ياغراب أبوك مات .. في طريق الحيمرات / مدوديّات

[المدودي]

سلام الله على أيام أول ـ الأيام الخالية ـ أيام كانت للعاقل هيبته وللشيبه كلمته .. والقوانين والنظم الأسرية لها حرمتها وتقديرها ..
بالرغم ان ماحد يقدر ينكر ان وقتنا كله عبّرناه في السفطه ولعب القله و الباقليسان و بحبح المرق .

النظافه والشياكه ما حد كان يعرفها .. لي نعرفه ان نحن العصريّه نهوجر لا بير الديسكو من شان نلعب كره .. ولا أذن المغرب نوخذ لنا كوسه في الحوض ونشل انفسنا لا مسجد الجامع ..

بعد صلاة المغرب .. إن شاف نحن حبيب علي جلسنا نحزّب .. و إلاّ .. ماحد شاف حد .. نجتمع مره ثانيه ونتفق على لعبه .. والألعاب كانت وايد وبالكوم .. لا ما بغينا ذي شلّينا ذيك .. لا تعبنا من الخبخبه والمطارده جلسنا نلعب لي يقوم عنكروله ونتمّي لمان حد يبكي ولا يتعور مننا .. أو تقوم صلاة العشاء

لا قامت الصلاة قمنا غبران دبران و خبّه ألى الجوابي .. لي يسبق أبوه شاطر .. والتالي في ( ـ ـ ـ ـ ـ ) مرصعه وعالي .. > وقده يعتبر لعب ..

في الصلاة ماشي لعب .. وبعد الصلاة يغلّق اللعب كلّه .. وعلى طول نخرج من باب المسجد وراسن إلى ضيقتنا ..معاد فيه لا هنا ولا هنيّا ..

لأنه لازم نكون في الدار قبل ما يصل الشيبه من المسجد .. ويا ويلك يا سواد ليلك لو جا وانت عادك ما حد انت ..

آخر مهله إلى تقديح العشاء .. وانت لك حالتين :
ـــ إما انك تجي وهم يقدحون .. وفي ذي الحاله ما شي لا سلام ولا كلام .. ثلاث همطات بالحنظله .. وترثم بلا عشاء في ميسمة التمر ..
ـــ أو انهم يقدحون ويتعشون وانت عادك ما جيت ,, وذا يعني أن أهل الدار وبزعامة الشيبه ينزلون ويدورون عليك لمّان يحصلونك .. وعلى قدر الأسباب يكون الحساب ;baw

أما اليووووووووووووووم :

السقل بطروا .. لعبهم كثر .. و احترامهم قل .. وعطالتهم زادت ..

وقت ما بغوا يخرجون .. و وقت ما طربوا يرجعون .. ولا حد يقولهم منين جيتوا .. حطّوا لهم الحبل عالغارب .. والقفل فوق الرف ..

خبر عارض :ـ بأمر من رئيس نيابة الإستئناف يوقّف المواطن : سعد المتعرّض من إكمال عملية حفر البالوعة الواقعة جنوب ساحة الطّفارى , وذلك حتى ينظر في الدعوة المقدمة ضده من المواطن : عيظه الفال , مع ضرورة مثول المذكورين أعلاه أمام رئيس النيابة الأسبوع القادم لمعالجة القضية ..
ــ
ــ
ــ
ــ
خلّوا نحن في موضوعنا ..

وين وصلنا ؟؟

آه .. الحبل عالغارب ,, والقفل فوق الرف ..
وهت يا مساري .. وخذ يا سمرات واهلاتهم ماهم فاكرين بهم .. ولا يلقّون لهم حس إلا ّ لا قد الفاس عالراس ..

هشّومي المتبيقط ..
من عيال حارتنا .. أهله مهقوا له وخلّوه يطلع حريبه .. إشتروا له سيكل نار بدل السيكل بيدل من شان الوصايا حق الدار .. بس هو سخرها في المساري .. ورجع معاد يضوي الدار إلاّ في نصفات الليول .. ,اهله لا تأخر ما ينشدون عليه .. قالوا : نحن مستامنين به , هشّومي ما يمكن عن المجرى يزل .

وقبل يومين كانت سهره في ( الحيمرات ) .. والساعه عشره هشّومي كتّف من الدا ر بغى السهره .. أهل الدار سمعوا حنّة السيكل بس ما حد قام وقاله وين بغيت ؟؟

السهره سبّرت ..
المعرس نزل يزفن ..
الفنان نشف حلقه ..
جا بوا له ماء ..
الدنبق اشتعق ..
جابوا بديله مرواس ..
السهره غلّقت .. و هشّومي عاده ما جاء السهره .. ولا له حس

الشمس شرقت .. و هشّومي ماله حس

أهل هشّومي ثاروا .. و هشّومي ماله حس

تصبّحوا .. و هشّومي ماله حس

خلق الله راحت لا اشغالها .. و هشّومي ماله حس

سعد المتعرّض ما سمع كلام الحكومة .. وسرّح عمّال من شان يغلّقون البُلاعه ــ باقي الا الظفر ــ .. و هشّومي ماله حس

ــ
ــ
ــ
ــ
ــ
ــ
العمال وصلوا عند البُلاعه ..
ــ
ــ
ــ
ــ
وشرفوا فيها :
حصّلوا هشّومي مرطوس به هو وسيكله مثناتها ..
;baw ;baw

[بن صران]

صباح أو مساء الخير يا مدودي ..... والله يذكرك بالخير . ذكرتنا ب بحبح المرق وخواتها وياريت حد يتفرغ ويجمع الألعاب القديمة للتوثيق
بس لي ملاحظة يا مدودي .. ليش ما تصلَح هوامش لبعض الكلمات
مثلاً أنا ما أفتهم لي كيف يقع المهط بالحنظلة ... أكيد الحنظلة لها معنى آخر بلهجة آل مدودة
وسلامتك وكثر خيرك

[الشعف]

حياك يالمدودي
مسكين هشومي المتبيقط ياحافظ عليه ...
بايقع آه .. من كثرة البلاليع والحفر.. لي ماحد نهى لها منكر ؟؟

الله يستر اليوم هشومي وبكرة سلومي والا عموري ... ماحد داري الدور على من

والحرايب الزايدة الله ما امر بها .. لازم الواحد يضبط عياله ويحكمهم .. مايخليهم كل من شرى راسه لقا لي في كوره وعبر شفه وهواه ... ومساري تالي الليل مافيها غير سواد الويل .. وعاده سرى للصوعة حق سهرات ونشرات .. بايقع صلاة الفجر مايسري لها كما السهرة ؟؟

وذلا تالي زمن الله يحفظ عيالنا منه ويحفظ نحن كماهم .. الوقت عيف وبغى صبر ......

ومن حفر حفرة لاخيه وقع فيها ..
والمثل : لاباتحفر حفره وسع شراقيها .. لعاد يقع مسقطك فيها

ويابن صران حياك الله .. ووين الغيبات .. حسرانين عليك ياخي وين مشاركاتك المرعوشة ... شف نحن مساهنينك يالحبيب

[السلال]

الا .. كان أول يالمدودي أول زمان من قام قام عنكروله . ولعبة القله . ومال مرقع .
ماليوم أخوانا وعيال حافتنا معاد يلعبون الا بل بلا ستيشن والعاب الاجهزه الاكتورنيه . ياخوي يالمدودي ماحد ياخذ وقته وقت غيره . نحن الان في عصر الكمبيوتر .
الله لايردها أيام ايام شقيه مرت علينا ماليوم الوقت تغير مهو وقت هشومي .
الان وقت هشومي المتعلم هشومي الغير متعلم بس المتفتح هشومي المتحمل بئخبار العالم أن كان متعلم أوجاهل .
هشومي الي يفكر في أمو ر الدنياء وفي عمرنا لما نلعب من قام قام عنكروله نحن في ايامنا ماندري وين موخذه بناالدنياء.
عكس هشومي . هشومي البلاستيشن هشومي الكمبيوتر هشومي أخبار العالم .
هشومي أول وهشومي ليوم فرق كبير .
الله أن شاء الله يوفق هشومي وأبناء جيله هشومي رجل المستقبل

[بن صران]

شكراً يا شعف على سؤالك
إن شاء الله الغيبة ما با تطول
با نرجع لكم قريب .. والبركه فيكم

[ابن سيؤن]

آه آه يالمدودي شفك ذكرتنا بشي ماكان العبال خاطر ذاك وقت وذا وقت والحكمه تقول ماحد يشل وقته وقت غيره والحكمه الثانيه تقول كل وقت له دوله ورجال ؛ذاك وقت يستاهل حد يبكي عليه ;baw

الله يعطيك العافيه يالمدودي 0

[المدودي]

شكراً جميعاً على مروركم الكريم

الغالي بن صران :
سؤالك عن ( الهمط بالحنظله )
هو صح يمكن المصطلح يكون خاص في مدوده ومن لهم علاقه بـ ( الوضن ـ حرفه يستخدم فيها سعف النخل )
وبالتالي الهمط : الضرب الشديد
الحنظله : رأس السعفه لي يمسك الخوص

ملاحظه / هذا حسب تفسير مدوده وضواحيها
ملاحظه أخرى / لو فيه كلمه ما افتهمت يمكن نشرحها ( وانت قدك عارف :p )
ــــــــــــــــــــــــــــــــــ

حيّابك يا بو شعفان
الحرايب الزايده ـ على قولك ـ الله ما امرنا بها
والمفروض ان الواحد ينتبه لعياله .. قبل ما تضوي له وحده ما تترقّع

والمثل يقول : أكله .. واحسن أدبه ..
وخلف لولدك أدب .. ولا تخلف له ذهب

والله يستر ..
ـــــــــــــــــــــــــــــــ

حياك الله أخوي السلال
ذاك الوقت مر بزينه وعيفه .. بس لازم جيل اليوم يأخذ عبره من الماضي .. ولا يعني أن الله فتح عليه وتيسرت ألأمور له , أنه يلقي لي في راسه حتى و إن كان غير الصواب والصح
و ربنا يوفق الجميع للصلاح .. ويبعد نا عن الزلل

ويحفظ هشّومي وأقرانه

ــــــــــــــــــــــــــــــــــ
ابن سيؤن
مشكور على الحكم اللي أوردتها
ووقتنا يستحق نبكي عليه مش لأنه كان عيف .. ولكن لأنه كان وقت صفا ونقى و ذكريات مشرفه


تحياتي المدوديه