لي مايعرف ( الهرم ) .. هرااام عليه !!!

[الشعف]

اول امس يايماعه ..
مانا داري ايش لي صابنا ؟؟


ريعت من الشغل كما عادتي .. و عبود هوذاك هو ماشي انقلب في عبود ... نفس الروتين ...

لاوصلت الدار .. افتح الضيقه

وادخل بريلي اليمين واقول ( دعاء الدخول ) >>>>> باتقولون بكّاش

ساعات انساه لكن ماهي مشكله اغلب الاحيان اييبه .

ماعلينا .. بعد الدخول .. من الضيقة .. اخلس حذيي ( الصندل ) - وانتم كرام - اخلسهن عند المفقر حق الدار

واروح المغلولة حقي ( غرفتي )

وافتح الباب ؟؟؟










و ؟










ايييييي؟؟




عيب عليكم

غمّضوا يايماعه .. ماهو سوا كشف العورات

المهم .. اخلس ثياب الشغل ( البنطلون والمسدره ).. والبس ثياب الدار ( الصارون والكاني الفنص ).


طبعاً الحمدلله .. صلاة الظهر ماتفوتنا يماعه في المسيد ... ولا هي مدحه .. لان الدار مابينه وبين المسيد الا >>>> 31 متر و12 سنتيمتر ونص .. وشبرين وفتر وثلاثه اصابع وربع
ونحاول قدر المستطاع ان الصلاة تكون فيه ..
يارب عينّا وعاونّا على طاعتك يااااارب .













ايوة .. وين وصلنا !!!

صح ذكرت .. البس ( الصارون والكاني الفنص )
واندر من الغرفه .. ( المغلوله )
واللي كذ زار دارنا بايعرف على طول ان الطهاره ( دورة المياه ) - وانتم كرام -
مقابيل الغرفه حق بوشعفان .. على طوووول
الله يهدي المعلّم لي بنا الدار ... تخطيطه كما ويهه مايتميز هو ويه والا قفا

وانا على طووول لاكذ شفت الطهاره مقابيلي .. تقرقر شواي ... ومعاد شي داعي ندخل في تفاصيل يم
لازم نقّي لها زيارة .. حتى عالخفيف
المصيبه انه روووتين يومي .. كل يوم على هيذي الحاله


وبعدين .. لا انقضت الحايه ..
ووقعت الشوى خليّه ..
نفتح السيمفونيه اليوميه ..



: هياااا ... اييي ... يالله وييين الغداااا؟؟
يالله خفّوا ... والا شونا بانام>>>> لازم الواحد يقلب صورة شوي منشان تقع له هيبه
بيني وبينكم ولفت على نوم الظهر ( القيلوله ) ... وكذه فرصة الواحد يعوّض شوي من سهر الليل .. ويعقّب بدنه

اليماعه تصيقعونا .. وقالوا انت اليوم ريعت الدار سمح ؟؟!!
وماهي عوايدك ..عاد الغدا ماهو زاهل .. والرز شفه عالنار وماتسكّن سوى ... بغيته محقّط بانقدح لك لقيمه ؟؟


والله انا كما عادتي هوذاك هو وقتي كما العادة .. ما ريعت سمح ولا شي ؟؟
ذلا شكلهم هم زيدوا بالنوم وثاروا هير ... وبايردون الغومه بي

وكذنا الا قاعد حقّط في براشيمي .. اليوع يلقي ملاقي
والمشكله كذ عيوني مكسّسه من قل النوم
ومعاد دريت نهاقف للغدا لمّان يتسكّن والا لا ؟؟

تسنّدت بالتكيه .. وراسي كما المنعشه ( يتزقّل .. فوق تحت .. فوق تحت )
وفي النهايه ... غلبنا سلطان النوم .. لان وقته دخل وما طاع يصبر علي لمّان اتغدا

والله نمت على لحم بطني .. مخلي >>> وقاعد مانا مسدوح




ايوووه استلموا ماذحّين ... طبعا دخلنا باب ثاني
كنا في اليقظة .. ماذلحين في عداد الموتى ( طبعاً النوم زي مانتوا عارفين .. موت مصغّر )


ولا حول ولا قوّة الا بالله ...
المره لوّله حلمنا بعد عشاء ثقيل >>> ( دير وكرعان ) .. وكان حلم ليل

واليوم معوذ بالله ... حلمنا على خلوه ... وبالنهار
بس الحلم المره ذي ماهو كما لوّلي مساقط ومصاقع في ستر وغرش وببسي .




لا لا لا


اقولكم .. لعاد نحرق الحلم
وصبروا لمّان نهايته .. كذكم في الصبر معاد بايضرّكم لا طولنا شوي في الشرح والاسهاب ..>>>>




حلمت اننا قاعد في المدرسه حقنا ( ايام المسقاله )

وانا واصحابي >> عمران .. وسُلمان .. وبكّور .. وعبّود .. وحمّود .. ومندري من عاده
المهم ذولا لي عادنا ذاكرهم من الحلم ؟؟ لان ماهو كل حلم ينذكر .. لازم بعضه يسقط مع المساقط


قاعدين في الفصل .. وحق محذقه ماسكين الصف الاولي >>> تقول الا فاهمين شي

شويّه الا .. ودخل المدرس حق الهندسه >>> اسمه ( مستور ) وندلّعه ====> مستور يتعطف كما الباكوره

(استاد مستور ) ذا .. ماحد كماه طووول في القواره ... والعناد ..
وماحد يقدر يندر نخس في حصته
وياوليلك اذا راكزته في شي .. ينسفك وينسف اهلك .. ويخسف بكم الارض كلكم؟؟

ومعه عصا ... ياعييييني خيزران من الاملس .. لو مهطك بها مهطه .. تعلم الرشخه في يعبتك شهر ونص .

ونحن ما معنا غير نعطيه على مابغى ؟؟
نصرط مخوط .. وان كان حد يتنهّس مننا .


المهم دقّ اليرس ... وبدت الحصّه ..

وقوّمنا انا من دون الطلاب كلهم >>>

استاد مستور : بوشعفاان ... يالله قم مسح السبورة .. يالله

انا قمت وانا نتنافض .. لانه كان مرّه مقلوب صوره ؟؟ تقول الا تناقف هو مرته واندرته بلا صبوح ؟؟

مسحت السبورة وقعدت مكاني ؟؟

استاد مستور : اييييييييييييي ... من قال لاهلك تقعد ؟؟ انت ماتعرف الاحترام ؟؟ يابغل يا ...
: ياستاد .. والله العفو منك .. ذلا شفنا نسيت !!

استاد مستور :آه آه .. نسيت ؟؟
تنسى صبوحك والا غداك و الا عشاك ؟؟
ولايهمك لك الا من يخليك تذكر العمر كله ولعاد تنسى احترام استادك ( مستور )


اهه .. مهطه في المؤخره .. لمّان حاشت كبدي ... وقشّرت عيوني

: طيب .. ياستاد .. رخصه اقعد ؟؟ >>>> والله حرقتنا الرشخه .. ومعاد معي الا انصاع للمصيوع

استاد مستور : تقعد مييين ؟؟ ليه مقهايه هي ؟؟
ولانك خالفت استادك ... وتقول نسيت ؟؟ انا متأكد انك ناسي الدرس حق الحصه حق بارح تلولا ؟؟
يالله طلع ارسم لي الهرم ؟؟
؟؟ :في نفسي اقول آه هوذا الهرم ؟؟ وليه نحنا خذنا شي اسمه هرم في حصه بارح تلولا ؟؟
منين يخرّف ذا ابو باكورة ؟؟ .. >>> طبعاً مع الفزع كلّه يضيع

ماعلينا ... تناولت التبشور منه وانا نرقل كما السبوله ..
وسمّيت بسم الله ... وطلعت للسبورة ..
بغيت حد من اصحابي >>> اصحاب الستره .. يفك علي .. وانت وينك وانا وين ؟؟
مغني عند اصقع ؟؟

شطّيت في عبّود .. وهمست بشيش ؟؟>>>> عبّود ؟ كيكيه الهرم ... فك علي لك عمر ؟؟

عبّود : لك راعه ماتعرف الهرم ؟؟ .. ارسم مثلث يريع هرم ؟؟

: تنهّست من يوفي ( آآآه ) ... الحمدلله .. والاكنت صدق في حاله كشفا .. عرقه تطلع وعرقه تندر ..

ورسمت مثلّث .. >>> اصلا انا داري ان الهرم كما المثلث ... بس مع الفزعه نسيت حتى اسمي ..

استاد مستور : شعف .. لك شعفه تشعفك ؟؟
من قال لك ترسم مثلث ؟؟

في نفسي نقول : خاف يقع حلّي صح ؟؟ وذحين ان قلت له نقلت من عبّود .. يمكن يهزئنا فوق لي بي ..
مامعي الا قوله انا عارف ان الهرم كما المثلث ... وحافظ الحصه حق بارح تلولا ..

قلت له بثقه : انا ياستاد عارفه انه هوكذا صح !!

استاد مستور : من قال لهلك صح ؟؟ .. من متاه الهرم يقع مثلث ؟؟
منين يابوك انته .. قلّي منين من القاره ؟؟

بغيتوا الصدق انا ذكرت انه في حصّة بارح تلولا .. استاد مستور رسم لنا الهرم هوكذا .. وقال هوذا هرم بس من قدّام .. يعني ماهو من الجنب ؟؟ واذكر انه قال ان الهرم يتكون من ثلاثه وييه مثلثه .. وقاعده مثلثه .. وراس مدبب ... ويسمى هرم ثلاثي؟؟
وفيه نوع ثاني .. ابو اربعه وييه مثلثه .. وقاعده مربعه .. وراس مدبب .. ويسمونه هرم رباعي ؟؟

واذكر انه قال : اختصارا لوقت الحصه الضيق .. معاد بانرسم الوييه كلها .. لانها متشابهه كلها في الهرم الثلاثي .. يعني بانرسم مثلث واحد .. واعتبروه هرم ثلاثي ؟؟




ماعلينا ... واحد من الطلاب الفحافيح ... من لي قاعدين جنب الستره .. تقريباً ( عيضان )
قام رفع ايده .. وقال :
ياستاد مستور انته في الحصه حق بارح تلولا .. قلت ان الهرم الثلاثي عباره عن مثلث من يميع الاتياهات .. وبوشعفان ماغلط ياب نفس لي انته كتبته في حصّة بارح تلولا .. وانا كتبته في دفتري هنا ..

استاد مستور : كان حد عفص اثمه بعفص .. وقام يبربر على ( عيضان ) مسكين ...>>> وافتك مني ومن عبّود لي غربق نحنا له غبقه .

وقال لعيضان : انا باتعلمنا انته ياود امّك ... انا ماقلت لكم ان الهرم هوكذا .. لكن مادامك تتمحذق ياعيضان ... تعال هنا هيييييا

عيضان مسكين ... والله فك علي , لكنه حنب حنبه بت هر .. يستاهل اهله ليه تمحذق ويقول ياستاد انته قلت هوكذا
ريته سكت كان احسن له ولي ..

المهم عيضان كَل له مهطه كما لي كلتها انا قبله ...

استاد مستور ( يقول لعيضان ) : يالله ارسم لي قاعدة الهرم ياود الهرمه ؟؟


طلع عيضان .. وسرواله اخضر >>> عندينه فكها في عمره

عبّود ( يهمس لعيضان ) : >>> عيضان .. رُسُم مربع وعلى ضمانتي .

عيضان ما قصّر ورَسم مربع ؟؟ وكسر التبشور من كثر التكو في السبورة .

استاد مستور : الله الله ... قلنا ثور قال حلبوه ؟؟
قاعده الهرم ياعيال الهراميه ... مربع بس ؟؟ طيب فين الهرم ؟؟ كلتوه .

يابوووووي ... يابووووووووي >>>> هذا انا وعيضان مسكين حصلنا مهطتين من الاصلي .... وعبّود مغرّق السفن يتفرّي ويضحك علينا .


اح اححححح ... لعاد تذكرونا ( والله تحرق )

المهم لي بغاه ( مستور ) في شرعه يقّيه .. وحتى لو فر كبش ...

والفصل خمد وسكت تقول الا ماحد فيه ..
ونحنا ( انا وعيضان ) قال لنا مستور ريعوا مكانكم .

وبدأ يشرح الدرس الجديد >>>

استاد مستور : رايعوا الدروس سوا .. ماهو ماتعرفون تميزون بين الهرم و ( شبه المنحرف ) والمثلث ؟؟
ودرس اليوم عن شكل من الاشكال الهندسيه يسمونه ( شبه المنحرف ) >>> احتمال نييب لكم قصّته في حلم ثاني ؟؟
لان مافي ميال ليحشه >>> عفوا لشرحه




ومن يومها ولله الحمد ..
شونا حافظ الاشكال الهندسيه كلها صم .. >>> وباتمحذق عليكم بهن

الهرم : متعدد الاويُه ... ثلاثي ورباعي .
شبه المنحرف
المخروط
البيضاوي
الخماسي
السداسي
الدائرة
المعين
متوازي الاضلاع
المربع
المستطيل
المثلث
المنشور
القطع الزايد
القطع الناقص
.
.
.
.

الخ . . . . وان نسيت حد من الاشكال عذرونا لانها كثيييييير ...


واستفدت ان الاعتماد على النفس .. فيه فايده كبيره يم ... ليش؟؟
لاننا لو قلت يواب من كوري .. وطلع خطأ >>> استاهل العقاب بيداره . وكل دقّه بتعلومه .
وان ياوبت ... وطلع صح >>>> باحصل دريات بعرقي ..

ولكن يومنا نقلت من عبوّد .. كلّه وقع على راسي مهط وخبط ... وعبّود ماوصله شي .. لا مهط ولا ( درَيات ).

والحايه الثانيه .. لي استفدتها .. ان الهرم ( له اكثر من ويه ) ماهو ويه واحد بس
وان يينا نرسمه لازم نرسم وييهه كلها مع القاعده والراس المدبب .. ولازم نميزه ( ثلاثي او رباعي الاويُه ) .
وكمان لازم نعرف نميّز بين الهرم وشبه المنحرف ... صحيح كلهم اشكال ؟؟
بس كل واحد له محيط وحَيِم .. وقواعد وقوانين .. ماهو كلّه عند العرب صااابون !!





بو شعفان ... بو شعفاااااان ... ايييييييي بو شعفاااان تعااال هنااا

صحيت مهدّد من النووم ... حاسبه ( مستور ) بايهدّنا مرّه ثانيه والا بايقول لي طلع رسم ( مخروط ) .


طلعوا آل الدار .. يثوروننا منشان اتغدّى معهم .. لان الرز تسكّن والديايه استوت .

وتوووبه ان عادنا نمت بلا غدا .. والا عادنا نقلت من عبّود .. والله يهدي استاد ( مستور ) .



وسلاااااااامتكم

تحياااتي ,,,,


بوشعفاان

[المدودي]

آه الأحلام ذي ... أحلام و لا في الأحلام

و عندينك يا بو شعفان يوم دخلت الطهاره ما جبت دعاء الدخول .. و أكيد دحقت لك حد من الجماعة

من شان كذا طلع ذا الحلم في كورك

و حقكم الاستال ( بالذااااااال )فيه شبه من استالنا استال : كوفي عنان ( يلقب بهذا )

من وجهه تكره العلمه و تبغض التعليم

و الباين أن التربيه ما تقوم على ذولا




تحياتي المدوديه

[جمال العطاس]

ههههههههههههه

ايه الحلم ذا يابوشعفان ؟؟؟

وقع لك بالخيزران : بس بغيت الصدق تستاهل يابوشعفان .
ليش تنقل من عبود ؟؟؟ تشوفه سوى هوذا ؟؟؟
وبعدين ليه ماقلت للاستاذ مستور ان الحل قاله غيرك
تنسب الحل لنفسك ليه يابوشعفان ؟؟
هوذا سوا منك ليه ماتذكر الرجال لي قال لك بالحل ؟؟
جد يابوشعفان تستاهل الخيزران:p :p :p

[الشبامي]

اقتباس :

طلع عيضان .. وسرواله اخضر >>> عندينه فكها في عمره

الله يخزي ابليسك يابوشعفان
يستاهل عيضان يومه متمحذق
وانت الله يصلحك يومغلولتك قدّام الـ ايش باتنتظر من احلام غير كماذي
لكن تبغا الصدق يابوشعوف
مااقول الا اضحك الله سنك

[حاتم الطائي]

اقتباس :

الرسالة الأصلية كتبت بواسطة الشبامي الله يخزي ابليسك يابوشعفان يستاهل عيضان يومه متمحذق وانت الله يصلحك يومغلولتك قدّام الـ ايش باتنتظر من احلام غير كماذي لكن تبغا الصدق يابوشعوف مااقول الا اضحك الله سنك

حلوووووووة يالشعف ... ومحبوكه كمان
والشخصيات ذكرتنا بشخصيات معروفه
ولكن اعتقد ان المعنى في بطن الشاعر على مايقولون

بس ( الهرم ) معروووووووووووووف

نتمنى لك احلام جديده
واهرام عديييييييييييييده

[بن صران]

سلام يا شعفان
شفك مصيبه .... إن شبعت حلمت ....
و إن يوعت حلمت .... ذي فزَوره بغت جحا يحلها


بس بغيت با حذرك يا خفيف الدم :
أهل القاره فكو عيالهم في المزارع يجمعون أفقاش النغره ( يقولون با يحذفون واحد ذكرهم بالنقيصه في السقيفة )

سلام

[جمال العطاس]

حيالله بن صران وينك ياخوي
كما الهلال أنته ماتظهر الا أول الشهر
مشتاقين للحزايا حق حبابتي (فطيمون).

وبعدين شفك عارف باللي يغلط على الخلق في السقيفه.
ساعه يغلط على آل باوزير وساعه على كنده وساعه على
الساده

وبعدين اللي يغلط يستاهل يابن صران. يستاهل
بالخيزران حق ( مستور ) الأستاذ حق الشعف.
وعاد الخيزان أكرم له والا بالزنوبه حق المدودي

والهرم يابوشعفان اللي رسمته صار ( واحد من البعم )
[poet font="Simplified Arabic,4,black,normal,normal" bkcolor="" bkimage="http://www.alshibami.net/saqifa//backgrounds/3.gif" border="double,2,gray" type=0 line=200% align=center use=sp char="" num="0,black"]
كل من غلط عالناس يستاهل الهون = مايجني الا من عمله المهونه
تنظر جميع الخلق له نظرة الدون = وهو يحسب ان الكون يخرب بدونه
أصل الثقافه والأدب خلق وفنون = من ساءت أخلاقه خسيسه فنونه

[/poet]

وتسلمي ابن صران

[علي أحمد بارجاء]

بالأحضان يا بو شعفان :
أولا يا الشعف أنست و ارحبت , لنا مدة من كُتُبكُم , و ينك يا رجال ؟ تبت و تجي , انته مفروض يكون لك حضور يومي في السقيفة , تصدق إننا ندور لك و لكتاباتك الرائعة بالفانوس . ثانيا يا بو شعفان شفك كاتب قصة من الدرجة الأولى , و ما تكتبه يمكن اعتباره لون جديد من القصة المكتوبة بالعامية , لا تخلو من تصوير جميل و من فكاهة و من حكمة , و عادنا لا زلت أذكر قصة حلمك الأول بعد ما مليت بطنك , و شفنا قصيتها لأكثر من واحد ( و نسبتها إليك طبعا ) , أما قصتك الثانية هذه , فهي قصة رمزية , و يبدو أنني فهمت منها إنك تقصد تصوير الموضوع اللي على بالي و بالك , هل هذا صحيح يا الشعف ؟ ما تكتبه يا الشعف شئ رائع و جميل , و الأجمل إنك تحوله إلى مشاهد مسرحية أو سينمائية باستخدام الصورة , سلمت يا الشعف , أيها الأديب الكبير , كل ما أرجوه منك أن تستمر في كتابة مثل هذه الروائع , التي ربما تجعلني أضطر و أجمعها في كتاب و أبحث عمن يطبعها ( باسمك طبعا ) , لأنها لون من الأدب القصصي ينبغي أن يطلع عليها الناس .
أقول هذا بصدق و ليست مجاملة يا الشعف , الإبداع الجميل يفرض نفسه على كل قارئ .
بارك الله فيك , و لا تنقطع علينا كثير , استمر استمر استمر ...
أهلا أهلا يا بن صران , و آنست و ارحبت , من مصر , بس و الله إنها أحسن من جارتها , على الأقل شفت ( الأهرام ) , ليتك و ضعت صورتها مع ردك على الشعف , و قالوا إنك زرت مكتبة الاسكندرية , أكيد أكبر من المكتبة لي في القصر التابعة للثقافة حق سيئون , المهم يا حيا بك بين أصحابك , و لا تحرمنا من ابداعك .
تحياتي لكل الحلان الأعزاء , و دمتم في عافية .

[الشعف]

من ارض الاحلام .. وبلاد الاهرام .. بوشعفان يحييكم ( يالمفسرين ) الكرااام

و بعد السلام .. يحلا الكلام >>>>

المفسّر المسنّ ( المدودي ) :
ان جيت للصدق ياخوي .. شف كلامك سوى >>>> ذلا نسيت دعاء الدخول لل
وشكله لمخنا عفركوش .. وخلّى حسّي مطفوش .. وجانا الحلم المرعوش

و ( مستور ) ؟؟ وما ادراك ما ( مستور ) ؟؟ !!
شفه من عينه ذولا .. ما منه خير طوووووول
ودايم وهو مستكمل بعقله .. ومتكومن ( بنقله ) .. وخلوه ( مستور ) احسن
<<<<<< لعاد يمهطنا بالخيزران .. مافي آله له



المفسّر الضّليع ( بوهاني ) :
بغينا حرز ياحبيب .. ( يمنع النسيان ) .. لانه كثر عندي ليّام الاخيره
وان بايقع حرز( 2 × 1 ) معاد احسن منه ( برت بلص ) ... للنسيان والاحلام
وان جيت للصدق انا غلطت .. يوم تكومنت بنفسي وتمحذقت قدّام المستور والمكاشيف
ونسبت الحل لي >>>> والله لو قلت نقلته من عبّود .. كان المهط نصيبه
لكن ايش نسوي لبليس .. زاد علي ( الله يهديه )



المفسّر العام ( بو صالح ) :
ياسهلااااااه .. عاد عيضان ارحم مني ؟؟؟
عيضان فكّها خفيفه >>>>
مانا روّحت الدار حصّلت الغليظ المغلّظ >>>>
وشفنا من اليوم وطالع باسمع نصيحتك وبانام في ( الريم ) احسن برضه ؟؟
وكذه نطبق المثل ( يامسيكين من لا معه مرَه ... يطلع الريم يشبع كركره )
والله يعينك على احلااام الريوم بعدين



المفسّر الكريم ( بوحتوم والا بو عدي ) :
بغينا منّك تفسير ياهلي ؟؟ جبت لنا تحليل هندسي ؟؟
من ناحية ( الهرم ) شتّاااان بينه وبين ( شبه المنحرف ) ؟
ولا تخدعك المسميات ؟؟ شف ( الهرم ) طلع له اكثر من ويه .. وشكل .. ولون ؟؟
اما شبه المنحرف >>>> كذه معرووووووووف من اسمه
والمعنى في بطن الشاعر



المفسّر المقلّ ( بن صرّان )
انته هنا ؟؟ شفنا ماشوفك الا من حلم الى حلم >>> كما مطر الموسم
ومن يد شفها مصيبه الحاله لي انا فيها ؟؟!!
عندينها حاله وراثيه ؟؟ >>>>> شي معك حل وسط بين ( الشبع واليوع ) ؟؟ هته انا فدالك

ايييييي ؟؟ مالك الا تحذّر ؟؟ ذهن شفنا احذرك انا من المحارشه
ياحلو ... بو شعفان حاسب حسابه لكل كلمه قالها >>> ماهو كما بعض نااااس
والقارات جم وكثييييييير ( وتقريبا عددهن ست ووحده ضاعت )
انت شف ايش لي يناسبك .. واكمل الفراغ ( القاره ال؟؟؟؟؟؟ )
احذف واحد من الخيارات التاليه : ( الاوربيه - الافريقيه - الاسيويه - الامريكيه الشماليه - الامريكيه الجنوبيه - الاستراليه - الاطلنطيسيه )
افضل الخيار الثاني >>>>>> والله يعيننا على حذف الافقاش لي بايصلنا من الملايين
وان ماعيبك الحل >>> ضيف حرف ( الهاء ) قبل حرف ( الراء )




المفسّر الاديب ( علي بارجاء ) >>>> مع حفظ الالقاب
الله يآنسك بك ياستاد علي .. انا شفنا مويود دووب وانا في السقيفه .. والمفروض اكون في سقيفتي ( الكمبيوتر والانترنت ) .. ولكن لخلوها من الحلان والزوار - يع منهم والله حنقان شونا - .. يانا الاحباط يومنا وحدي قاعد فيها .. رحت سرسر في السقايف الثانيه .. وشفنا متنقل مابين المحضار وبدوي والا الصرقعه عند ( بوشروق )
وبصراحه شف كلامك كبييير يم علي والله .. ( ذلا خطرفات وهذيان من بوشعفان ) ولاترقى لمستوى ابداعاتكم انتم يا ادباء الفن والثقافه ... وانته ان عيبك شي منها توّك اعتبرها لك ( بدون نسبها لي ) رخصه لانها ماهي تراث >>>> اهم شي الواحد ينسب التراث لاهله ماهو يهضم حقهم فيه ( كما بعض ناس )
وبالنسبه للطبع .. انا باطبع شهادتك هذي وبابروزها وباعلقها في المغلوله منشان اذكرك كل يووم
واللي في بالي ... ولا على باله





ختاماً ... اشكر لكم يميعاً تفسيركم لحلم بوشعفان النهاري
وللعلم .. ماهي الا اضغاث احلام ؟؟ .. وتحتمل التأويل والتفسير حسب مقدرة المفسر المييد ..
واللبيب بالاشارة يفهم

نتمنى لكم احلاماً سعيده ... واعماراً مديده ...
ومستور يتعطّف كما الباكور *** في مسيد اليامع صباطة نوره

تحيااااتي,,,

الشعف

[ذيب شبام]

الله يسامحك يالشعف
ما صدقنا نفتك من الــ و الــ رجعت تذكرنا..
وذكرتني بمدرس الحساب حقنا ( قراندايزر ) زي مستور تقريبا نفس الطبع..

وبصراحة الفلم حلو