هاجسي له ثلاث ايام يطرح ويجمع

[ابو نجود]

هاجسي له ثلاث ايام يطرح ويجمع
والنتيجه ثلاث اصفار بانت سريعه

ياخساره على ماصار ماحد توقع
ضيعوا مكسبي بالمكر هو والخديعه

عاد ثوب العمل ياناس اصبح مرقع
بعد ماكانت اجيوبه ملانه وسيعه

ماجرى لي سرا عالقوم نازل ومطلع
هكذا الوضع من بندر عمر لا الوديعه

صار حتى الذهب واللول ذي كان يلمع
بيد فحام في سوق الحداده يبيعه

لاظهر بين باقي الناس يظهر مبرقع
من لباس الورع والدين ملقي ذريعه

كيف نعمل وكيف الحل ماطاع يشبع
جيش ساعه وساعه امن واخرى شريعه

مثل حربا على حسب المصالح تنوع
يوم اصفر ويوم احمر بلون الطبيعه

ضاق حال البشر من حكم ثعلب مقنع
صار يجمع و ينشر وسطنا من قطيعه

لا متى يا ديار العز نسكت ونخدع
عيب ياناس عالباطل نوافق نطيعه

وين ذيب الخلا ذي كان في السوق يرتع
وين حراس كانوا دايما في الطليعه

وين اهل السلف للظلم والذل تردع
هم حصون المكلا والقلاع المنيعه

هم سيوف العداله ساعة الصفر تقطع
حدها فيه كم خرت رقابن صريعه

حان للحق يظهر في سمانا يشعشع
والنهايه لكل ظالم تغطرس شنيعه