رحلـــــــــــــــة صنـــــــــــــــــــعاء

[الخل الوفي المشجري]

ياعـــــــــــجايب شفتها وجبال ومناظر بديعه
زينت صنعاء وصــــــنعاء مو بناقصها جمال

البها والمـــــــــــجد والتاريخ وعلوم الشريعه
قد حوتها كلـــــــــــها ومجال يفرق عن مجال

ياليالي عشتـــــــــــــها وايام في ذيك الطبيعه
كأنني في جــــــــــــنة الفردوس والجنه حلال

سرت يوم السبت ورجعت الخميس اللي تبيعه
كأنها ساعه مضت ماحسبتــــــــــها عدة ليال

وبعد ماقضِّيت شفّي جاتني في النفس ليعه
وعاش عقلي بعدها ساعه وراء ساعه خـــيال

لأن عيــني شاهدت اشياء خياليه فظيــــــــــعه
شاهــــــدت بنت العرب لي خصرها زي الهلال

وشوفها في الحـيل يشفي علة النفس الوجيعه
وحسنـــــــها ماله وصف محال اي والله محال

بحسنها نبضي توقف في الشرايين الوسيـــعه
وثقلت الرجلــــــــين كأني ماشيا وسط الرمال

لا قور. لا فخر. لا عزه. ولا خطوه سريــــــــــعه
وغاب عني كل شي حتى جـــــنوبي والشمال

وفوق ذلك ضيعتني بالتفاكير الشنيـــــــــــــعه
وسولتلي النفس قالت قم سألها كم ســــــــؤال

قمت وترددت.. مابين التقدم والرجيـــــــــــعه
بعدها جمعت كل اقواي وطرحـــــــــت السؤال

بديت بأمر الله لي كلمـــــــــته واسمائه رفيعه
ثم كلام(ن) طيب(ن) يضــــــــــــــرب على طيبه مثال

ردت اسلامي بخير مـــــــــنه من حيث النفيعه
ولازمت للصــــــــــمت كانها بنت شهر(ن) لاتزال

قلت..بالله خبريــــــــــني صمت هذا أو قطيعه
قالت..تكفى حل عني روح ياولد الحـــــــــلال

والزعل بان بعنيـــــــــــها كأنها وقعت وقيعه
والدليل انها تجاوب ابحراره وانفــــــــــــــعال

قلت..علامك يابنيه في اساليبك طبيـــــــــــعه
قالت..عفوا الكلام اللي صـــدرعن ضيق حال

وبعد ذلك خاطبتـــــــــــــني بالعبارات الرفيعه
وقالت..آمر تحت امرك لو سألت امية ســؤال

قلت.. بالله ويش جابك قالت.. لازم بيع بيـعه
انا كبـــــــــــــيرة أسرتي وبذمتي عشرة عيال

والأسى والحزن والأرهاق اعياها جميــــــــعه
والهموم اللي عليها وزنها وزن الجــــــــــبال

قلت صبرك والصبر ميزه في النفس المطيـعه
قد وصى بالصــــــــــبر ربك عزة الله والجلال

والمهم باقي سؤال(ن) يقفل ادروب وسيــــــــــعه
قالت ..اسأل.. قلت.. اســمك هو جواب(ن) للسؤال

قالت..اسمي مو بغـــــربي اسمي الأول منيعه
قلت.. عاشت كل الاسمى لي اسسها الاحتمال

وطابت الجلــسه وطبنا في أدب من غير ميعه
ماحدى عدّا حدوده والسّلا والصــــــــــفو طال

والسوالف داهمتــــــــــــنا جاتنا من كل ضيعه
وفي الاحاديث الغريـــبه قد حصل نقش وجدال

وانقسام اهل العروبه كرد مع سنه وشيـــــــعه
والنهايه وصلتنا لا جنود الاحـــــــــــــــــــتلال

وافترقنا عن بعض والشـــــوق في قلبي يزيعه
نرتجي ثاني لقاء يالله عسى حسن العـــــــمال

والسهر قسم الموادع ليلة ايفارق وديـــــــــعه
والمثل قال التلاقي عاقبته الانفــــــــــــــــصال