خشروق ومرطاس .. في مضمار بني خندريشة

[الشعف]

ارى ان موضة الحمير في هذه الايام هي السائدة في معظم المحافل والمرافق لذا احببت المشاركة للرفع من شأن الحمير ... تلك الفئة الضعيفة المستضعفة ;baw التي لم تجد من يقف ليحامي عليها ويدافع عنها

فكما يقال بان لك جواد كبوة
ارى ان لك حمااااار هفوة

عشان كذا جيت باخبركم بقصة الحمار ( خشروق ) ... وهاكم حزيته ,,

[flash]http://members.lycos.co.uk/shouof/for_all/mertas.swf[/flash]

يقولون من سابق زمان .. وهذه قصة من قصص الاغريق والرومان .. انه في يوم من ايام الاسبوع الثمانية >>>>>( هم احرار ياجماعة اسبوعهم = ثمانية ايام ) ..

يقولون انه فيه رجال اسمه ( مرطاس ) ;burnout شرى خورته >>>( وشري الخورة من البورة ) .. المهم صاحبنا قال في نفسه ليه ماابني مضمار او ( ميدان ) للسباق كذه منه منفعه ومنه تسلية ..... ماشي شغل ولا مشغلة وبغى بايقحمش له كم قريشات تنفعه للعوزة .. وايامها كانت للقروش الفرانصه والعانات والروبيات .. لها وزنها ومقدارها ... ماهو كما عدي الايام ذي لي ماتنفع ببقشة .. حتى ملى جونية عدي ماتنفع ولاترقع .


المهم ..صاحبنا مرطاس بنى المضمار وصار لي صار وكان مضماره اول مضمار في ذيك الامصار .. وكان هدفه ومرماه انه يجذب الخيول واهلها منشان يتسابقون في مضماره .. وان حد به ضيق من اهل البلاد يجي العصر ويسلي على خاطره شوي .. بدل الهم والغم >>>> كما الهم والغم لي نحنا فيه في وقتنا الحالي ( القار ) ... المهم ذاع صيته و ذكره على كل لسان ( كما السيارة النيسان ) .. لانه كان اول مضمار في مضارب ( بني خندريشة ) ..

ولقى له تذاكر للدخول .. سعر التذكرة ( 10 عانات ) .. قانع بالقليل .. منشان على الاقل يرجع قيمة الارضية لي بنى عليها >>> وكذكم عارفين اسعار الاراضي ناااااار ;flam .. بعدك ياحبيبي نااار;flam والله نااار;flam .


بتت البتة .. وعبرت اول ثمانية ايام ( اقصد اسبوع عندهم ).. ولحقت بعدها اسبوعين ؟؟؟
والفاس وقع على راس مرطاس .. وترطس لمان قال بس .. وان كان حد قرب من المضمار لاخيل ولا حمااار ؟؟ ... بسبب قلة الموارد وجفاف الابار .. وندرة الخيول والحمير.. عند آل بو خندريشة

دوّر ودار .. وقلّب الافكار .. وفي النهاية احتار .. وقال ان ماشي خيل باجيب حمار .. لان الخيول الاصيلة ماباتحصل من قفاها عدي الا اذا اولا بعت ثيابك وعفشك من شان تشتريها .. وقعد صرّف عليها .. شي قصب وخولة وشي قضب وشي رضيح و ماباتحصل منها غير الرفس والترميح


فكر مرطاس وقدّر .. وشرى خشمه بدل خورته ..وشط فوق وتحت ولفت يمين وشمال .. قال بسسسس وجدتها >>>( حاسب نفسه ارخميدس ) ... قال ما معي غير الحمير هن لي فيهن الخير .. ومايوكلن لا رضيح ولاخمير .. انشاء الله صفر وقشاقش وباقي الوشر حق النشارة .. وباتقل الخسارة .. بايوكلن منه وهن كما السلاطين.
باجيبهن يتسابقن في مضمار الحمار .. لعل الله يفرجها وبعد الحمير تجي الخيول .. اهم شي ابدأ العمل ونعوض المخاسير .. وان ماشي لاخيول ولا حمير .. حتى باجيب اهرار تتسابق وتتباخش في المضمار tt.. بدل مابيعه وانا خسرااان ;kar.


مرطاس .. لقى له اعلان بالبنط العريض على باب المضمار : نرحب بكل دابة ;danc .. نرحب بكل مخلوق هاي داي ماله والي ولا محتاي .

وقعت له رنة وزادت رطساته رطسة ;confu ؟؟ .. ابو خندريشة ماجاله غير حمااار واحد بسسسس اسمه ( خشروق );monk ======>> واثق الخطوة يمشي حمارا.

ويافتاح ياعليم يارزاق ياكريم : استبشر به خير وهو خير من ماشي .

عبرت الاسابيع ابو ثمانية .. وسبرت الخيول تقبل عالمضمار .. ولحقت بعدها البغال .. ومعهم ( خشروق )
وكل يوم يتسابقون ويتطاحسون ;th .. وهت يارفس ودقس وياترميح وتكس ..والحمار يوم ينهزم ويوم الجماعة يرحمون حالته ويخلونه يسبقهم ====>>( والله فيهم الخير احسن من بعض ناااس ) .. اصلا عارفين انه خشروق ومخشرق على اسمه .. واه بيدهم يسوونه؟؟ خوهم .. ويومه مصاب بمرض الخرف الرعاشي والكبت السمعي .. حيث انهم كلهم ( معشر الحمير ) اذانهم طوال ... ماعدا خشروق الفريد من نوعه اذانه كما بصمة الابهام .

وان جاء يتسابق معهم .. عينك ماتشوف الا العكر .. يرمح وينطح .. بدل مايركز على الطريق لي قدامه .
حتى في مرة من المرات كان يتسابق مع بقره وكان هو وياها في الطليعة >>>( ذهنوا ماهي فريق الطليعة )..المهم كان ناوي ينطحها من قفا .. بس البقرة ( زليخة ) شافته وحست بنيته الغبراء ..وعييييييييييييييييييط .. فحطت تفحييييط ومسكت هاند بريك .. وشردت من طريقة .. وهو وينك وين مايشوف لا لي قدامه ولا لي قفاه .. ومادرينا به الا مجحفل تحت الحاجز حق المضمار لي كسره بكوره اليابس


ماعلينا .. مع مرور الايام كثروا الناس ومعهم كثرت الخيول والبغال وياما عزهم الحمير ..... ايهييي وكثرت المضامير >>>>( كما مقاهي الانترنت ذي الايام ) .. طبعا الاقدمية والاقبال لمضمار مرطاس صاحب اول مضمار في مضارب بني خندريشة .... والمضمار صار مقصد خير لكل خيل اصيل وحمار عليل وبغل ذليل .. وخشروق اكبر دليل .
وانهلت الخيول اشكااال والوااان .. شي ابو (تربو) وشي ( سوبر تشارج ) .. وشي منهم مايعبر الذباب من عند خشمه وما عنده لعب وسفطه .. ولو فكر خشروق ينطحه والله بايقلع رقبته برفسه .


مسكين خشروق .. والله يرثي ;baw .. ضاع مستقبله في المضمار وقال في نفسه وينا من ذي الاشكال
انا كنت ماقدر على بقرة .. يطلع لي اسد ====>>( يتفرج شاهد ماشافش حاجه جم ).

خشروق بربر وطبّل .. وقلّع رجيله وفحرر بها في القاع .. والدخاخين عكبشت من نخره ;fl .. وهت ياخبّه على دار صاحبنا ( مرطاس ) .. صاحب المضمار .


خشروق : ياطويل العمر آه لي بلاك بذولا الخيول المقلوعة لي جبتهم للمضمار ؟؟!! الله يصلحك شفهم لقوا لنا زحمة ومعاد شي نفس ;baw =====>>>( يكابر في نفسه مابغى يقول انه بايروح في الرجلين ).

مرطاس : شف ياخشروق .. يقولون ذا الميدان ياحميدان .. وانت من الناس القداما والزيان ..اللي لهم باع وامباع ومن خبراء الرفس والقلاّع .. وانا واثق ومتيقن انك باتثبت وجودك وبا تبهذل بهم .

خشروق : طيب ماختلفنا .. ليه ماتعطيهم قسم من المضمار ؟؟ وتخلي لنا قسم انا واصحابي المكرمعين .. لاتنسى ان نحنا الاوليين .. وحبيبك الاول لايغرك الثاني .

طبعا مرطاس عطاه الاذن الصقعاء وطنشه .. داري به لانه خبز يده والعجين ..قال له رح خب معهم ولا عليك ان نطحت حد بانطردك .. وانته انتبه لنفسك ولا تلقيها يالخشروق .

شفنا حذرتك من ذحين .. وانته بصرك ؟!! امشي عدل تحتار البهايم فيك !!


خشروق هزهز راسه .. ودلدل آذانه .. وعطّف للمضمار ,,,,,,,,,,,,,, وكذها مقالة .. النية مطية .. والطمع مهلكة .. والحسد والقواره توكل الحسنات كما توكل النار الحطب
وذا الكلام كلين يعرفه الا الحمار ( خشروق ) .


وما يحتاج نطول الهدرة .. وباندخل مباشرة لنفسية خشروق .. ذا هو يكلم عمره بصوت واطي !! مدري ليه صوت واطي ؟؟ المفروض مايطلع صوت بس معاد بانعابر عليه .. حمار وانتم كرام وماعليه لوم وما يلوم عليه الا بني جنسه والا صهوره .

خشروق بينه وبين نفسه يقول : ماشي معي حل غير الا اكيدهم ذولا الغرباء .. ماباقي الا هي .. المحل محلي انا واخواني من سنين ومنين .. وفي يوم وليله يجون ذولا الكشفان ويحطون نحنا عالرف والله باطل .

باكيدهم يعني باكيدهم .. وسبر خشروق يحيك خططه ويغزل مكايده .. وحط في كوره واحد من الخيول نقاه نقوه من بينهم كلهم !! .. لانه ابرزهم وان سقط هو بايسقطون البقية من بعده ..على قول المثل ( طرحها في لحم ) .. وحسب تحليل مخه المحلل .. قال لازم استفزه واتمهزل به لمان اتلابش انا وياه وتقع نشبه وهده .
انا بارمحه واكيد هو بايرفسنا .. ماهي مشكلة .. المهم باقعد صيح وبوح وبابت عند مرطاس منشان يرد لي اعتباري .. لاننا من المؤسسين للمضمار .. واكيد بايرفع له كرت احمر .. وبايطرده برع .. والباقيين بايحسبون لي الف حساب وباكون مدربهم .


وفي يوم من الايام كان المضمار ملان لا راسه .. والسباق حامي المراطيس .. وما درينا الا بخشروق ريجع ريوس ؟؟ عكس السير .. وقطع الاشارة .. وقعد يتحكم ويتلكم بغى نفسه مدرب عليهم ......

ياحصان (أ) .. رجع يمين ....

ياحصان (ب) .. نقص السرعة شوي ..

ياحصان (ج) .. رح وزن نفسك عالميزان .. اشوف وزنك زاد يم .. اكيد كلت كاكاو ... رح نعنبوا ذي الصورة .. وتعلم النظام ...

المضمار انقلب راسه على رجيله .. والخيول والبغال كل واحد يتفرج في خوه !! مستغربين خشروق المخشرق آه لي وقع به .. غير ماهو قض عليه وقرح الفيوز ؟؟!! ... وصاحبه لي حطه في باله ( كبيرهم الذي علمهم السحر ) غمز لهم وقال لهم خلوه ياجماعة .. هذا قديم في المضمار .. جاملوه على شاني


بس ايش بانقول .. مصيبة الحمار اصله حمار .. حتى لو بنيت له دار ...زادت مشاكل خشروق يوم ورى يوم ..حبيبي ماجاني نوم .. حبيبي واديني جيت ....
ومافاد معه لاتعامل زين ولا شين ؟؟ .. حتى اصحابه القدامى اللي من نفس جيله ... يوم يجاملونه وعشرة ايام مايظهرون من اصله من حياهم ومن فضايحه اللي تسود الوجه


والصحن امتلأ .. والبر تطير .. والجماعة ضاااقوا .. وكل ماجاء حصان بايخب يحصل خشروق قدامه كما القضاء المستعجل .. ويومره وينهيه .. ماتعرف تخب ؟؟ خب سوى لعلّك الكسح .. والا خب الخبه الفلانية ولا تخب الا لمان صفّر ....

وكثر الصقع مثل مايقولون يجيب العور ... وصار خشروق كما الدار المدخرب ولاحد معبره ولا حد يشط فيه .. مسكين احترق كرته وانقلب رماد .. وحتى الناس لي يجون المضمار ماهمهم الا الحصان ابو ذيل طويل ... والحصان ابو قصه كابوريا ..والحصان ابو شنب ... والحصان والحصان .. والحصان ووو...
وخشروق معاد لبوه ذكر على اي لسان



ايييييييييه يارعى الله ليالي .. وايام مرّت ولاشي حكومة .. والحكم ماشي على الراضي وعالمغصوب .. وينك يازمان اول ...........وبما ان خشروق ما يؤمن بحاجة اسمها تنافس شريف .. ولا لعب نظيف .. قرر انه يخربها .. وهي اصلا خربانه خربانه .. المهم طنت في كوره وقام باينطح واحد من الخيول الاصيلة .. لانه معاد بقي بيده حيلة .. ولقى مشكلة عريضة طويلة ووقعت هوشة ونوشة ونطح وبطح .. وماحد فرع بينهم غير مرطاس >>> بعد ماشبع لبوه ترميح وترطيس .. ومن ثقة خشروق وعزته بنفسه .. كان طارح في باله ان مرطاس ممكن يطرد كل الخيول والبغال ويخليه هو ابو الخشاريق ... بس ياحسافه خاب ظنه .. ماحصل لاحق ولا باطل .. ماغير رمحة وشوته من مرطاس عالمؤخرة ويالله ان كان عادنا شوفك هنا يالحمار يابن الحمار ياقليل المروة والمعروف .. ياما عينك حاتشوف .. والله ماعزك الا حوش او زريبة جنب المتردية والنطيحة .



نفي خشروق .. وتبهذل وترحل .. كل يوم وهو من حوش الى احوش منه .. وسعسع في الادوار لمان حسه دار .. ومعاد خلا خرابه الا وسكن فيها وحده كما السكني .. الى ان رسي به المطاف وحصل زريبة قعد فيها يفكر ويتأمل ويراجع حسابته ويقلب الدفاتر ........... باتقولون حمار يتأمل ؟؟!! ليش لا .. ممكن بس على قدر فهمه وحدود تفكيره .

ويقولون الهوى غلاب .. وما العشق الا للحبيب الاول .. مسكين خشروق قلبه رهيف وحشاش وحساس .. من يوم طلع على وش الدنيا وهو مايعرف غير مضمار مرطاس .


الله لايفتنا مثل مافتن هذا الحمار !!!

والله ماهمه لا الهسف ولا اللسف .. ولا الشوت والرفس لي وقع له من المضمار .. وعاد قلبه متعلق به ويحن اليه ... راحت الدنيا عليك وباتروح على غيرك .. ولو دامت لك كان ماوصلت غيرك

حماااار الله يكرمكم وآه لي بايفهمه ... الزبدة >>> خشروق قرر يرجع مره ثانية للمضمار بعد مانطرد منه بضعة سنين ........ انتبهو سنين بني خندريشة تختلف عن سنيننا والتاريخ يختلف وذاك زمان يشهد له المؤرخون .. ايام الناس ماكانوا يعرفون النيدو والحمير ماتعرف البرسيم .



بس خشروق عارف ومتيقن انه لو رجع بايحصل له نصيب الاسد من الركل والتسديد والعلاق والتهديد .. وصراحة ماهي زينة في حق هذا الخشروق المخضرم .. وخلال هذا التفكير والتدبير طلع بهذا التقرير ..كل شوي يروح للمضمار يسترق السمع والابصار .. يتحسس ويتجسس .. من قفى الشبك .. وفي كل سباق يشوف ايش الاحوال .. من جاء ومن راح .. وايش لي صار وايش لي ماصار ؟؟!!>>>>> والله حاله تقطع القلب



الدنيا دواره والحال ماتدوم يافلان .. كل مدة تطلع لشلة من الخيول والبغال والحمير موضه وتقليعه >>>كما حمير الزمن ذا .. وتجي موضة وتروح موضة والكل يمشي عليها حتى لو ماهي عاجبته ولا تركب عليه ... كلين يساير التيار والموت مع القوم رحمه ( رمحه ) .


خشروق قلنا يراقب الوضع >>>>( الحمدلله وضعت وجابت توأم هههه) ...يراقب الوضع عن كثب لاحظ بعد مرور ردحا من الزمان ان الموضة الحالية .. صارت معظم الخيول او اغلبها يلبسون براقع .
ياسعد لو تشوف الشيب ماني بشايب .. لابسات البراقع ..ياسعد شيبني ...دنيا غريبة عجيبة تالي زمن خيول مبرقعه ... والله الموضه اشكال وعين .. كما موضات شباب الايام ذي لي تنتشر من مده لاخرى .. وماتحصل لها ناهي ورادع ...


خشروق لاحظ ان نتيجة السباق معادها كما اول لي يسبق ويفوز هو لي يوصل لوّلي لخط النهاية ...... لااااا .. رجع لي يفوز هو لي لابس برقع طويل ولو قام يخب يهفهف معه طرف البرقع ويرقص ويلعب بالهواء .. يهوين رجعوا يتنافسون على لبس البراقع وترقيصها في الهواء في السباق .. وصاحب اكبر زاوية انحراف لرقصة البرقع .. هو لي يربح المليون .


قال خشروق في نفسه .. ياحلااااوة (هوذا المسجد لي بانصلي فيه ) .. ذا لي بغيناه بالبس لهم احسن واطول واغلظ برقع .. والله ياخير موضة والنعم في النظام العادل .. احسن من اول .. كذا يقدرون المواهب ياسلااااام عليك يامرطاس .. كذا تشجيع الهواة والا بلاش .. وباتشوفون خشروق يرجع ود سوق .. ان ماخليت اللي مايرقص يهز رقبته


اوووووووه نسيت اننا مطرود من المضمار ولازم اتنكر .. ماشي حل غير اننا اعمل عملية تجميل لتغيير الملامح .......... والا عندي حل ثاني !! باخلي واحد من ثيران حارتنا >>> ويامكثرهم ..باخليه يعطينا بكس والا دكم مخمّس في الوجه يغير التشكيلة .

والا قول هذي الاخيرة صعبة وخطيرة .. لعاد تقع موته وتروح فيها ياخشروق وقدك مخشرق خلقه ... ولعاد باتحصل لاموسى ولا عصاه ..وباتفوتك الرجعة للمضمار ياحمار ..


المهم راح عيادة تجميل لتغيير الملامح .. وبقليل من التعديل والتبديل .. والمكياج والمسكرة .. وجميع انواع المسخرة ..دخل خشروق حمااار ونزل من عندهم ( شعل ) ....... طبعا الشعل ولد الحمار اكيد كلكم تعرفونه ..... وممكن يقال للشعل تصغيرا ( شعيل ) ...>>>>يذكرنا بواحد


خشروق بعد المسحوق .. راح تضبط وتنفظ .. وتعطر وتنظف ..لبس الكوت والمسدرة واشترى برقع المرة ..( برقع اصلي وارد ابو فيل طويل المدى ) .. صاحبنا تبرقع وتصرقع .. بالبرقع الفريد من نوعه ................... وشااااااااااااط .... خبببببببه للمضمار .. سلالالالالالالام ياجماعة انا متسابق جديد والله يعزنا ويعزكم وكل المسلمين .. متبرقع

قالوا ياحيا بك يالابس البرقع .. وشكلك ماهو غريب علينا .. تقول الا مننا وفينا .. وبغيناك تلتزم بقوانين المضمار .. ياشعيل الله الله في المنافسة الشريفة ..
شف لي يرّقص البرقع و يخليه يرفرف كما البنديرة له الجايزة .. وكذك تشوف الناس ذولا الجمهور .. معاد يهمهم من يسبق ومن يلحق .. بغوا رقص وهز وعلم سيري ... خل البرقع يفرفر ..

خشروق ... يقول في نفسه .. داري داري يالغبوتر

عبر كم يوم وخشروق يزوووك في السباقات له صوله وجوله .. ومع الخيل والفرس ياخشروق .. مكن البرقع وزرزره ورفرف ياعلم بلادي ..وكلهم في المضمار سواسية بالرقص ماحد زايد على حد حمار مثل الخيل وخيل مثل الحمار .. بالعكس عاد الحمار اخفف عقلا شوي

والخيل الاصيل ماله الا الخبه والركض .. وماله في البراقع والرقص .

ياسلالالالام ... الكل يمدح وينفخ في خشروق ..خلوا رقبته كما الجسر ..صدّق نفسه الشعيل .

بس ويييين بغى ... الطبع في الانسان لا يتغير

وماتشوف الا خشروق شطح ونطح .. ونفش ريشة وصدره كما ديك الحبش .. وقام يتليقف على فلان وعلان

وعدنا للهوى حيث كنا .. رجعت ريمة لعادتها القديمة .... مصيبة لي هو مستكمل بعقله وهو دلخ

يومر وينهي وهم دايم على كيفه .. انت يافلان رقص هناك ......... وانت ياعلان برقعك اعوج عدله سواء بارك فيك .


صدق ... لاصلح لي غرامي مابغبط آل العقول ;wah ...

في يوم من الايام .. وعاد خشروق ماعبّر كم اسبوع

الا واحد من الخيول المكرعنه ;fl .. جاي من الدار وعفاريت الدنيا تتنطط قدام عيونه ;fl >>>> تعالق هو والمدام ;qus .... تقول له وراك ياخيلي معاد نشوفك ليل بنهار وانت غارق في المضمار ..عند صاحبك الحمار .. شف دارك له حق عليك ... وباقولك يالفرس ;qus ؟؟!! يالميدان;qus ؟؟!! واني الفرس ماهو عيب عليك تخليني وحدي ..وتبت عند ذولاك الفاضيين قلال الخير لي انته واحد منهم ؟؟ .. لو انك رجال كان مالبست برقع ورحت تهز قدام قليلين المروة والشرف .


الحصان رد عليها الكلمة بعشرين ..>>>( الصرف عندهم رخيص ) ..وطلع من الدار بلا صبوح .. معطف حجابينه ومفرقز عيونه ومتنكد من كلام المره .. .... ودخل المضمار متبرقع ومغطي عيونه الحممممر من الحنق تقول الا باتلّصي كما اللمبة ;fl ... المهم قام بايرقص رقصة البرقع منشان يخفف من ضيقه وهمه شوي .. وياعم هونها وهي تهون .. الا والملقوف ابن الملاقيف ( خشروق ) حاشر نفسه في الموضوع وطمر وارتكز قدامه صاحبنا ؟؟!!

خشروق : يافلالالان .. ياحصان ياخي ليه ما توضح فتحات عينك في البرقع .. حسب المادة رقم ثمانتعشر ونص من قانون مرطاس .. صحيح انا مانا قديم في المضمار عادنا جديد لنق .. بس قريت الدستور في الجريدة ..


كانت هذه الكلمات بمثابة القشة التي قصمت ظهر الحصان .

الجماعة شافولك الحصان عطى الشعل خشروق ظهره .. وحسبوه بايروح منه ويسيبه .. شوية الا وسمعوا انفجار له دوي هاااائل ;gra ;fl >>>( كما مركز التجارة العالمي ;kai ) .. وهي رفسة معلم .. ياجماعة الخير وعينك ماتشوف الا النوم;th ;th .. الجحش الشعل الشعيل الحمار ( خشروووووق ) .. تخشرق خشرقه مابعدها ولا قبلها .. ولعاد قطب في برقعه ماهو مشعووووق .. ...ولفلفوه لفلفه من قفى المضمار لانه من الرفسة طار .. واشتعق كما الطار .. عملية التجميل والمسكرة والمسخرة والسمكرة ..حتى الكوت والمسدرة .. كلها صبحت منه مندرة .. وهو رجع منترة ;gra .. لبوه الترترة .. وتاليتها المقبرة مسكين خشرووق ..;wah ..مايستاهل ;baw;baw;baw

قاموا دركوا عليه لانه كان مغمى عليه وشلوه للانعاش;baw ;baw ;gra .. وشكله بعدها معاد عاش ;baw ;baw ;gra

او اختلف المؤرخون في ذلك ;baw











السؤال لي يطرح نفسه .. وينصب على نفسه
س/ من قائل هذه العبارة :










( الطبع يغلب التطبع )















واقلب القدرة على فمها .. تطلع البقرة على امها











ج/ مرطاس








وشفتوا كيف الحمار خشروق .. ماتعلم من اخطاءه ومارضي يغير قوارته .. وشفتوا ليه الجميع ينظر له بنظرة احتقار لسبب بسيط جدا جدا .. وهو =====>>> لانه حماااار مع سبق الاصرار والترصد ....


كان الاحرى به بدل مايروح ويخسر من شان يغير ملامح وجهه .. يتعب شوي ويغسل ويصنفر مابداخل رويسه الناشف لي بلا مخ





لكم تحياتي وتقديري واشواقي ... وآسف من الصميم على الاطالة .. ولكنها هكذا كانت المقالة ... وسلموا على صاحب البقالة


الشعف

[flash]http://members.lycos.co.uk/shouof/for_all/mertas.swf[/flash]

[ود احمد]

بسم الله الرحمن الرحيم
السلام عليكم ورحمة الله وبركاته
اشكرك استاذي العزيز / ابو شعفان / المحترم
والله موضوعك شيق وقصه اكثر من رائعه وجزاك الله خير .
ونفكر علىكذا لو نستاجر حمير في هذه الا يام بدلا من المواطير .
و لا انته ايش رايك مش فكره حلوه بدلا من الا زعاج وهو نتذكر ايام زمان . (( زمان الصباء يا زمان الصباء عهودك رعاها الله )) .
واشكرك من كل اعماق قلبي على هذا وامثاله من مواضيعك المفيده وجزاك الله الف الف خير ومن العايدين مقدما .

[المدودي]

نعنبو خشروق
يستاهل يومه بلا ناموس
نسي أصله .. وحسب نفسه با يقدر على المتكرعن وجنوده ( و آه حشر ام سويد بين العول )



والأوامر حقه لو مرّت على زليخه ما با تمر على المتكرعن

والله .. انه غلطان لو انه دور للشهره والنشره في محل ثاني .. كانه قد حصلها .. بالا خبه .. ووجع رقبه


على سبيل المثال :

يفتح مكتب للنقل البري .. ويوفر عَرابِِي مريحه .. ويكسر السوق ... الرحله بعانتين ... !


ومش خسران




تحياتي المدوديه

[الشعف]

احلى سلام لاحلى ود بدوي في الدنيا .. وجه الخير

اشكرك من الاعماق على مرورك الكريم .. وبصراحة مواضيعك انت اللي روعة وغاية في الابداع

واما فكرة استبدال المواطير بحمير اممممممممم فانتاستِك بس ياريت تتحقق .. لوكنت جبت المشورة من اول قبل مايموت خشروق كنا بانشاوره ... لكن باقول لك سر بيني وبينك وياريت لا تقوله لحد ...؟؟!!

شفك مكانك للمرة العشرين غلطت في العنوان .. ورحت بعيييييييييييييييييييد .. مانا من اصحاب المواطير .. والحمدلله مالي في الحمير .. ولا لي في ابر التخدير ... شفنا الشعف بو شعفان .. الامير

لكن مايمنع نتوسط ونناقش الامر مع ذوي الشأن .. عشان يخف صقع الاذان ... من عرعرة الماطور والونان

وتصبح على خيل .. ياوجه الخير ..( وياريت لاتزعل .. شف مكانك في القلب ياغالي>>> ياغالي انشغل بالي .. يالغالي تعب حالي )


======================================

عزيزي المدودي ... صاحب المبدأ والرأي السديد .. ... لك خالص التقدير والتمديد

على قولك : نعنبو خشروق .. يستاهل ؟؟ ... هو من ناحية يستاهل مايستاهل

لكن يالله على قولك خله يقع عبرة للمعتبرين ... ;baw

الا باسألك ؟؟ من هيذي( ام سويد ) ؟؟ ؟؟

لا يكون لها شي قصة كما خشروق ومانحنا داريين ... ان شي لها ؟؟ منتظرين القصة منك

وفكرة النقل البري ( جدا ممتاااااازة ) ... بس رحمة الله عليه خشروق .. لو كان حي ماخلى الضباع تشلها ... .. لكن ماهي مشكلة بانبلغ عياله >>> وهم على ظهر من يشيل .. يمكن نلاقي حد من ذريته .. وبانبلغه يفتح المشروع

ونسيت قولكم ان المرحوم خشروق .. تزوج من المرحومه زليخة.. ورط

وانجبوا شعول و عجول وكبروا وصاروا ثيران وحمير ... وتوالت ذريتهم في الاخير ... يقولون من خلف مامات ..

اما المتكرعن فقد دارت عليه الدوائر .. وطلقته حرمه المصون .. ونفاه مرطاس الى الجزائر .

والتفاصيل تتبع في الحلقات القادمة ...

اوعا ايدك من الريموت كنتروووول

[marque]( كل عام وانتم بألف خير ) [/marque]

[بن صران]

سلام يا شعفان
عيد مبارك وكل عام والحلان في خير وعافيه

وما خشروق الا خشروق والدليل ذا