[المدودي]

أللي جاوا السنة الماضية جايين السنة ذي برضه , والباين أنهم ناويين نية زينه ومستفيدين من الأخطاء السابقة.
طبعاً أقصد أصحاب برنامج ( الطرزان ) اللي بيتوا يهيصون على راس الجبل وصاعوا الأمة وجرحوا صوم العويله.
نقلة نوعيّة في التطور نحو الجاهلية .. قالوا بانرعشكم في رمضان لأنكم من ذاك الوقت معاد عرفتوا للرعشة طريق , وبانعطيكم ثلاثة أيام عشان رعشة قلوبكم ودهرشة عقولكم .
الناس في اليوم الأول ما كانوا مهتمين وحاسبينها الا دعاية إعلامية وماحد تعذب إلى راس الجبل والشغبة باتنهيها الشاشة.. بس لم شافوا أن الشغلة مش رعشه وبس وإنما زلط يتحاذف من كل مكان قرروا مشاركة الشَّعب أفراحه وطلعوا الشِّعب ثاني يوم وربك وفقهم وجابوا ميه وخمسين ألف .. بعد كذا حتى لي ما عنده نية للمطلاع قرر يطلع , بس في خيبتهم حصلوا النسوان قبلهم ,, كيه المرأة شطر المجتمع , والطرزان جاء أصلاً من شانها ,, ووقعت زيطه وزمبليطه واهتز الجبل والسمره ذيك الليلة كانت باتسطفط .. بس ربك ستر .. وقامت ( ردمه ) وألقت فيهم كلمة خلت الجماعة أنطرحوا ونسيوا أنهم أنضحك عليهم في حجز تذاكر المشاركة..
وطبعاً بعد التحليل والتدقيق أتضح أن الناس كان كل همهم ردمه ـ وسبحان الله معاد حد يقز : لا صوت ولا صوره ـ .
المستغرَب أن الناس ضيعوا صلاة التراويح من شان سمرة الجبل , ومش كذا وبس في أخر ليله جات خلق عمر ابوهم ماجاوا إلى منطقة الجبل من قبل , بس من شان صاحب القبة تهون النكبة ، وبعضهم لما جاء وحصل أن التذاكر خلصت ما تردد .. حجز له خيمة لمدة ليلة على راس الجبل ،، وكله يهون من شان مغمش العيون .
وزي ماقلت أن سبب جيتهم متعة عينيهم ...وفي رمضان.. ( اللهم أني صائم ).
والناس عبر الفضائحية شافوا فضايحنا, والحمد لله أن بناتنا المرة الماضية كنن مسترات وفرغوا لهن ليلة وحده فقط ..لكن هذي المرة الله أعلم كيف بايكون الحال .. والصوم مش مشكلة ينجرح بس العالم ما يقولوا عنا أننا متزمتين , ومنغلقين , ومعقدين , ومتخلفين , ومتـ .. , .. ـين , وصايمين ...!
ويا اهل العنيّه خافوا الله رمضان شهر العبادات مش شهر السمرات على الجبال ..
ويالله بصوم مقبول..