباب لي جاب هم إمام الجامع عندما وافقوا على البسمله و و الـ 23 ركعة خطوة زينه
نعم هي كذلك لأن المسأله أصلا - البسمله و 23 ركعة - ما تحتاج إلى التشدد و التعصب و إنما الشباب عندما تمسكوا بالبسملة و 8 ركعات إنما يريدون تطبيق السنه و ليس التشدد
و إلا فالمسألة ما فيها زرزرة و لا تشدد و أكبر دليل موافقة الشباب لي جابهم الإمام على هذين الأمرين
و أنا إستغربت للإحتجاج على الشابين لي جاو يصلون بالناس التراويح الظاهر إن الإمام أراد أن يختم القرآن في المسجد هذي السنه بديل ما إنه يكرّون على السور القصيرة كل ليله ، أراد أن ينوع و يغير جو ، يعني ما فيها شي
و ما عوض بن سالم مرة يشترح عليهم ، يا خوي يا عوض شرب لك قلاس ليم و غافقي شربة و باتشوف نفسك يوم تهدأ و تريض و لا تهتم و لا تحزن ما دامك متعافي و تقوم بفرضك حمد ربك و خل الباقي على المدبر هو بايدبرها سبحانه
المهم الأمور باتتصلح إن شاء الله
أخوكم
عشمااوي

[العيطولي]

الحاصل معاد درينا النبي في القبه وا في الحصاه

[فرتوت]

مات كلب فسلينا من اذاهو
خلف الملعون جرواً كان العن من اباهو
لاحولا ولاقوة الا با الله العلي العظيم شبام من بعد السحل ماشافت خير

[عشماوي]

[QUOTE]الرسالة الأصلية كتبت بواسطة العيطولي
[B]الحاصل معاد درينا النبي في القبه وا في الحصاه: ;
الظاهر يا خوي ( العيطولي ) إنك عادك سقله ما تعرف تعبر
آه دخل موضوعنا في النبي و مكانه
لا تزعل مني يا خوي
بس بغيتك ترد بالرد المناسب لتنال التقدير من الحلاّن
أخوك عشمااوي

[الصهدود]

بسم الله
والله قرأت الردود وما شاء الله وكذ قلت لكم الموضوع بين مؤيد ومعارض وعوض بن سالم الله يهديه نازل على الشباب بشكل ملحوظ واقول له رويدا رويدا وبا اسألك سؤال واحد : عيالك أحسن يوم يجلسون في المسجد بين المغرب والعشاء او يوم يتسكعون في الشوارع ؟؟ وليس العبرة بمن يدرسهم الناس كلهم في شبام مسلمين وجزاهم الله خير ...
اما بانسبه لردك ياعشماوي على العيطولي انا فهمت قصده هو بغى بايقول معاد درينا من الصح ومن الغلط ؟؟؟ وكأن الرجال محتار !!
وأنا مازلت اكرر ان الناس كلهم مسلمين وان شاء الله نقول ربنا يتقبل ، بس الغلط غلط والتشدد مرفوض والزيادة في الدين مرفوضة جملة وتفصيلا ....
واحيلكم على بقية الموضوع بعنوان [ خبر عاجل ... مسجد الجامع بعد السقوط .. ] فأرجوا القرأة والرد بصراحة على مافيه
وشكرا لكم جميعا