مساجلات الزامــــل الشعبي

**سالم محمد بلفقيه ((الشرقاوي))** · 01-19-2006, 04:04 AM

صح لسانكم ياشعّار0

يابوهاني الشعف وعد بالدخول للسقيفه قريب ,, ونحن نترقب دخوله وبانفرش السكه ورود 0

**غازي عمر بن مهناء** · 01-19-2006, 02:05 PM

ياالهاشمي ذا سيل حزره مانضب=قدله ثمان ايام من شل الربود
الظاهر انه بايصل لما الركب=كل ماسحق طاهب ظهر ثاني يقود
البخص عا منهو ستامن عا الحطب=باتندي الدنيا ولابيشب عود
اما انا برشن وبتشقص لهب=عندي ذهب اسود عرفتوه الوقود

omer500 · 01-19-2006, 02:24 PM

قدها قدر عاني صوابي والتعب
==والأمل في الله بالرحمة يجود
ناكر المعروف يا خس ما كسب
==لا خفّت أحماله ولا فك القيود

**سبع الليل** · 01-19-2006, 03:02 PM

سلام من عندي لكم ياهل النسب=وسلام ثاني عالذيابه والفهود
العز والتقدير من عندي وجب=بدعي لكم في كل صلاتي والسجود
الله يتقبل دعانا ويستجب=ويحفظ الامه من افعال اليهود
كل ما استقام الساس في لحظه خرب=يهوين يوم النفس تغيرها النقود
بعض العرب لاشفتهم عز الطلب=يمشون عالتقوي وعانهج الجدود
مابعضهم كشفان كذابه كبب=يسعون للباطل وتنقيض العهود
الله يحفظنا من اصحاب النشب=اهل الفتن واهل المشاكل والحسود

البغدادي · 01-19-2006, 10:13 PM

لك مني الف سلام ولو كنت شاعر رديت بقصيده ياريت احد الشعار يرد عني بقصيده تستاهل يالحبيب ياابن الاكارم

**طالب النعماني** · 01-20-2006, 12:38 AM

تسلمون شباب بارك الله فيكم

**جمال العطاس** · 01-20-2006, 08:20 AM

حيا الله الشعّار المبدعين . وأرحب بالأخ الكريم عمر .
كلام والله يصم الرأس يالسبع وغازي وياعمر!! ياريت حد المبدع بوشعفان والمبدع حاتم الطائي بايكتمل عقد المساجلة الله يعطيه العافية .

ذلحين هاتوها البواري والرشب= وأجمُر على عشرين بوري ياعبود
بامّز وباصُب القوافي في المصب=لموات يحييهم قصيدي والرقود
سود العمائم وقّعوا وسط المطب=والخيفة ألا عودهم يصْقُبه عود
وش بايطفّي نارها هي واللهب=لا ولّعت بين الشوافع والزيود
باتوصل النيران لاصحراء النقب=إن ماطفاها ولد فيصل بن ( ..... )
وإن كانه ألا نفخ مثناة القرب=ماعذر من ( طهران ) مايمسوا شدود

للجميع التحية !!

عمر خريص · 01-20-2006, 08:47 AM

حيا الله اخي ابو هاني
واظن ان (ما) سقطت في بيتك
وش بايطفـي نارهـا هـي واللهب لا ولّعت ... بيـن الشوافـع والزيود
والزامل ما شاء الله حلو وانت والشعار ماقصرتم بارك الله فيكم
وكذا تجبرونا على التجرو على محاكاتكم وان كان لا يرقى الى مستوى ماتطرحون ولكن اقبلوه على علاته ودمتم .

صيحت في صيحت ما مخلوق هب *=* كل العرب عندينهم صبحوا رقود
ناموا ولا حسبوا اذا الاعصار شب *=*ماعذر يدمرهم سترهم والسدود
سود العمائم بايحلقون الشنب *=* ومسعود في الضيقه كما اخته سعود
لي مالقى من سمح في يده سلب*=*يستاهل الرمحه ولطمات الخدود

**جمال العطاس** · 01-20-2006, 11:12 AM

حيا الله ابو محمد
ماشاء الله يابومحمد . ذكرتنا المساجلات الدويلة في الهجرين !!
حضورك شرف كبير للزامل .
قولك :

اقتباس :

واظن ان (ما) سقطت في بيتك
وش بايطفـي نارهـا هـي واللهب لا ولّعت ... بيـن الشوافـع والزيود

حاولت أجرّب إضافة ( ما ) بعد لفظ ( لاولّعت ) وجدته بايطول . وأرى ان البيت الذي ذكرت يابومحمد ليس بحاجة لها في الموضع الذي وضعت فيه النقاط . لأن لفظ ( لاولّعت ) اللام فيه مشدد . ويبدو انك يابومحمد مالاحظت الشدّة على اللام . هل توافقني ؟
أفدني مشكوراً

شاكراً سيدي إهتمامك لك التحية !!

**سبع الليل** · 01-20-2006, 02:58 PM

جمال يقدم قُدم ما عمره انسحب=يعرف فنون الشعر وتقيـيم العهود
انسان متعلم كلامه من ذهب=يبذل على الشُعار ويرسلها طرود
كل ما طلبته قال أبشر ما غلب=باعد به صاحب وفي مخلص ودود
الله يحقق له الاماني والطلب=ويزهد عليه بالخير والصحه زهود

مساجلات الزامــــل الشعبي

سقيفة عذب القوافي