[المدودي]

شنطه تنوأ من حملها العصبة أولي القوة .. مشحنه لا كورها .. كذها الا تقول يا ضيقي من لي فيها من الحشاكيل الازمة للأيام العجاف في فترة مكوثي في عدن , كل شي حسبت حسابه قبل ما سافر :
ساعه منبه , قلاس , فنجان , كتلي , عطر , شاحن الجوال , مناديل فاين جيب , شامبو سفري , فتله , مخوط , مقراض ظافير , مناخيش أذان , مناخيد للفم ...
انقطاع الكهرباء ... حسبنا حسابه
انقطاع الماء ...... حسبنا حسابه

لكن



لي ما حسبنا حسابه


الحاس



حاس تبطي تقول حاااااااااااااااااس

حاسنا يغدي كما الحشره قدام حاس عدن


با تقولون هلاّس ...

الحاسه الواحده ..لها زوي الكونكورد .. وحجم الصعمر .. تقبصك عيني عينك .. رغم انفك .. وما تستانس تقولها : اششش

المكارزه , ورفع الصوت , وفرقاز العيون , وعرض العضلات ..
ما ينفع قدامها

الكلمه الزينه .. ويالله الخراج انها تشفع لك عندها


صدقونا..
شونا بي فزعه من حاس عدن .. ما قدرت نفتك منّه
تكلوست .. تدخّنت بعاج مشموس .. دهنت بقاز .. رشّيت نفسي بفليت
وما شي فايده

مستغرب وين يعيش لبوه الهاله ؟؟ آه يوكل ؟؟ نكّل بي .. نكّد عَلَي نومي..
سير بالستره من كثر الفزع
وياويلك يا سواد ليلك لو شافتك حاسه وانت ديخل الدار .. اعترب للقبص والتقبيص .


وبارح تلوّل :
دخلت الدار نتلبّد على طرف صابيعي وهبنّنا يوم نسير .. و الحمد لله ماحد شافنا
طرحت راسي على التكيه بشييييييييش .. ونمت


تجي حاسه تسحب التكيه من تحت راسي وتقشع الغطاء

;bull : هوكذا ؟؟ آه ؟؟ حاسبني ما شفتك ؟؟
: أه اللي درّاش اننا في الدار يا حاسة القدره ؟
;bull : ليه هي وكاله من غير بواب .. قرّب رقبتك لا تضيع وقتي .. خارجني معي مشوار ..
: تجمّلي .. ذي المره بس خلينا ننام ..
;bull : شف .. لا تلف وتدور .. مُي الدم حقّي بغيته منك بالقوه ولا بالراضه ..
: طيب ما دام الأمر كذا لي طلب واحد
;bull : هت
: شينا مشغوب منكم يا معشر بني حاسه .. وين ساكنين ؟ آه توكلون ؟
;bull : طيب .. يومك غريب بس باشلّك لمان الفله بس بدل المُي بغيت مُيين .. لا تحاول تخدعني ..
: موافق

تطنحت بها .. وشلتنا معها ....
وفي النهايه برّحت فوق مبنى أبيض كبير ما تفنّد وجهه من قفاه
عايشين في بحبوحه من العيش
خزانات ماء كبيره غير محكمة الغلق
حمامات .. أيش حمامات ؟؟ .. حرام نقول عنهن حمامات .. في غاية الوساخة والوضر
ألوف مألفه من الحاس وبأحجام مختلفه
انا فززت من المنظر وقطبتها شرده لمان الدار وتغطيت من الفزع

;bull : ساعه واني دور لك يا مخلف الوعد .. وين با تروح مني < با توكلنا بعيونها .. غضبانه يوم انا شردت عليها >
ورفعت يدها با تصلخنا بكف


و
و
و
و

قم صلاة فجر .. قم

حلم يفزع < خس من حلم الشعف >

عفواً نسيت ما قول لكم انه فيه لائحة على الفله اللي عايش فيها الحاس و مكتوب عليها :

[poet font="Simplified Arabic,5,black,normal,normal" bkcolor="coral" bkimage="" border="none,2,gray" type=0 line=200% align=center use=sp char="" num="0,black"]
مستشفى الجمهورية التعليمي

[/poet]

شي بصر .. شي نظر .. هل شي وسيله

[بن صران]

إإإإيييييييه يالمدودي
يعني بغيت باتقول إن مدوده ما فيها حاس؟؟؟على كل حال بأعطيك طريقه تقمر بها حاس عدن
فرش وقاك من الغرب .... وحط الغطاء :::::: ونم بجانب الفرش ؛؛؛؛؛؛؛
وخل ابو الحاسه تسحب الوساده ولا تقبص الغطاء ..
كيع ... كيع ..... كيع ....