مشوار الاحبه (ابوفضل وعيون المكلا )

[طالب النعماني]

اعجبتي مساجلات وابداعات الشعار ابوفضل وعيون المكلا
وحبيت ان اضعها في صفحه واحده حتى يسهل على القارئ الكريم ان يشاهد هذه الدرر الثمينه بكل سهوله

بدع الشاعر الكبير سالم محفوظ باسنبل (ابوفضل )

يقول سالم ياعذابي = صيح ولاواحد درابي
والله لي عالم بلحوال= البعد سيفه حاد قتال
حس الكبد منك جريحه = من يوم ركبت الشريحه
والقيت لك يازين جوال= البعد سيفه حاد قتال
هرجه كما طعم البغيه= تكفيك كلمه عاطفيه
منه تساوي النخل والمال= البعد سيفه حاد قتال
ماحد خلافك ياضنيني= ساكن وسط قلبي وعيني
ولاعلى الخاطر ولا البال= البعد سيفه حاد قتال
كير الهوى هو والمحبه = له ناروالغيره تشبه
عاده الما اليوم شعال= البعد سيفه حاد قتال
قرحت على كل المرابي= والضرب جاني من صحابي
قالو استلم يالشاجع الفال= البعد سيفه حاد قتال

جواب الشاعره الموهوبه عيون المكلا

احس علقم في شرابي = البعد قد طير غرابي
اسألك ياصابر سؤال = البعد سيفه حاد قتال
هل من تغرب لجل يبقى ؟= في البعد يتعذب ويشقى
وناسي العم والخال = البعد سيفه حاد قتال
او ان بعدك شي ثاني ؟=ومترجمه بين المعاني
احسبه من اختك تدخال = البعد سيفه حاد قتال
في كل شي اختك صريحه= اقولها جمله فصيحه
ماهمني القيل والقال = البعد سيفه حاد قتال
كل من دخل باب الهويه= يلقى المتاعب والاذيه
لايلقي الصد موال = البعدسيفه حاد قتال
باين من احروفك تعاني = عائش بحلمك والاماني
في انت عمري ولاطلال = البعد سيفه حاد قتال
صارح واعلنها الحقيقة = ماحد طلب منك وثيقه
او قال بوفضل محتال = البعد سيفه حاد قتال

جواب ابوفضل على عيون المكلا

كلام ياعيون المكلا = مثل العسل وان قـلت احلا
كله عبر واحكام وامثال = البعد سيفه حاد قـتال
انتي بأشعارك فريده = يبان من وحي القصيده
انك تدخلتي في الحال = البعد سيفه حاد قتال
حصلت منك اخذ خاطر =صحيح ان لك قلب طاهر
ويرشد المخلوق لي ضال = البعد سيفه حاد قـتال
اذا بدينا بالصراحه = بانعيش في جنه وراحه
وبانحقق كل الآمال = البعد سيفه قـتال
طبعي انا اعرف رفيقي = وحدد مساري في طريقي
من قبل مانبدا الترحال = البعد سيفه حاد قـتال
انك على شرطي موافق = وتكون في الرحله مرافق
لاتروح بي في وهم وخيال = البعد سيفه حاد قـتال
شف لي بقلبي عا لساني = خايف تكون انسان ثاني
ومختـفي في شكل تمثال = البعد سيفه حاد قـتال
يامن بأمر العشق عالم = خلك مع بو فضل سالم
ومقترن قولك بالأفعال = البعد سيفه حاد قـتال

جواب عيون المكلا على ابوفضل

الشعر والحب في حيزضيق=يبدعوا ويكون شيق
لوحاتهم الوان واشكال = البعد سيفه حاد قتال
الشعر هو تقرير طبي = احيان ايجابي وسلبي
ماهو على بالك على البال= البعد سيفه حاد قتال
المختفي بيبان لونه = غيرك تمرغ في ظنونه
في الشك والظن لازال = البعد سيفه حاد قتال
ان كنت شاعر ابن شاعر = تعرف رقيقات المشاعر
وصوت كنداره ومرسال = البعد سيفه حاد قتال
مثل الذهب لامع يبرق = ماهو بشاعر مايفرق
مابين ورده ومثقال = البعد سيفه حاد قتال
لو كنت في شكك مبالغ = او عادتك مثله تراوغ
باتقلب العز اذلال = البعد سيفه حاد قتال
اتعبت من هذا وذيه = وكأنني فيكم اذيه
ياناس يكفي التقوال = البعد سيفه حاد قتال
من حرف واحد ماتريده = رديتها اعلاقه وطيده
مابين اثيوبي وصومال = البعد سيفه حاد قتال
والعشق لك وايضا لغيرك = في اتجاهاتك وسيرك
بتشوف حاسد وعذال = البعد سيفه حاد قتال
احسب حسابك لاتسرع = صاحبك زيك قد تجرع
مر التشرد والتنقال = البعد سيفه حاد قتال