مساجلات شعار المحبه والغزل

[أحمد العمودي أبوفيصل]

قال العمودي تعب قلبي = صاحبي ماخاف من ربي
مشكاي لله عظيم الشان = يكفي من الجور والبهتان
ذكراه دايم على بالي = واليوم حطمت امالي
ماكان هذا في الحسبان = يكفي من الجور والبهتان

[أحمد العمودي أبوفيصل]

مقدر عابعدكم ليله = بتبعك حتى الى خيله
ماباك تبعد عن الاعيان = يكفي من الجور والبهتان
لمى متى وانت ظالمني = في كل حركه تراقبني
لمى متى ياغصين البان = يكفي من الجور والبهتان
القلب يازين لك وحدك = مقدر يازين عابعدك
الدم يشهد مع الشريان = يكفي من الجور والبهتان

[بن قطمان]

العمر كله على شانك=وارحم بجودك واحسانك
ياراعي الجود والاحسان=يكفي من الجور والبهتان
عذبتني والله الشاهد=معذور من الالف للواحد
معذور ويقول بن قطمان=يكفي من الجور والبهتان
في قربكم مامعي راحة=مادمت واقف على الساحه
لاتختفي ياقمر شعبان=يكفي من الجور والبهتان
نظرة عيونك تطاردني=والعقل ليته يساعدني
واصبر على نظرة الاعيان=يكفي من الجور والبهتان
طايع وفالسمع والطاعة=ساعي معك واتبع الساعة
ياغصن مائل على الاغصان=يكفي من الجور والبهتان

[أحمد العمودي أبوفيصل]

مرحيب ياوعل ياحاني = يالي في العشق بتعاني
انست ياولد بن قطمان = يكفي من الجور والبهتان
وينك اليوم ياطالب = والا النوم عليك غالب
وينك يانسل بن نعمان = يكفي من الجور والبهتان

[طالب النعماني]

ياسلاااااااااااااااااااااااااااااااااام عليكم ياشباب
ابشروا ابشروا امير الشعرا واستاذ العشاق وصل
ابوفضل سالم (سالم محفوظ باسنبل ) ان شالله يزحي هذه الصفحه باجمل واروع القصائد
نحن ننتظر الاخ ابوفضل على احر من الجمر

[أحمد العمودي أبوفيصل]

لي كان بالصوت والصوره = صورته في القلب محفوره
لمى غدربي وفي خان = يكفي من الجور والبهتان
ذلا من اول اوديبك = واليوم قررت انا سيبك
برميك في سلة النسيان = يكفي من الجور والبهتان
ياما في السوق جم مثلك = داخل السوق من قبلك
فاكرك اصلي من اليابان = يكفي من الجور والبهتان
غلطان شفني في الحسبه = محسبتها زين بالنسبه
موزنت بالرطل والميزان = يكفي من الجور والبهتان

[بن قطمان]

سلام مليون يالغازي=ماله نهايه ومتوازي
سلام ياشيذر الرميان=يكفي من الجور والبهتان
العشق يقتل براء حالي=واتخالط المر بالحالي
عبر ليالي ونا سهران=يكفي من الجور والبهتان
ونسيت ربعي وخلاني=من بعد مالزين خلاني
وعشت في عالم النسيان= يكفي من الجور والبهتان
يابندقية سلب رامي=ياشربة الماء مع الضامي
عطشان قدلي سنه عطشان=يكفي من الجور والبهتان
شربة هنيئه تكفيني=ومد بالكاس واسقيني
ياغيل سابر من المعيان=يكفي من الجور والبهتان

[عبدالله الحامدي]

لوهي بخيرتي يالسالي = باعود فرحان لجبالي
باعيش فيها وأنافرحان = يكفي من الجور والبهتان
يامعسر البعد والغربه = فيها البنادم يحس كربه
الناس نامت وهوسهران = يكفي من الجور والبهتان
ياليت حد بايوديني = ساعه وقابل محبيني
بشكي بحالي وكل ماكان= يكفي من الجوروالبهتان

[مبروك بن ماضي]

غروٍ حلو تقتل عيونه = ياكيف باعيش من دونه
السحر في مقلتيه يْبان = يكفي من الجور والبهتان
ياليت هم بايخلونه = يروي عطش قلب مجنونه
(مبروك ) له دايماً عطشان = يكفي من الزور والبهتان

[طالب النعماني]

اقتباس : المشاركة الأصلية كتبت بواسطة عبدالله الحامدي

لوهي بخيرتي يالسالي = باعود فرحان لجبالي باعيش فيها وأنافرحان = يكفي من الجور والبهتان يامعسر البعد والغربه = فيها البنادم يحس كربه الناس نامت وهوسهران = يكفي من الجور والبهتان ياليت حد بايوديني = ساعه وقابل محبيني بشكي بحالي وكل ماكان= يكفي من الجوروالبهتان

ياسلااااااااااااااااااااام عليك يابوحمد
كلام جميل جدا
اتنمى ان تكون حاظرا هنا ولاتقطعنا مشاركاتك يالغالي