هذا كلامي وخلو من درى يدري

[بازراره]

السلام عليكم ورحمة الله وبركاته

اخواني حلان السقيفه هذه قصيده قديمه مرسله للاخ فايز يسلم باسر من كلماتي

ابديت بالله لي يرجع اليه امري=يرجع بنيه مطيبه حبلها مصلوب
واعمال زينه بها باينشرح صدري=مهي معاصي ولافيها خطاء وذنوب
يامالك الملك ثبتني على صبري=والصبر محمود من زام النبي ايوب
الحمد والشكر لك لثناه من بدري=اعداد مايرجع المخطي يحج ويتوب
واعداد مالدم في عرق الكبد يجري=واعداد ماتشرق الشمس على الشنطوب
واعداد ماهز نود الحر والبحري=واعداد مالرعد يرعد في غمر وطهوب
واعداد ماغرد العصفور والقمري=واعداد ماتحن عالمجنى فروق النوب
هذا كلامي وخلو من درا يدري=يذكر جهنم ويذكر كيرها المشبوب
وبعد بوصيك يالعاني سرح بدري=من الجريبه سرح حتى الزمن مقلوب
بعطيك خطي شروق الشمس لاتسري=للساقيه عند ذي قوته عسل مصبوب
لاعند فايز وقله قد بلغ قدري=قد جبت لك خط واضح بالقلم مكتوب
والمصلحه لي تباها شلها المهري=والحَب شله وهو بين الغشر والشوب
واحنا خسرنا ولا باينقبل عذري=وانته تبا النوب يجنى والقصب مصروب
والعاصفه يوم هزت صاعة العصري=ولا نزوله برد في مقدمة لشبوب
والسيل حقه مسا في لوديه يجري=تسمع عزيف الثواجي في عقل ولصوب
من يوم عدا العلم واتخلف الكبري=مضمون تحنب وانا قد لي زمن محنوب
لا مالحقت الحجل بعد المطر مذري=بالشان تطعم لذيذ القوت والمشروب
والثانيه قل لفايز راجع الحضري=لايقول وحده وحد راضي وحد مغصوب
قله بلدعي على العطاس والجفري=والبيض لاقد رجع بيحقق المطلوب
عنده تواريخ ميلادي وشي هجري=مايستحق شي اهانه او مشقه دوب
رئيس مثقف بطل مهو كما الغجري=وفي عام تسعين جاء ريئس بدون اسلوب
والحمل لي هو على ضهرك على ضهري=هو ثقله فوقنا العايب المتروب
هذا كلامي ولابينزعج فكري=واقرب طريقه تفرج كربة المكروب
وإن جاني الموت وتوطيت في قبري= باتفقدوني نهار الشف والماجوب
بتقول لول على ناجي نشد واهري=لاتقابلو في العضيده ينكر المعتوب
والختم صلو على محمد وله شكري=اعداد مالقول يافتاح يامطلوب
والله يرحم عبيده عالم السري=دي رد يوسف وفرج عالنبي يعقوب

تحياتي

ناجي بازراره / ابو نعمان