ياريت نحن ماخلطنا البر لحمر بالشعير

[مطر حضرموت]

غن يا التريمي بابني لك ساس ماكن من حجر =كلام قول وفعل ما هو مثل من يحجر حجير
دارك سقط انت وبن مفلح كما يحيى عمر = والدعم لي جاء باسمكم حوّله للعوجا عمير
واللي تضرر في مدينة ساه من جور المطر= بنوا لهم من دار في الجو من بغى داره يطير
بدّوا مصالحهم وخلّوا حالهم لوّل سبر = ومن تضرر أو سقط داره يهل في عين بئر
يا خيرة الأحزاب يا حزب النقاء يا المؤتمر = لولا خيانتكم كان ابن اليمن عايش أمير
قال الفتى الشاعر رحيق النوب من مجناه قر = والعين قاتلها السهر لي باعت النوم القرير
من يوم جات الدحبشه كم مين بارد فسل حر = ورجع كما الشيول على اصحابه ملقّي له حرير
بعد اللسان الطيبه ظهرت لسان اهل الجخر = لا خير في عبده ولا عابد ولا في عبود خير
ماشي من العوجا خلاف القات خذ مني خبر = يا شجرة الزقوم خربتي المهندس والخبير
والرّخص لي شفناه مثل البفك والفشفاش فر= وأخيارها بالغش والحيلة مسوا منها فرير
والعسكره لعبه اثنا عشرعسكري في عصب زر = لفلوف رذله عسكري تلحق معه رتبة وزير
نبكي ونتحسر على الدينار قلبي احتسر = وعلى الميه لي طولها في عرضها مثل الحسير
جابوا لنا عمله صنم في نصها يقحا الفقر= يوحل بها التاجر ويشكي من رذالتها الفقير
من يوم شفناها يغرّ المال والمرواح غر = وانتزعت البركه وجف الزرع لخضر في الغرير
سيل الجوين المفرعه ما هو كما سيل الجفر = جد الطلب معروف جنبيته كربه في الجفير
لي خمسة عشر عام سقّي غصب من سيل الشحر = من يوم جابوا لي عوض لعنه وحل ساحل شحير
ذا فصل والثاني مقال العبد متهم بالذفر = وشنطة السارق توقعها على عشرين فير
النار توكل في الحطب والعكر من فوقك عكر = وبعد كم ايام من كل شق باتعكر عكير
جريدة الايام موقوفه وعاصرها عصر = ياللي تصرطونه بقرشه باتقذفونه عصير
لا قد قرح قرطاس با تغدون ياالرذله طير = ومن ركب في الطايره من حيتها ماباتطير
بايقع لبوكم دوس في ظبره كما هرّ المجر = وبا تذوقون الأسى والذل والعيش المرير
حق حبّنا بالغصب يا عمار ما حبّك عمر = جهّز جوازك واشّر العمره سرح يا بن عمير
ياللي تكيل البر بالمصرا سرح خل الوصر = با ينكسر مصراك لا قد بان تحديد المصير
غضبان موج البحر والصياد في الغبّه بحر = ناصر مواج البحر لا ترجع قدم يا بابحير
كل المراكب جاهزه وشراعها مصرور صر=هجمه على الحيتان في الغبّه يصير اللي يصير
هذي السنه له روعها وروع لخرى لا بدر =بقلبه نص ّ المسرحيه على البطل احمد بدير
يا الحضرمي وش جاءك تتعرف على بدوان سر=وانته تخب والبدوي الحافي على رجيله يسير
شلّوا عليك الغاز والبترول وعطوك المغر=وقلبوا حياتك فريسه من لحق غاره يغير
يا خسّها بيعه سود تاريخها بحرا وبر=يا ريتها كانت مع شامير أو توني بلير
لكن هذي قدرة المولى ونؤمن بالقدر =ان عاد شئ نقذه بعونك يامهيمن ياقدير
والليل يالشعار ماطرق شريمي في المشر=ياريت نحن ماخلطنا البر لحمر بالشعير

باعكيم

[الفتى الرحال]

كلااااااااااااام كلااااااااااااااام
والفرج من عند ربك بايجي ان شاء الله
اقول هذا البيت يكفيه

عشرين ..من عمره,, ولا ذلحين وضعه ,,ما ستقر=باذكره؟ ياصاحبي لاقد ,,نسي رعي ..الحمير

[حضرمي كامل الدسم]

نعم ياريتنا ماخلطنا البر لحمر معا الشعير لاكن مقدر ومتكوب وكل ضالم وله نهايه

[مطر حضرموت]

انطفت الكرباء من نور عبورك يالفتى الرحال

[مطر حضرموت]

حضرمي كامل الدسم

وما كل المطالب بالتمني
ولكن تؤخذ الدنيا غلابا

سعدت بحضورك

[سالم السقاف]

واللي تضرر في مدينة ساه من جور المطر= بنوا لهم من دار في الجو من بغى داره يطير

هههههههههه ... صح لسان القائل والناقل