ذكرى 14 اكتوبر

[الواقعي]

عزاء الى ردفان في ذكرى ثورة 14 اكتوبر

ابديت با ألرحمن ع العرش استقر=هو ذي نصر في بدر جمع المسلمين
وارسل محمد لي هدانا للظفر=بدد ضلام الجهل واهدى الضالين
ها جسي نبهنا وانا وسط السمر=ثم قال من عندك نبا جوهر ثمين
هت ما معك عن ثورة الرابع عشر=لي عمرها ذا اليوم سته واربعين
واتسلسلت لحداث عندي والصور=ذكرت لي رحلو ولي هم با قيين
حتى القوافي عاندتني والفكر=من جور ما شفناه في ذيك السنين
اليوم ذكرى حلم فا ألمهد انقبر=في زنجبار اغتاله ابليس اللعين
نجني ثمر غرسوه يوم المؤتمر=قالو لنا الثوره خلاص الكادحين
يا ليتهم سمعو نواقيس الخطر=لي دقها فيصل وقحطان الرزين
غابت عقول القوم والجهل انتصر=هم فضّلو اليسرى على اليد اليمين
لي قالو التصحيح ما منه مفر=لا نهجهم صالح ولا هم صالحين
تبعو نجّس منحوس ما تبعو عمر=لينين له قدوه ولا يؤمن بدين
واتثلم السيف االذي حدّه بتر=ثم انكسر من يوم ذبحو سالمين
كل من حفر حفره مكانه فا الحفر=واهل المقابر في عملهم سابرين
واتفجّرت لوضاع فا ألثالث عشر=زمره مع الباطل وطغمه مجرمين
من بعد نخل الحّب با يبقى الغشر=والثعل يلعب لا ذهب مولى العرين
والباخره غابت وسط غبة قمر=يوم النواخذ لي عليها خا يبين
ربانهم مهيون فا ألسوق انقمر=باع البضاعه لي في الخن الزبين
تاريخ ياخذ منه العاقل عبر=واهل الجهاله في فلكهم سابحين
احنا طرحنا ساس مبني با ألمدر=والسيل هد الحصن لي مبني بطين
العفو يا أخواني اذا شي قد قصر=وانتو على ذيك الحوادث شاهدين
هذا عزاء مني لردفان الاغر=والعذر يا الشهداء في اليوم الحزين

النقد الهادف مطلوب ورحم الله انسان هداني الى عيوبي