[المدودي]

قولوا الحمد لله على السلامة

قريب أسبوع مرطوس بي في الدار وماحد نشد ولا تخبرعلي

با قولكم السبب :

عزكم الله قبل اسبوع ضويت من السوق وجبت معي غرشه شراب .. شراب وارد ( يونايتد كنج دم ) ـ أصلاً نحن كل سنة نجيب ( تانج ) بس طلع شركة أمريكية .. و( قالوا ) لازم نقاطعها .. وقدر الله قاطعناها رغم ان طعمه زين .!

المهم .. قلت لاهل الدار لقّوا لنا نص طنق ـ بالدي ـ منه الشراب ذا وقربوه مع الفطار ... وما قصروا .. بعد ما أذن كلت لي تمرات وقلت على الطنق وكعتت لي ربع فيه .. وعندي نيه نغلّقه كله بس يوم قامت الصلاة قلعته ورحت للمسجد

قبل الصلاة كنت ريّض .. بس في الركعة الثانية حسيت بقعه تتماوس في شواتي .. ويالله تخلص الصلاة وخبّه على الدار ـ ثلاثه مساقط في الطريق شُوي ! ـ وبسرعة للطهاره ـ WC الله يعزّكم ـ وطحست عند الباب بس في النهاية وصلت للـ ..

عشر دقائق وما طرّقت الشوى .. خرجت ..عادنا الا جلست .. رجعت الحاله .. رجعت دخلت .. خرجت .. دخلت ..خرجت .. دخلت .. لمان كذ دحقت رجلي علمت عند المردم حق WC

في النهاية قررت الإعتكان في WC ما دمت فيه .. وأمري لله تعالى .. جات الكاميرا الخفية .. وغلّق حق كشكوش .. وانا مكاني معكون وماشي فايده

الوجع كلما يزيد
خرجت وقلت لخوي محمد : رح قدا بو حمدي ـ صاحب صيدلية ـ وقله تجمّل بغينا نص درزن ( فوار فروت ) .. الباين انه (حَيز ) قده دايم يجينا في رمضان ..!

وما قصر بو حمدي قام من فوق الشربه .. وعطا محمد الفوار.. وكثبت ثلاثه منه في الدن وقلت منه حيز ؟؟ بايقتله الفوار..

لا انقتل .. ولا هم يحزنون ..!
مكان الحاله هي ذيك هي .. محمد : رح قدا بو حمدي خلّه يعطيك ( ريني ) ولا ( أسيكون ) ولا (ترايسيل ) ولا أي دوا حق حموضة .. وبسرعه

شربت الحبوب .. وماشي فايده
محمد : جب دوا الحوشه اللي يقع ( أفومين ) , (بلاسيل ) ... خر بسرعه شفنا بانفقش من الوجع .

ما شي تحسن .. والباين ان يومي قرب
محمد : (فولتارين ) , ( باسكوبان ) أي شي ضد الماغص هته .. وخف نفسك ..

محمد : هت ( بندول ) , ( باراسيتامول ) , ( أسبرين ) , (سيدرجين ) , شل السيارة ونقف الصيدلية كلها ... لحقنا شف الوجع بايوخذنا ..

وزاد علي الوجع كذنا نصيح ونغفل .. وربشت أهل الدار .. و جاوا الجيران..
بو هادي ـ جاري ـ قال : شفه ( حالب) .. وبا نفحس العرق ..؟
* فحسوه ..!
فحسوا العرق ..و الوجع ما خف .
بو هادي : آخر طب الكي .. بغيت لك كيّه في العرقوب بشريم أعوج حق حداد ..اه قلت باتكوي ؟
* في العرقوب ولا حتى في النغاه .. كو وخارجنا..

كويت وعويت .. والليل كله وانا اتمحلل من الوجع : لك الحمد يا رب .. كل الأدويه جربناها .. وماحد غيرك يفرج على عبده .. فرجها يا رب

ومن غبوشة الله .. سرحنا لمان المستشفى فحصنا البول والمخروج و الدم والسكري وسوينا خمسه وسبعين كشفيه ورحنا قد الباطني ..
ـــ أيش عندك ؟
* دار .. سيارة ..غـ...
ـــ أيش بك ؟
* آه ... مغص ونغص من البارح .
ـــ كلت شي مقلوب ؟
* كما هواه ؟
ـــ حاجة عادك ما بدا كلتها من يوم دخل رمضان ؟
* والله .. ماشي جديد .. الفلاح كما كل يوم .. الفطار كما كل ليله .. نعم !
ما خلاف الشراب اللي هو جديد على الفطار.!
ـــ بس أكيد هو
* ليه شي شراب طلع في الكشفيه ؟؟
ـــ طلع عندك ( بيوسننج )
* و أه يعني الكلام ذا ؟
ـــ تسمم ..
* ولا خنّه من الشراب ؟؟ ما هو معقول ..! شراب Made in UK مش أي شراب



القصد .. عطانا زنبيل دوا ... وأول ما وصلت للدار قلت لهم هاتوا الغرشه حق الشراب با شوفها

جابوها

قلّبتها

* محمد : عكن الشراب اللي في الغرشه في WC
ــــ ليش



الشراب خايس حسف يومه من حق برع
الله يقلع ( حق برع ) وما جا نحن من آل برع وقدها مقاله سابقه :
من قوته على الجيران ـ أو بالأصح عيال الربحان ـ عِد به يكزم ومصيره يسقم

وبصراحه الباين أنه لازم نقاطع بضايعهم ولا نصطقر بالدعايه اللي مسوينها لها .... و اللي عندنا يكفينا ويغنينا
قاطعوهم .. ولا بايقع لكم كماي
وما تشوفون شر إنشاء الله

[الشبامي]

ماتشوف شر يالمدودي
بس بغيت باقول لك حاجه تفاقدت التاريخ قبل ماتشتريه؟؟
سلامات لك وشوفوا مقاطعتهم احسن لنا واكرم على ابوهم الهلاك من الله
وسلامتك اخوي المدودي وذهن من صناعة الكنق دم

[محمد باذيب]

ياحافظ عليك ماتشوف شر
ذلا بك عين من تاتشر الرماية

[سالم محمد بلفقيه ((الشرقاوي))]

الحمد لله على السلامه وماتشوف شر مدودي
بالصراحه انا بقدر ماتاثرت بالقصه اللي حصلت لك واتمنى ماتعود لك انا استمتعت ببعض الكلمات الحضرميه القــــــــــــــــــــــح والتي اظنها فصيحه اكيد ههههههههههههه وماتشوف شر للمره الميه0

المهم عرفنا السالفه انك راعي صيدليه وقاعد تعدد لنا اسامي الدواء اللي عندك بالصيدليه
>>>>>>>>>>> راعي مشاكل0
ياخي اسمع فيه شراب بدل التانج نوع تركي اسمه فورتين جربه شفه زين 0
كشكوش كشكوش كل مره تذكر كشكوش ياخي شوقتنا له من اليوم باجلس باشوف كشكوش ذا لاننا بالصراحه ماتابع غير صادوه ومسلسل خليجي وايد حلو اسمه ثمن عمري لايفوتك مدودي هههههههه 0
فمان الله مدودي الحبوب

[المدودي]

هداك الله يا شرقاوي


ليش ما يفهم في الدوا ء غير راعي الصيدلية ؟


يعني أنت راعي بقالة ؟؟


وعندك شراب تركي اسمه فورتين ما ابتاع لك وبغيت با تغبقنا به ؟؟

(لا تزعل ... نحن حبايب )


على كل حال .. هي يمكن تكون عين زي ما قال أخونا باذيب


لكن سمعوا نصيحة مشرفنا الشبامي وقاطعوهم قطّع الله عروقهم

[الشعف]

آه بغيتوا بالتانق والتركي ... ووارد كنق دم وحرق دم,,, ماشي كما [glw]الليم والسكر[/glw] يبرد الحلق وينقص الضغط ويهدي الاعصاب و.....ووو ,, ويكفي انه من صناعة بلادي ماهو من عند عيال الربحان

ونصيحة يالمدودي ثاني مرة اذا مغصتك شواك عليك بالدخون... يااما فوره وشرب ماه والا مص لك شرخ دخون ,, وكله بايروح وباتقول قال الشعف...
وربنا يبعد عنك وعنا المغص والاعتكان في الWC.

[بنت المكـــــــــلاّ]

ههههههههههههه المدودي ممكن سؤال
انت من اي منطقه باليمن او من حضرموت بالضبط من وين 0
ومشكور0

[المدودي]

مشكور يا بو شعفان على النصيحة .. بس أنا الحمد لله من بعد ما بطلت في وارد عيال الربحان ... الحمد لله لعاد مغص ولا نغص .. وعلى قولك السكر والليم أحسن .. بس أنا برضه رجعت سوي لي مديد ـ مريس , عصير التمر ـ هو زين برضه











أه قبل ما انسى

بالنسبه لسؤالش يابنت المكلا أنا من اليمن بالضبط من حضرموت بالضبط بالضبط من مدوده واضبط من الضبط من حارتنا

[سالم محمد بلفقيه ((الشرقاوي))]

هلاااااااااا والله ود المدودي
اشلونك
خواتيم مباركه
الحمد لله يوم قلت خف المغص اكيد جربت الشراب التركي لانه ماهو حق عيال الربحان ههههههه وترانا من صدق عندي بقاله من قال لك ياخي لاتكون عندك سكن (جن) شفنا فزعت منك معاد اقدر اسافطك
ومن قال انك منت من مدوده ليه حد قال انك من فلوريدا مبين من كلامك لان عيال مدوده يقولون على البضائع الامريكيه حق عيال الربحان واضحه ههههههههههههههههه 0
يالله جانا النوم وكبدي مفروته من كلامك 0

[المدودي]

يرفع للمناسبة